影片
更多
2023-12-10
31 瀏覽
山 Yama📍銅鑼灣耀華街38號The Zing!15樓今年5月，我同朋友到訪一間好有格調嘅おまかせ日式餐廳食午飯，佢哋嘅出品優質、擺盤有氣勢，無論係為打卡定係為食好嘢都可以食得好滿足。適逢朋友生日，加上山推出咗唔少新菜式，所以我決定book平日晚上，同朋友好好慶祝生日。我好開心朋友好滿意呢餐生日飯嘅安排，除咗要多謝自己揀到一間佢鍾意食日本菜同佢慶祝外，更要多謝餐廳嘅配合同安排驚喜！餐廳用心安排嘅生日set有齊靚靚水晶音樂球、生日賀卡同一隻精美嘅山形玻璃杯做禮物，自問如果係我自己準備，一定無咁有心思！二訪山後，最大嘅感覺就係呢間餐廳環境好、服務質素高，店員們都非常貼心同熟悉餐點嘅特色。當晚有好幾檯嘅食客都係專程嚟食飯慶生，相信無論環境、食物定係餐廳嘅安排都會令壽星仔女感難忘。今次嘅食評分咗上下兩篇，上篇主要分享前菜及主菜，下篇則重點介紹甜品、湯品及餐飲。 💰$788山の冬 🦀我幫朋友安排咗山の冬呢個套餐，除咗因為被近期社交平台posts燒到外，就係因為我呢位朋友係愛蟹之人，睇過menu後就知佢實會鍾意。先付け 🍱前菜三點喺用一個好精緻嘅半透明木箱裝碟，箱底鋪滿小石春，仲有迷你亭子裝飾，
📍銅鑼灣耀華街38號The Zing!15樓
今年5月，我同朋友到訪一間好有格調嘅おまかせ日式餐廳食午飯，佢哋嘅出品優質、擺盤有氣勢，無論係為打卡定係為食好嘢都可以食得好滿足。
適逢朋友生日，加上山推出咗唔少新菜式，所以我決定book平日晚上，同朋友好好慶祝生日。我好開心朋友好滿意呢餐生日飯嘅安排，除咗要多謝自己揀到一間佢鍾意食日本菜同佢慶祝外，更要多謝餐廳嘅配合同安排驚喜！餐廳用心安排嘅生日set有齊靚靚水晶音樂球、生日賀卡同一隻精美嘅山形玻璃杯做禮物，自問如果係我自己準備，一定無咁有心思！
二訪山後，最大嘅感覺就係呢間餐廳環境好、服務質素高，店員們都非常貼心同熟悉餐點嘅特色。當晚有好幾檯嘅食客都係專程嚟食飯慶生，相信無論環境、食物定係餐廳嘅安排都會令壽星仔女感難忘。
今次嘅食評分咗上下兩篇，上篇主要分享前菜及主菜，下篇則重點介紹甜品、湯品及餐飲。
[價錢 Price]
💰$788
山の冬 🦀
我幫朋友安排咗山の冬呢個套餐，除咗因為被近期社交平台posts燒到外，就係因為我呢位朋友係愛蟹之人，睇過menu後就知佢實會鍾意。
先付け 🍱
前菜三點喺用一個好精緻嘅半透明木箱裝碟，箱底鋪滿小石春，仲有迷你亭子裝飾，同山嘅氛圍互相呼應。打開蓋後，仙氣四溢，彷彿打開咗寶盒，見到令人垂涎嘅前菜：蟹粉帶子、小天婦羅、日式漬甜茄。
蟹粉帶子 🦀🐚
店員推介由左至右嘅次序進食，蟹粉帶子鮮甜厚肉，輕輕火炙過嘅表面變得焦香，再喺表面淋上金金黃黃嘅蟹粉，食後齒頰留香，愛食貝類同蟹嘅朋友必試。
小天婦羅 🍤
中間嘅係小天婦羅蝦，話就話係小天婦羅，但蝦嘅size一啲都唔細，蝦肉爽口彈牙，炸漿更唔會過厚過油，相當美味。
日式漬甜茄 🍅
三款前菜中賣相最普通嘅係嘅日式漬甜茄，唔怕話你知，其實我真係好怕食蕃茄仔，每次諗起咬開後嗰陣草青味同腥味都感到怕怕，一直唔明點解會有人當小食食。但估唔到呢款漬甜茄可以令我改觀，更令我忍唔住講咗句：「如果以後食嘅蕃茄仔都係呢種味，我一定日日都食佢！」，朋友聽罷就志氣高昂咁話：「好，咁等我努力研究，以後就整呢隻味嘅蕃茄仔俾你食！」。
到底呢道漬甜茄係點奪取我嘅歡心呢？答案就係陳皮！我哋從來未食過咁開胃嘅蕃茄仔，一入口雖然同樣爆汁，但散發出嚟嘅係好清香嘅陳皮味。蕃茄仔嘅口感，陳皮嘅香味，兩者夾到不得了，就係咁獨特嘅味道令我哋一試愛上！
お造り 🍣
法式拖羅 🐟
識我嘅都知我唔太好食吞拿魚，因為佢嘅中伏機會都幾高，唔係有筋，就係啲肉好霉好腥，但山呢道法式拖羅再一次令我愛上食吞拿魚。
擺盤唔洗多講，同樣係仙氣滿滿，喺樹葉形嘅碟上放上一件油脂豐厚嘅法式拖羅。店員推薦用紫菜卷住紫蘇葉同拖羅一齊食，經炙燒後嘅拖羅充滿油香，焦香嘅表面令口感同香氣昇華，拖羅近乎入口即溶，食盡魚脂同魚油嘅鮮味，味道非凡！
燒物 🍢
A4宮崎牛厚燒 🥩
朋友一人獨享呢度牛料理，A4宮崎牛必須趁熱食，牛肉汁多有韌勁，牛味濃郁。醬汁用咗聖護院蕪菁同牛肝菌調製而成，搭配蒜片一齊食，令人回味無窮。
鍋物 🍲
松葉蟹腳龜甲鍋 🦀
重頭戲之一嘅松葉蟹腳龜甲鍋都無令我哋失望，松葉蟹腳肉質鮮嫩，處理蟹腳嘅方法便利食用，唔怕失儀。鍋內有大量蔬菜同菇類，小火爐既能保溫，又能煮出菜蔬嘅精華，令原本清甜嘅湯底味道變得更豐富。
お食事 🍚
蟹粉烏冬 🍜
山の冬另一重點當然係蟹粉烏冬啦，食呢道主食時更顯餐廳嘅細膩，蟹肉烏冬同蟹粉係分開上嘅，蟹粉有用火㷫住，建議先食原味，再按自己口味加入醋作調味，食得非常講究。
烏冬偏幼，口感滑溜，加入蟹粉同醋一齊食，係頂級滋味。三款唔同年份嘅醋味道各有千秋，朋友鍾意偏酸嘅三年醋，我就鍾意甜嘅十年以上醋。無論係加邊一種醋，味道都比淨食原味好食，大家預必試試。
張貼
