陶源酒家

營業中

休息中

午市正價，3個人叫300幾蚊嘢，連埋落單坐咗1粒鐘俾人趕走，又老人家又婦孺，正式食嘢都只係食咗20分鐘，跟住問我哋係咪食飽....冇耐仲收晒所有餐具，不停俾說話我哋聽.....垃圾酒樓

話咁快又父親子，祝天下父親過一個開心愉快的爸爸日，雖然今日個個休息都唔想習慣遲起，8點幾就起身，身為一個家庭主婦真係好忙，唔洗返工都好啲，攰可以返去再瞓想點都可以時間自由分配，如果返工再要照顧家庭確實好辛苦，而家好多都係1-2個小朋友又有工人比起我哋就舒服好多，以前還要跟4大長老，以前父親子就會午餐同老豆食，晚餐就同老爺食，呢2年疫情同長老都一一離開，我哋就無咩特別，今日啲午餐細囡就同我哋去飲茶，大囡要工作就話今晚外賣回來，知道爸爸最喜歡pizza同炸雞，但之前2日都有食呢啲，我就話買啲海鮮返嚟食加埋粥底就可以，咁飯後甜品喺個桃撻，個桃撻好特別老公都喜歡，開心的爸爸節，午餐的茶唔值得覺太貴，一早入咗會遲遲都攞唔到張咭，由去等位到走問咗幾次都攞唔到，那個跟的話好忙，叫我走時先攞，點知等好耐都喺唔理，阿囡出去埋單我順便問，收銀的都話唔知叫我搵返果個，跟住我叫女唔好比錢先，其實喺會員有優惠應該通知同叫我攞張咭先埋單，但服務真係好差，雖然而家喺會員有95折，我諗都唔會再嚟，張咭出咗好耐通知我攞，有時去到問完叫等，但幾次同啲同學飲完都唔記得，有會員號都無用，今次記得就諗住攞點知問嚟問去都攞唔到，

第三次年食陶源架外賣盆菜依然有驚喜，食材依然保持高水準，雖然商家為保持售價不變，材料方面減少了福袋，豬皮等小配料。但整體味道方面反而更加優質，鮑魚好味已是必然，連蘿蔔及蓮藕都非常清甜，沁人心肺。豬手也是預煮至軟綿，令我食欲大動。商家獨門調配的一樽高湯，盆菜食完還可以打邊爐，全家老小都開心，過肥年，辭牛迎虎，望香港早日走出陰霾，可以係酒樓食炒菜。

第一次寫食評，真的不吐不快。本想趁着蟹季尾，來個大閘蟹放題吃過暢快，卻換來一肚氣。早幾天睇完某youtuber的影片介紹(另一分店)，昨晚就來了近屋企的觀塘分店，三人前去結果是三人得到人生中最最最伏的用餐體驗。三人叫左$528(未計服務費)的套餐，先每人每味道叫一隻，等了差不多坐小時，大閘蟹共9隻先上，打開第一隻，全黑發臭，以為自己不好彩，跟手全部打開哂9隻，真的中哂六合彩般，全中(全部臭蟹)。跟手叫待應過來，有幾個待應望到我舉手即轉身行走，最後得一個待應慢條斯里行過來(感覺佢地一早知D蟹質素，知客人實嘈，而費事應付我同佢講，我們中哂六合彩，D蟹全臭，嗰待應不特一句道歉都冇，仲話佢哋都好難做，是供應商問題，不是酒樓問題，仲立即話再蒸多1x隻出來。等了差不多40分鐘，1x隻上枱，我們即時打開，又是全壞發黑發臭，今次我叫經理來，佢居然答我佢衹是打份工，又推落供應商度，仲話即時叫供應商再攞貨來(當時8:45pm，有冇供應商咁夜仲送貨？？)，我們拒絕並問佢點處理，佢話三人衹收我一人錢，我答佢，我們來吃蟹餐，一粒蟹肉都食不到，點解仲收錢？嗰經理態度即轉差，寸寸貢話: 好喇！你們現在走啦！其間一句

