旺角海鮮菜館

营业中

休息中

收工緊係搵野食,開餐喇~!這間旺角海鮮菜館一入門口就見佢地幾缸魚,就知佢地主打鮮活海鮮.點了《至尊二人海鮮套餐》.^白灼海蜇絲同白灼鮮豬脷爽口開胃,作為前菜就最啱!^蒜蓉粉絲蒸大元貝,蒜蓉爆得香,元貝鮮味大隻^酥炸美國桶蠔,炸蠔外層脆口酥香，內層綿密軟嫩，蘊含鮮嫩多汁桶蠔^豉汁炒大蜆,味道濃郁的豉汁炒蜆最適合作為下酒菜,開埋啤酒啤一啤就更perfect!^清蒸虎杉斑,食落肉質爽滑有魚味^翡翠金沙蝦球,酥脆鹹蛋黃煮的蝦球,朋友瞬間秒殺蝦球~哈!^啫啫肉碎芥蘭煲,想食D蔬菜類,所以朋友點了這道菜,咸蝦米咸咸地,芥蘭同肉碎香口嘅味,令人停唔到口!^番薯糖水,最喜歡的吃還是番薯糖水,也有些薑味,飲完幾暖身.

今日係Moko做野收工收得特別晏 已經差5多9點 唔少餐廳既last booking已經過去左 一係就要食得勁趕 想同同事去舒舒服服食少少野傾下計 上網搵搵下搵到呢間旺角海鮮茶館 係旺角站行過去都幾方便 佢個位平時去花墟先會經過😆入到去剛剛好9點 出面寫住有米芝蓮班底😲 比左個夜宵磨套餐我睇 我地決定食好d揀食蟹薑蔥炒蟹有唔同做法可以選擇 我地揀左薑蔥整 d肉幾鮮甜 隻蟹都幾大隻同埋都幾新鮮 佢隻鉗都大過人 好在有蟹夾比我夾碎佢🤣白灼鮮粉腸&白灼鮮魷魚本身叫完個set見佢比左2碟辣椒豉油我 對呢2樣野即刻冇乜抱太大期望 諗住係白烚比你點豉油食點知上到枱食落係已經有微微調過味道 似有dd麻油香 粉腸口感柔軟 鮮魷都好爽口 豉汁炒靚蜆靚蜆大大隻個豉汁做得幾好 隻隻蜆都有掛汁 完全冇沙 肉都冇縮仲好飽滿肥嘟嘟  如果多幾隻我會開心好多😆沙田雞粥雞粥煲得幾綿 有雞油香氣 雞件都有幾件 食過既雞粥入面呢間都算多料 係幾好味 食埋個粥已經飽 食到最尾 店員行過嚟問想唔想食糖水 我梗係話要😋 個糖水清清地幾好味 唔似平時得紅豆沙綠豆沙 佢係有薏米雪耳蓮子岩哂宜家d天氣目測個環境唔細 個間隔幾得意 都

座落在旺角東站旁，這家惠營海鮮的菜館無論環境還是座椅都很有地道中菜館的感覺環境：中產的爸媽級會很喜歡的裝潢，燈光很亮，偏黃，增加食慾服務：不俗的服務，侍應10分殷勤有禮 白胡椒粉絲波士頓龍蝦 相當多肉的波士頓龍蝦，配以大量的白胡椒，入口微微的辛辣，加上大量的蒜頭以及粉絲，惹味好吃！ 傳統杏汁燉豬肺湯 相當濃郁的杏汁，配上煮得雪白的豬肺，這碗豬肺湯10分不可多得，質素很高 金沙蝦 請很大量的咸蛋黃醬配上大大只的蝦仁，彈牙幼嫩，非常惹味 蒜蓉粉絲蒸扇貝 大大只的扇貝加上粉絲蒜頭以及醬油，扇貝夠新鮮，很簡單但已經10分美味 滋味六小福 套餐包兩款前菜，我們點了韭菜花以及海蜇，入口清爽而清新，沒有過度調味，贊鮑魚也是清爽有致~

