美都餐室

營業中

休息中

食完把幾火o既上海點心後, 過左黎美都一試招牌紅豆冰. 果然係幾好味播. d 紅豆幾甜, 唔會好硬. 不過飲到最尾食到粒臭o既紅豆, 有少少遺憾...

同一班喜歡攝影的朋友, 相約美都餐窒閒談, 分享一下攝影心德, 遲到了一點, 先點了紅豆冰, 味道一般偏甜了一點, 刨冰不多相比下大埔廣成冰室遜色一點. 再來一個海鮮焗飯, 等了約二十分鍾才上菜, 份量不少, 海鮮料充足記憶中有蜆肉, 蝦, 魚肉片, 魷魚等等, 部份海鮮先開粉炸好後再焗粉面有點點燶位, 焗飯汁香濃, 但飯底十分多油, 食完後有一點濟口. 同朋友們閒談了一個多小時, 再來一杯凍咖啡, 傳統港式咖啡幾香甜. 中午時可能客人比較多, 服務比上次差了一點.

20040804 8.55pm(補返個食評先)我去電影中心睇戲, 80% 都會o黎呢度食焗骨飯.買o左飛睇9.40pm 電影節<Asia Shorts>,未夠鐘,搏一舖過o黎呢度.等20分鐘我杯熱檸茶變埋凍檸茶先有得食.焗骨入味,炒底飯焗過索曬o的骨味.好食到呢~(有人話呢度個飯係先焗骨後加上飯面,一定唔係lor,人格擔保!)你話平咩? 一定o吾係, 不過o甘好食, 得20分鐘都絕對值得.

今次沒有叫馳名的焗飯, 因為總覺得美都必定還有其他可取之選. 我地order左錦鹵雲吞, 咖哩蝦球炒麵.(我地問佢地可唔可以落咖哩汁炒, 佢話冇問題, 喜歡的話可落沙爹炒)錦鹵雲吞($40)--即叫即炸, 夠熱夠脆, 但稍嫌個餡有d硬; 個汁好大碗好多料, 似一個用好多甜酸汁炒成o既什錦小菜多d, 有叉燒, 肝珍, 鮮魷, 薄雞件, 肉片, 青紅椒, 菠蘿...係幾好味, 但唔驚喜.咖哩蝦球炒麵($59)--以炒粉麵價錢, 真係幾貴. 但都算交足貨, 蝦夠大有鮮味, 走過油, 再用咖哩炒, 好脆好味! d炒麵果然有水準, 側邊好脆卜卜, 中間咖哩味好濃, 好彩炒得唔油, 我地兩個食清碟, 覺得好滿足!原來美都真係有另類選擇架!

差不多九點幾先到, 冰室只剩返一台客人, 急急咁叫左三道菜, 先叫焗排骨飯, 炒飯底幾好, 排骨就有d似細啦既咕嚕肉仔, 個汁都調教得幾適中, 不過就好似少左已前食焗飯既感覺. 下次都係叫返焗豬扒飯好d. 第二道菜椒絲腐乳通, 一般水準, 唔係好突出. 最尾再叫多個錦鹵雲吞, 一共八隻, 錦鹵雲吞本身無咩餡料, 好似只有一隻細蝦仔, 不過d雲吞皮好香脆鬆化, 另外跟o個碗汁就好大碗, 酸甜味調教得幾好,而且仲好多料~ 完來佢地收九點九, 食到佢地拉閘, 不過d呀姐仲好好禮貌咁招待~ 真係有d唔好意思.

