The Place

Dinner Buffet主要分幾區，大部份人都會先攻生蠔及凍海鮮，有虎蝦，麵包蟹，小龍蝦等。我覺得生蠔比較細隻，不過後期拎既大隻啲。之後有個魚生刺身枱，供應五款刺身。另一邊有個冷盤區，沙律，火腿，日式凍盤，仲有片皮鴨（冷盤？）當中我覺得個意粉沙律幾好食。熱食區有燉湯，鵝肝，羊架，脆皮豬手等等，當中海南雞飯我係推介既！呢個係要叫個職員整，唔係見到有人叫，我都唔知有…座位另一邊有飲品區，提供汽水，咖啡，果茶。旁邊有生果大雪櫃，原個蘋果之外，有切粒水果。之後有Movenpick雪糕櫃，八款口味任君選擇。最後重點係甜品櫃，賣相真係幾靚，仲有Kit Kat主題甜品，同時提供原條Kit Kat朱古力放題，不過我最愛個意大利芝士大福，煙韌軟心又唔會太甜。還有個即製榴櫣班戟，我就唔太喜好。