同朋友係旺角血拼完都好夜，隨便係附近揾野食醫醫肚，成條街黑蚊蚊之中見到呢間光猛既海鮮菜館，即刻入去坐低抖抖先~店員比左個宵夜餐餐牌我地睇，分別有4款選擇，我地一行四人揀左一個蟹餐，一個瀨尿蝦餐。每個套餐包一個主食海鮮，兩個小食，一碟蚬，一個麵/粥，都幾豐富。小食我地就揀左白灼豬肚，粉腸，魷魚，同海蜇，另外豉汁炒蚬同油鹽水浸蚬各一，豉油皇炒蚬同沙田雞粥各一。白灼魷魚口感爽脆，海蜇正正常常，豬肚亦爽口，粉腸就有輕微苦味。四款口味都是清淡的，作為前菜不錯。蚬是大大只的蚬，肉厚鮮甜，豉椒炒比較出色，油鹽浸偏咸。薑蔥炒蟹大大只的蟹，啖啖肉，肉嫩味鮮，薑蔥炒好惹味。避風塘瀨尿蝦一碟一只瀨尿蝦，一開三，肉質嫩滑，味道鮮甜，與炸蒜同吃有風味。店員告知沙田雞粥賣完，所以兩個餐都比左豉油皇炒麵，份量多，有鑊氣，味道很不錯，如果多一點芽菜，蔥段之類的，口感會更豐富。最後是蕃薯糖水，生薑很暖胃，食飽暖住回家，今晚真係大滿足~

真係好耐無試過夜宵磨，放寬限聚後而家可以去食宵夜，有夜鬼朋友再推介左位於旺角嘅旺角海鮮菜館，佢話菜館做緊二人宵夜餐，掋食又夠鑊氣，所以為食嘅我又出動啦。去到門口先知餐廳係米芝連班底，簡單嘅酒家裝修，環境衛生，淨潔。大魚虹放有生猛海鮮，都係我地今晚嘅目標。餐廳做緊嘅宵夜menu係二人份量，分為四部分，由蟹，瀨尿蝦，龍蝦，虎杉斑先揀1種海鮮做主菜，再由白灼韮菜花，鮮豬肚，鮮豬脷，鮮粉腸，鮮魷魚，海蜇絲嘅六小福揀倆款，而招牌炒靓蜆部分就由倆種煮法豉汁炒/油鹽水浸二選一，最後就係豉油皇炒麵/沙田雞粥二選一。價錢就視乎你所揀嘅主菜黎決定。我地今夜就揀左姜葱炒蟹，鑊氣夠，蟹肉飽滿，份量二人剛好。小食就揀左白灼海蜇，鮮魷魚，味道一般，勝在食材新鮮。如果餐廳可以由白灼外再增加醉酒煮法就更顯完美。另外再揀左豉汁炒蜆，蜆肉肥美，味道惹味配上最後嘅豉油皇炒麵就更有滿足感。用餐後樓面同事主動送上姜汁蕃薯糖水為這餐畫上完美句號。

餐廳有懷舊風味，座位唔算多，約有10張枱以內，最好預先訂位。我哋四個人每樣叫啲一齊食。小碟叫了白灼海哲絲、白灼水魷魚、白灼鮮豬肚。我鍾意食海蜇，少少辣好爽口，有啲麻油香。水魷魚都幾爽口，點辣椒醬食。豬肚份量都幾多。海鮮蒜蓉粉絲蒸大元貝，好香蒜蓉味。酥炸美國桶蠔大大隻脆脆。豉汁炒大蜆細細碟，夠惹味。清蒸虎杉斑大條多肉，肉質新鮮。翡翠金沙蝦球口感滿足！椒鹽鮮魷卜卜脆，啫啫菜煲夠咸香。佢最後蕃薯糖水唔會太甜～