最近去油麻地百老匯電影中心睇戲，終於去左眾坊街嘅美都餐室試下，最近幾次都有去食下午茶或者晚飯。餐室採用舊式裝修，好有特色，而且好干淨。美都最出名嘅應該係焗排骨飯，但時正炎夏，焗排飯可能太濃太膩，所以選左酸梅蒸排骨，冬瓜粒湯飯同味菜牛柳絲炆米。酸梅排骨係餐牌上無嘅，要special request，若太多顧客厨房太忙就可能無得食，呢味餸相當開胃，排骨入味夠腍又唔多肥膏，唯一美中不足係唔夠酸，會再食。冬瓜粒湯飯無特別好味或者唔好味，純粹貪佢清淡兼濕濕地易入口，係消暑良品。街外嘅瓜粒湯好多時加左好多味精，而美都D湯應該無乜味精，飲完唔口渴，幾健康。味菜牛柳絲炆米只屬一般，味菜好好味，唔咸又夠甜口，但味菜太少，變相令醒胃程度下降，醃牛肉嘅鬆肉粉重手左，令牛肉肉味流失，最唔明係點解炆米都咁多油……下午茶必定要試西多士，街外嘅西多士通常好油膩，外層無蛋昧，夾心就搽花生醬攪到食味太heavy。美都嘅西多就正好多，唔油膩，表面有明顯蛋味，無夾心花生醬所以易消化，配煉奶食就一枝棒啦，士多啤梨鼻強力堆荐!!!

晚上我和大少介紹好地方比朋友就是近廟街的“美都餐室”呢間野都好舊式的有兩層高裡面裝修十足五十年代有舊舊的收銀機舊舊的大鐵窗舊舊的啖罐（放心！依家無人會用）舊舊的卡位舊舊的牆磚等等朋友們因未來過覺得環境十分“新鮮”再而介紹美都馳名了五十年的美食：焗排骨飯！呢道美食真係吾野少食過之後簡直吾想再食"大瓜落"和"大塊潑"的焗飯了！排骨香口外脆內軟多肉不會利用好多汁來掩蓋肉味雖則要等成十五分鐘咁耐但都好多人要差不多每檯都要好味嘛即叫即焗點都好過兩大名快餐整好隔夜的啦！明火老湯一樣正到不得了！一飲就知係老火湯吾會令人覺得勁味精最後各人一試勁正的紅豆冰！曾經好懷念細個時好味的冰室紅豆冰長大後一直都找不到合口味的不是大半杯冰搵你笨的就是紅豆又硬又無味直到美都的紅豆冰終於可以一嚐往昔甜蜜蜜滋味~ 那杯紅豆冰的紅豆軟綿綿有位朋友在飯前先叫了一杯吃下吃下飯未到已忍不住吃了大半杯最後各人捧著大肚子十分滿足地埋單。

下午茶時間去美都食焗豬排飯及焗排骨飯, 相比之下覺得焗豬排飯較好, 因為焗排骨飯d排骨係一早炸定左o係度, 唔太似咕嚕肉, 因為唔夠甜酸, d肉有味, 但係唔好味, 好似落左d喼汁黎醃, 怪d囉, d汁冇咩味, 同個焗飯唔係好夾, 如果加左芝士同焗耐少少會好味d, 另外叫左西多士, 之前諗住呢d舊式舖的西多士會做得不俗, 點知一上桌就失望, 件西多士好薄, 將一塊麵包去炸, 中間冇花生醬的, 唔值$16, 雖然係咁, 但係都好多人幫襯

難得有一晚完全空閒，自己一個去油尖旺行下，諗起之前有食家對這裡的焗排骨飯有點意見分歧，不如就來試試究竟係米差左。七時多來到，爬上那條長長的樓梯上閣樓，都有四、五檯客。選了一個靠窗的位置，望著五光十色、人來人往的榕樹頭，確係幾正的另類夜景。美都亦十年如一日，那個「for display only」的收銀機、直角卡位、舊式痰罐及那些可作文化遺產的紙皮石牆。叫了焗排骨飯同涷菜蜜，專登望住隻錶，今次十分鐘唔使就有得食。但見個店小二用隻鐵匙羹將焗飯撥落隻碟度，似乎唔使好高技巧至做得到。看這個焗排骨飯，又好似不大對頭，「炒飯」及「焗排骨+西汁」是各據一方，互不相干，咁其實呢個飯唔需要拿去焗，就咁將兩者加埋效果都會差不多。雖然個飯一定是焗過的，但全無焗飯的效果，是有點「有實無型」，都幾特別。排骨似平時吃過的咕嚕肉，是走過油的，應該一早做定，因為幾「死實實」，有骨卻無肉味。吃到這裡也不禁有點失望，似乎以前啖啖肉好味的排骨是一去不再了；西汁不鹹不酸不甜，拿來撈飯都唔得，而炸過的排骨粒「圍」上這個杰汁，是雪上加霜；炒飯份量多，炒得乾身又不油，廚房還可拿點功架出來，不過同個焗飯的整體評分幫助不大。埋單55蚊