星期六諗住同朋友去食大閘蟹放題，見到陶源都算出名，收費唔平成5xx一位，心諗應該都唔會差得去邊。點知中伏，果時第一轉先每個口味(花雕、清蒸、鹽焗)各2隻，好快就嚟到，一開隻隻蟹無膏不特子，仲要入面係黑色。叫待應姐姐過嚟望，佢話：係咁架啦，總會有啲唔靚。你咪叫多幾隻囉！任食之嘛！好! 今轉我地每款叫4隻，心諗應該有啲好。嚟到開左4隻都仲係咁，決定開晒12隻睇，點知都仲係咁。最後叫經理過嚟，經理無解釋淨係話佢跟進。之後係廚房搵左10隻生蟹出嚟話佢親手揀比我地而家蒸比我地食(叫做塞住我地把口)。新蒸出到嚟d蟹都係無膏，只不過比上兩轉好啲因為唔係黑色。500幾蚊最後唯有用兩個壽包+幾片油立立嘅片皮鴨+一隻細鮑魚塞飽左。總括: 唔會再幫襯呢間，嬲左

今晚同爸爸慶祝生日，食咗個恆生優惠四人套餐。原價$1880，特價＄1280。結果要原價加一，再加一服務費…即係加二。仲要原價如一應該係$188計咗$210，職員承認計多咗$22。最後埋單係$1679。計多咗$22當俾貼士，豪埋俾佢龍蝦伊麵好少龍蝦肉，其他嘢又唔好食，唯一係鮑魚最好食。我職員人數實在太少，上菜速度超慢，我頭盤竟然係放到差不多最後先至上。食完啲碟又遲遲都冇人職員收走，環境又嘈吵不堪。以後唔會再去。

前幾日同幾個朋友去試觀塘陶源嘅大閘蟹2小時放題 ($488, 另+1，和茶錢)。唔會有下次，成餐飯比想像中差。講左主角大閘蟹先，有3款烹調方法：清蒸/雕酒/鹽焗，叫曬3款口味，但味道和口感分別不大，蟹肉一啲都唔清甜，無乜味道，比較瘦，蟹膏份量很少，而且偏乾， 每拆一隻就希望有驚喜，但結果係.... 無 ><, 如圖啦！糯米飯，一點點糯米香都無， 偏濕軟，有怪味！甜品方面， 芒果布甸真係完全冇味，好奇幻，唔知自己食緊乜><最正常係楊枝甘露和湯圓，大家為左填肚，結果每人食左各兩碗。食食下，有個女侍應走埋嚟招呼下，我地話啲大閘蟹無乜膏， 佢大大聲話咁都叫做冇膏， 所以佢即席開一隻蟹嚟睇，結果佢細細聲話：真係唔得喎！之後大家喺無聲之下，繼續食埋啲蟹嘞！

臨近中秋, 同屋企人出去食餐飯聚一聚。我地BOOK左一間房, 冇其他人坐隔離, 坐得舒服D。一早訂左枱就唔洗等直接入座, 到人齊我地就叫上菜。唔知係咪人多(但行去廁所望到出面得兩三枱客), 上菜既速度好慢, 食完乳豬都等好耐先有第二碟菜上。乳豬皮脆, 但就好肥, 同埋個底有好多醬搞到食落好咸。其他菜都係魚, 雞, 飯,伊麵咁。我諗我地個餐最貴就係碟鮑魚..冷盤上, 酒味太重, 個人覺得唔太好食。其他菜既味道都正常, 但條魚就蒸太耐, 浪費左..最後上既壽包係好食既, 但賣相就一般, 見到包面有D爛左, 有D又燒焦左咁.不過個餡就好足料, 每個包都有一粒咸蛋黃, 配埋蓮蓉食就岩岩好, 唔會太甜。成餐飯整體黎講不過不失, 上菜速度要快番小小最差既係間房上一手就食完煙, 同D侍應反映完間房好大煙味, 佢地都係冇理會, 服務態度有待改進

星期日一家人去飮吓茶，食個飽啦⋯⋯假期飲茶正常都係要等位！不過我哋都係醒，一早訂定枱，費事又係等餐飽！我哋大概1:15左右去到，唔知道係咪就嚟下午茶時間，啲人晏少少先會到，還是地點始終唔太就腳啦！總之就係唔多人等！我哋點咗一啲點心，仲有冬瓜盅，同埋三隻乳鴿！一向去飲茶都覺得點心即叫即蒸，正常都會熱辣辣，但出奇地呢間酒樓嘅點心全部都係唔夠熱，9成都只係微暖，感覺好唔乾淨！我相信最熱嗰個係冬瓜盅，真係要吹兩吹先可以入口！不過值得一讚係，待應大部份沖水都算快，執枱亦都好爽手！只係本身酒樓唔特別乾淨咁啫！最後埋單$9xx!點心熱真係酒樓應該有嘅正常水平，食物質素就當然要搵個好師傅啦⋯⋯所以希望有機會再去嘅時候佢啲點心會正正常常，最起碼可以熱住拎出嚟啦！