私房菜大多款式精緻但價錢昂貴，今次朋友介紹「旺角海鮮菜館」，主打海鮮食材、價格實惠貼地，每人幾百即吃得飽肚滿足。四人套餐人均二百多至四百多，菜品由七款起至十款，魚蝦蟹雞看你喜歡哪種配搭。精選三至四人餐旺角三小福白灼韮菜花、白灼海蜇絲、白灼水魷魚杏汁菜膽豬肺湯一道考驗功夫及耐性的湯品，奶白色杏汁香濃、鮮甜菜膽熬得軟腍、豬肺爽嫩彈牙，滋潤香甜又補氣。濃湯花枝大蜆餐牌也未盡錄的新菜品，師傅先把花枝煎成塊，再以大蜆熬湯燙花枝，湯頭鮮甜香口，花枝富彈性。薑蔥美國桶蠔煲清蒸虎杉斑最近興起的一種混種斑，肉質嫩滑，魚味及鮮味濃郁。翡翠金沙蝦球蝦球混上咸蛋黃香炸，蝦球外皮酥脆香口、蝦肉晶瑩通透、味道鮮甜不腥。西蘭花爽脆清甜不青，減低油膩感。薑蔥霸王雞花膠紅燒豆腐精美甜品整體來說，這價錢這份量實在不錯，附近的朋友可一吃。

旺角海鮮菜館的夜宵磨套餐很久前已經想慕名一試，不過自從疫情後，做宵夜的食肆，營業時間大大縮短，現時部分食肆的關門時間稍為延長，終於可以一嚐此店的宵夜套餐。宵夜套餐有兩碟前菜、炒蜆、炒麵或雞粥，及從蟹、瀨尿蝦、龍蝦或斑自選一款海鮮。白灼海蜇絲白灼爽口海蜇，混合了麻油的溫潤，清清爽爽的沒有多餘的味道。白灼鮮魷魚水魷魚切得厚身工整，入口非常彈牙爽脆。豉椒炒蜆豉椒炒蜆新鮮熱辣有肉地，不會有殼無肉。沙田雞粥一碗熱辣辣的雞粥是最窩心的宵夜，雞粥呈現黃油色，雞油香氣混入米粥中，入口非常鮮甜，蔥花微微的辛辣味更加錦上添花。白胡椒波士頓龍蝦粉絲煲龍蝦很多時都是上湯煮或芝士焗，白胡椒多用於炒蟹上，原來亦可用於龍蝦。白胡椒原粒磨碎，胡椒的辛辣香氣十足。波士頓龍蝦，特別是其蝦鉗亦有肉地，肉質鮮甜彈牙。粉絲吸收白胡椒辛辣香氣及龍蝦的鮮甜味，味道同樣吸引。紅棗雪耳薏米糖水飯後一碗中式清潤糖水來得合適，薏米煙煙韌韌口感不俗。

生日飯週繼續，今晚就同好閨密去旺角食海鮮，講真唔係佢帶我嚟，我都唔知有間海鮮酒樓喺大馬路邊😂本身就以為呢啲海鮮酒樓會好嘈又污糟，但實情係一入到就好好服務，哥哥仔拎哂menu 介紹有咩餐，加分✅最後揀咗$788二人餐，咪睇得幾款食物，食哂都真係勁飽😮‍💨首旺角二小福 - 即係白灼頭盤，六選二，我哋揀咗白灼海哲絲，超爽口🤤而白灼韮菜花加咗麻油，好香呀😍豉椒炒大蜆 - 勁大粒肉，蜆肉鮮嫩不韌😋 份量多到兩個人食好耐先食完蒜蓉粉絲蒸大元貝 - 呢個不得了！首先元貝好大隻，粉絲索哂蒜蓉汁，元貝就蒸到剛好彈牙而唔淋，爽😊翡翠金沙蝦球 - 鹹蛋黃係我最愛，搭乜都咁好食。蝦球好肥美，咬一啖就漏哂油🤤🤤🤤鹹蛋黃香真係令人停唔到㗎 😍酥炸美國桶蠔 - 外表脆口酥香，但咬落軟綿綿，多汁😋清蒸虎杉斑 - 嫩滑鮮甜，厚肉，唔會太老，超好味🤤🤤🤤🤤🤤最後有甜品，足料綠豆沙🥣總括係食得過👍🏻唯一超微小不足係豉油較淡，因我食開濃味嘢，同食唔慣蒸海鮮關係，純粹個人口味💯💯