果日係電影中心睇戲前黎左呢度食飯....order 左焗排骨飯同埋鮮茄牛肉湯意....個排骨飯叫得做招牌菜...都真係有番咁上下播...D排骨好入味...又淋....都算多汁呀....個湯意勁多蕃茄...對於鐘意食蕃茄既我黎講真係睇到都開胃呀...D牛肉好滑....唔知佢係點整....口感同食開果D唔同....最正係個湯底....好好味...我成碗飲哂....睇其他食家既食評都建議坐樓上....我去到果時七點幾....仲有幾張卡位.....坐係度望落榕樹頭......又真係幾好feel 喎...臨走時樓上都差唔多坐滿人....睇怕佢都係唔憂做架啦....

蕃茄牛肉湯意，好似用紅湯做底咁味。牛肉無用梳打粉，同火鍋本地牛肉一樣咁有肉味。頂，寫寫下諗起都咬親條。本地自創菜式金牌經典之一，馬可波羅油如果存下有知，都唔好意思無將咁重要的文化帶回國，而家紅都臉晒都似。下次邊個去開米蘭，帶碗過去揚威海外啊。米蘭啊，唔好去米蘭站啊。米蘭站等我去搵周麗淇好喇。

我都去過美都幾次，每次都係食焗排骨飯或焗豬扒飯，每次我都親眼睇住伙記由原盅焗好的飯倒落隻碟到，冇花冇假。

本人經常光顧美都，時常吃他的焗海鮮飯，就是喜愛他每個飯即叫即焗，相信惡男你沒有被人搵笨，這些舊式餐室，焗飯是用碟上，是避免灼傷客人。記得十幾二十年前，我在油麻地新港餐廳做暑期工，那裏的焗飯也很不錯，那些師傅第一天就教我上焗飯要先倒落碟，那個兜實在太熱，要用衫筴幫手先可完成任務，我最享受焗飯那股熱力，由每一粒飯裏散發出來，每吃一口都要張開口散散熱，那些師傅還說做焗飯很麻煩，飯要炒底，海鮮要開粉炸，還要花時間焗。如果臨收工有客叫焗飯，廚房是會傳出粗口聲的。不知道從何時開始，焗飯變成用原兜上，飯只是微微暖，炒底沒有了，可即叫即上.......

要好風景可以行餐死上2樓同班警察一齊食。想睇新鮮出爐的豬扒飯就一定要坐樓梯底。只見廚房申隻手出來，跟住「丁」一聲。樓面伙計立即走過去趁熱將兜飯倒落碟，果下手勢真係幾十年功力先得。雖然要稍為等等，但即做的焗豬扒飯同一哥果D係兩碼子事。比個貼士大家，如果想食得更好味，不坊等多幾分鐘，叫廚房焗耐小小，等個頭頂有多小地仲正。

只想回應有關焗飯時間事宜(不談味道, 因吃的人是你)~ 如是真正即叫即整的焗飯, 當然要花時15分鐘或甚更久~ 你提及那些"一早焗好"的焗飯, 應該是快餐店或快餐店貨式, 這些才是下及格~ 另, 這裏的侍應習慣將焗好的排骨飯掉上碟才上枱~如要辨認真假焗飯很簡單, 看看排骨底有否沾滿飯便知~