年尾清假，普通一個星期一，一早陪屋企人去飲早茶。10:30去到，冇人帶位，自己行入去揾位，再叫人開茶。唔算多人，樓底唔低，但係都好嘈。有多款孖寶選擇，同特價點心，兩位叫左5個點心，$120，都幾抵。可惜冇服務員，見到大部分人都係自己行去加水。

在觀塘飲茶的話，選擇絕對是非常多，不過個人就都頗喜歡來陶源。位置上來說，東廣場都算方便，茶客不會超級多，慢慢歎茶傾計亦舒服。食物水準一直以來都保持得不錯。涼菜類的水晶餚肉和沙薑豬手很得人心，冰冰涼涼的口感非常開胃，尤其是在大熱天時；蒸點類的東西表現正正常常，其中那個姬松茸遼參蒸粉果標榜是得獎名點，確實連樣子都很晶瑩剔透引人流口水，還有家人最愛的古法馬拉糕，鬆軟香甜；炸物類就做得很香口，妙齡皇子鴿夠抵吃。總的來說是個不錯的飲茶好去處。

上次試過荃灣分店的陶源酒家，食過不錯特別是冬瓜盅，所以今晚請雙親來到觀塘分店共進晚餐。雖然位置不是地鐵站出口但都不太遠，相信寧靜舒適度更高。 🧐大堂水晶燈光猛亮麗，座位及空間感非常寫意。服務員態度和藹親切有講有笑。🥢話明來食冬瓜盅，當然必點，清甜消暑又生津，湯料豐富鮮味十足。🥢紅燒乳鴿 $38.80 買一送一你唔係唔食嘛？肉嫩汁豐來形容最貼緊，皮香色澤均勻入口香氣惹味，相當有水準真是一食難停。👍👍四人套餐 $688🥢黑醋高山木耳，爽口開胃🥢御品鮑魚伴秋葵鮑魚比較淡口一般，秋葵新鮮嫩口。🥢清蒸沙巴龍躉火喉恰好鮮甜嫩滑有魚味。👍🥢海味雜菜煲雜菜款式頗多，更有大大隻蝦乾惹味可口。🥢再來原隻清遠走地雞，肉質軟滑雞味濃厚，不愧是清遠雞食落口感真有不同，正所謂食雞都要有雞味。✌🏼😁🥢蛋白杏仁茶這碗杏仁茶荃灣分店做得比較好，欠杏香口感粗糙。

叉燒撈粗無叉燒，有兩條肉牌😡Q彈白兔變酸縮😤楊枝甘露西米唔熟😠職員回覆人地食無野，我地食先有野🤔新婚下午茶一行廿人，心情變得憤怒鳥😠聞名不如見面無語了

今晚來到官塘陶源酒家伐dinner,呢個算係不錯嘅選擇，因為晚上無咩人，全晚唔過十枱，傾計一流，今晚食咗4樣餸，有冬瓜盅（真係熱辣辣，又清甜，冬瓜又好林👍🏻👍🏻🍤），鐵板龍蝦真係全間店嘅特色菜（隻龍蝦好爽口彈牙，汁又好味），煲仔蠔（真係熱辣辣，隻蠔肉汁鮮甜，幾好肉），西檸雞（又係幾特別，不過跟傳統有啲唔同，佢用青檸），最後我哋埋完單之後再叫甜品，個肥婆收銀埋嚟話要收返茶錢先可以再叫甜品，你都覺得唔妥呢！

衛生唔好，一入到黎，就見到幾個碗碟有污跡，同侍應反應完，竟然就咁用手撥走再比我;而上菜ge時候，有幾樣食品都倒瀉晒。其次，價錢方面都較貴，茶位係一人13元，而食品味道一般，甚至有D都好難食，例如蝦腸，蝦肉'鞋'得黎，完全冇甜味，好似食緊膠咁，仲要係特點的價錢，鳳爪全是肥膏。此外，服務員態度差，由擺碗碟，到落單，一上晒野食，就即刻催人比錢，都黑口黑面。