天氣轉涼食完晚飯好快又餓，聼朋友介紹呢間海鮮菜館食海鮮，一於黎試下佢地有個二人宵夜套餐 望落幾吸引就揀左我地揀左椒鹽 特大泰國瀨尿蝦，白灼鮮魷魚同海蜇絲，豉汁炒蜆同沙田雞粥一黎上左冷盤先：白灼鮮魷魚同海蜇絲 跟左豉油點住黎食本身都吸左小小醬汁都入味 辣豉油再提升到另一個層次 椒鹽 特大泰國瀨尿蝦 真係好大隻 有成個前手臂甘長！椒鹽超香 鋪滿隻瀨尿蝦 肉質鮮甜彈牙 配椒鹽好惹味不過剪完殼之後其實肉吾算多吾係好夠喉 哈哈豉汁炒蜆每一隻都好大隻 肉質飽滿醬汁好入味沙田雞粥粥底都算綿滑 鷄肉未算係好鮮甜個種對比起其他菜式就相對普通最後甜品有驚喜！南瓜小米露 好潤好好食呀overall 黎講 食物質素中上分量方面如果揀蟹/龍蝦 可能好d 會多小小肉不過都夠飽既  

今日在何文田收工之後便在旺角東站附近四圍搵食行過見到呢間，咁岩都想食中餐，便即管一試我地兩個人點左個海鮮二人餐，無記錯的話好似係$7XX先黎兩個前菜：海蜇和豬肚呢個係可以從六樣前菜裡面揀既海蜇好爽脆，而豬肚就正正常常啦，食到有少少苦味點下辣椒豉油都唔錯！炸蠔大大隻，粉漿唔厚仲要上黎既時候熱辣辣，十分推薦！不過如果有四隻既話個份量會比較合理鹹蛋黃蝦球都係新鮮同熱辣辣蝦肉實淨彈牙，唔錯，同樣推薦！蒸扇貝正常水準，無話特別驚豔係可以想像到既蒸扇貝應有味道炒大蜆唔會話好濃味可以食到大蜆既鮮甜但係！好似有一兩隻唔太熟全晚最最最滿意 & 驚喜係呢條蒸石斑！！！魚肉口感QQ，新鮮又夠大條蒸既時間亦岩岩好，控制得僅僅熟值得一讚！最後以薏米糖水作結豐富！滿足！

今日同朋友過嚟旺角呢邊行街，之後諗住搵間食小菜嘅中菜館食埋個晚飯先返屋企，咁啱見到呢間喺大馬路邊嘅海鮮菜館好傳統，個樣幾正咁所以就決定試吓 。佢嘅餐牌上面選擇非常豐富，仲有得揀套餐，對於選擇困難症嘅我哋真係好難抉擇 不過店員10分有耐心向我哋介紹每一道特色嘅菜式，推薦左一系列比較招牌嘅菜我哋。最後我哋揀咗個《至尊龍蝦二人套餐》$888首先就係二小福，我哋揀咗海蜇同埋豬肚，作為餐前小食，店員仲俾咗餐廳特色辣椒醬我地，真係非常香非常好食。杏汁菜膽豬肺湯呢個湯真係冇得彈，做得非常出色，應該係我飲過嘅杏汁湯入面最好飲，因為我自己本身唔係太鍾意杏仁 但係佢有杏仁嘅香又唔會太濃 而且結結地飲落去口感更加好，仲要係超足料，一定要試吓。清酒凍鮑魚清酒鮑魚十分冰凍，所以口感比較爽口同埋有彈性，真係做到冰鎮嘅感覺。蒜蓉粉絲蒸大元貝呢個菜式其實周圍都有得食，個人應為正正常常味道合理。白胡椒龍蝦粉絲煲呢個絕對係今晚嘅一個重頭戲，白胡椒龍蝦喺呢度嘅招牌，果然有驚喜，胡椒味好濃郁，但又唔會太嗆口太辣，粉絲炒得好有鑊氣，真係好好食，龍蝦都食得出好新鮮有鮮甜味。翡翠金沙蝦球呢個又係冇得頂，金沙已經冇得輸，仲要係外皮嗰

