幾時都話，甜品係第二個胃嚟，特別係女生。無論食到幾飽，一見到甜品，都總係會雙眼發光然後好似冇食過嘢咁又食埋。呢間一向都喺尖沙咀開店嘅法式甜品店，終於開過海，喺港島區開咗間分店。

新店新開張出新甜品是常識吧。佢哋嘅OPÉRA蛋糕同松露OPÉRA係經典皇牌，今次再出變奏版，叫OPÉRA COGNAC，係選用高品質醇美干邑去製作㗎。同過往嘅OPÉRA一樣，由最底以特濃咖啡浸泡嘅杏仁蛋糕起，上面分別有咖啡cream、杏仁海綿蛋糕、70%濃朱古力醬、朱古力等等總共有成8層咁多。而干邑就完全咁滲透晒落每一層度，所以食落口感都幾醇香、軟滑，不過干邑味就唔算好突出。

8層干邑OPÉRA

（左）OPÉRA蛋糕、（右）松露OPÉRA

如果好干邑嘅，可以試干邑版馬卡龍，干邑味相對濃好多，中和返馬卡龍本身嘅甜，味道平衡。

干邑版馬卡龍

另有多款馬卡龍

另外有鹹食嘅，波士頓龍蝦三文治、嫩滑慢煮軟心蛋、煙肉三文治等等，前者龍蝦肉爽口彈牙，後者蛋香味濃。

壓軸登場嘅係新口味雪糕，如果大家有印象，上年嘅松露雪糕好受歡迎，松露味勁突出。今年輪到榛子味，果仁味濃郁，好似食緊金莎咁。兩隻味都想食嘅朋友仔，唔使煩，有得雙拼呀！

（左）榛子雪糕、（右）松露、榛子雙拼雪糕

DALLOYAU（期間限定）
地址： 金鐘金鐘道88號太古廣場L2層, Kiosk 200D
期間限定：即日起至9月（暫定）

文、相、片：Kar