踏入秋冬季節，我最期待的松露出現了，梗係要趁住當造嘅時間，對自己好啲，食返個松露宴啦。唔使周圍搵喇，開飯仔幫你哋搵埋，喺佐敦同柯士甸都有餐廳推出黑松露套餐呀，即日起至到12月15號咋！
傳統法式料理 Yours Bistro
洋溢住法式風情嘅Yours Bistro，炮製咗多款松露料理，有前菜有主菜！呢味「紅燒菜薊伴香茅、火箭菜、巴馬臣芝士及松露」嘅原材料全部都係法國進口㗎，重點係黑松露菌原塊上，係原塊上呀！既醒神又醒胃！
主菜嚟講，「香烤法國珍珠雞伴松露及韭菜」係誠意推介，淨係睇大廚用鮮檸、牛油同蒜蓉嚟醃足隻珍珠雞一晚，就知道有幾咁入味，加埋厚切薯條，同主角黑松露菌，係perfect池嘅。
而「法式松露芥末豬排」嘅肉汁味都唔使多講，惟一要提一提嘅係伴碟嘅薯蓉，混入咗黑松露油同埋鮮黑松露碎㗎，使成道菜錦上添花！
意式小餐館 Yours Milano
至於同樣提供松露小菜嘅意國餐廳Yours Milano，佢哋嘅大廚對於利用時令食材去創作新派意式菜亦有一手。就以「黑松露杏仁醬焗鱈魚柳」為例，大廚先喺魚柳上面灑上黑松露碎同埋杏仁碎，精確計算烤焗時間，令兩者嘅油份慢慢滲透入塊鱈魚柳度，口感上更覺豐富。
你唔好睇輕呢味「香煎帶子伴黑松露菌」，雖然好似細細碟咁，但其實相當大……規模㗎。帶子係日本原產嘅，菠菜葉就由澳洲入口嘅，仲有意大利嘅車厘茄，將世界各地嘅美食融合為一，配埋原片黑松露，隔住個mon見到都想食呀。
仲有芝士控不得不試嘅「意式牛肝菌芝士雲吞伴黑松露忌廉汁」！呢碟嘅黑松露都係原片上㗎，仲有大大片重奶味嘅意大利芝士，點忍呀喂？
文：kar
隨時接收最新資訊
讚好OpenRice專頁！
關鍵字
松露
佐敦
柯士甸
法國菜
意大利菜
複製到剪貼簿