旺角的食肆繁多，能夠脫穎而出，贏得坊眾讚譽及良好口碑的卻很少。 可洗衣街的旺角海鮮菜館卻是食客如鯽，皆因收費大衆化，味道也出色。我們二人慕名光顧，點了《至尊二人海鮮套餐》。 店員從魚缸撈上海鮮送入廚房，即撈即煮，很新鮮呢！雖然是二人套餐，份量絕對可以滿足口腹之慾！先來的二小福，可從六種食材中挑選兩款，全部都是白灼，這就考究食材的鮮嫩和烹調的温度和時間。 海哲絲和水魷魚爽口開胃，加上少許辣椒豉油更美味。酥炸美國桶蠔蠔身特大，外皮炸得金黃酥脆，蠔汁完全封鎖在外皮下！豉汁炒大蜆蜆肉厚身，配上濃稠醬汁液極之惹味。 至於翡翠金沙蝦球，外皮酥香，肉質非常彈牙，只是份量較少，兩三啖就吃完了！最回味的是清蒸虎杉班，烹調時間剛好，魚肉鮮嫩滑溜，而蒸魚豉油好入味，伴以薑葱絲，賣相吸引。魚肉魚汁伴一碗白飯，絕配。還有漏了單的蒜蓉粉絲蒸大元貝，幸好店員上菜後詢問菜餚是否到齊，發現漏單後馬上補回。 元貝非常大隻厚身，配料份量亦足，蒸得十分入味。甜品木瓜雪耳糖水也不是行貨，足料清甜。原來九時後還有夜宵套餐，價格很優惠。

晚上9pm後旺角夜宵磨套餐 可以選擇虎杉斑/ 龍蝦/ 瀨尿蝦/ 蟹 價錢由$398至$698 十分之相宜今次想食龍蝦餐 $498足斤半美國波士頓龍蝦 有4 種烹調口味 店員推薦白胡椒粉絲煲鋪面層係吸收唒白胡椒香味嘅粉絲 唔怕痴底同索唒底下嘅油 龍蝦肉質夠鮮夠爽彈 真心好好味六小福係尼度嘅必點推介菜式套餐可以揀其中兩款白灼鮮豬脷每片厚切份量足 豬味濃 食落又唔會太淋 白灼海蜇絲清新爽脆 海蜇絲吸收醬汁入味 唔錯嘅小食豉汁炒靚蜆採用新鮮大蜆 尼份有6隻大大隻 肉質飽滿 鍾意豉汁炒嘅惹味沙田雞粥粥底香滑綿密 蔥花薑絲提升香氣雞肉食落都係好夠滑宵夜嘆碗熱粥 感覺腸胃都舒服哂 成個人都暖笠笠整體感覺性價比不錯, 二人份量剛剛好又食到靚海鮮, 係旺角食海鮮宵夜嘅好地方！

去到旺角又想食海鮮，所以就上OpenRice 搵到呢間旺角海鮮菜館，佢有一個宵夜套餐，可以揀海鮮一類，白灼前菜兩個，炒蜆，同埋主食一個。所以我就揀左越南大青蟹，$698套餐，而做法揀左薑蔥炒蟹！一上枱，就薑蔥炒得好香。另外亦都食得出有鑊氣，配一碗白飯就正。蟹好大隻，新鮮，亦都有好多膏，蟹鉗亦好大隻，啖啖肉，推薦！另外揀左一個白灼豬肚同海蜇絲，配上辣椒豉油，特別惹味，豬肚同海蜇絲都好爽口，好適合做前菜。喺炒蜆方面，揀咗豉椒炒大蜆，隻隻都好大隻而且冇沙，亦都炒得好香，一隻一隻冇停過口。最後揀咗沙田雞粥，本身以為好清淡，結果雞好滑，配粥好適合，不過我都有叫佢走蔥，結果冇走，下次可以留意番。最後仲送咗兩個中式糖水，合桃露，有埋甜品就岩岩好！建議可以食宵夜套餐，有唔同嘅價錢，亦都有唔同嘅海鮮，可以自己搭配鍾意既野。推薦。