Rempah Noodles 📍灣仔軒尼詩道18號地舖 朋友經常放工由金鐘行過嚟灣仔搵我食飯，真係辛苦佢啦，今次我想佢行少啲，所以同佢去咗一間留意咗好耐嘅新加坡餐廳食晚飯。我哋行經呢間Rempah Noodles多次，每次都見裡面座無虛席，午市時間仲大排長龍，遲遲都未的起到心肝去食。 呢日平日嘅晚上，我哋好幸運地唔洗排隊就有得入座。店員安排我哋坐係店舖中央嘅大長方檯，並親切地話俾我哋知檯底設有掛勾，方便食客放置個人物品。仔細一睇，原來檯面上有貼上藍色圓形貼紙，咁樣就唔洗盲摸摸咁搵個勾喺邊，設計實用、貼心又美觀！ 餐廳裝潢簡約，主要採用黑白兩色為主，黑白格仔地板最為搶眼。向街嘅座位前裝咗可以打開嘅玻璃窗，加上open kitchen，令空間感增加，放置少量植物同多件富懷舊風情嘅擺設，令整體感慨非常舒適，營造獨特嘅復古風。 除咗裝修特別，供應嘅餐點亦係其特別之處。有別於新加坡大部分餐廳，供應各式各樣多元化嘅美食，呢間麵店只提供三款麵食，專門程度可以媲美日式拉麵店。店名Rempah係香料膽嘅馬拉文，象徵住每一款供應嘅麵食，都用咗獨特嘅香料膽炮製，做出味道香濃嘅娘惹風味。 [價錢 Price] 💰$115 優質蝦麵 🦐 廚師將蝦頭蝦殼落鑊炒香，混入豬骨湯，花上5小時慢火熬製出蝦麵嘅湯底。麵底係摻摻（雞蛋麵+米粉），蝦湯湯底色水偏深，味道偏甜，蝦味芬芳。蝦麵配料非常豐富，有切片鮮蝦、caramalised onion、炆豬腩肉、菜、豆芽同自家製豬油渣。 不得不承認，佢嘅豬油渣真係香而不膩，最重要係無油膉味，好抵讚。不過可能因為我唔太鍾意食摻摻（因為唔鍾意粗幼麵口感硬度不一嘅感覺），同埋的洋蔥碎浸住湯好快淋晒，所以影響咗整體嘅食用感。可能只係我個人口味問題，朋友話好食，講嘅時候仲不忘飲幾啖湯，所以我認為口味嘅嘢，真係見仁見智。 [價錢 Price] 💰$115 娘惹厚濃叻沙 🥘 我叫嘅叻沙最吸引人嘅地方，就係個橙橙黃黃嘅靚湯底。廚師選用南薑、黃薑、乾葱等近十種香料，人手炒香後，加入香味濃郁嘅椰漿同以雞骨豬骨熬製嘅湯底，飲落鮮甜帶微辣嘅後勁，淨係個湯都咁足料咁有心機，未食麵都已經好滿意。 麵底用上我至愛嘅粗身米線，索湯力不比米粉差。配料有切片鮮蝦、魚餅、雞絲、半隻蛋、豆卜同豆芽。蝦肉同樣彈牙、雞絲出奇地嫩滑、芽菜新鮮爽口無臭青味、豆卜吸滿湯汁...最重要係所有配菜都比較淡口，配濃香無比嘅叻沙湯底食，就最適合不過。 [價錢 Price] 💰$45 咖央多士 🍞 點完兩款麵食之後，店員主動推介咖央多士，問會唔會想試下。因為見價錢唔算太平，所以想考慮下先。我同佢食咗幾啖麵之後，對餐廳出品有信心，唔洗諗就決定要試埋個多士。 對上一次食咖央多士，無記錯係朋友去食南洋嘢打包俾我嘅，雖然味道都唔錯，但始終食唔返兒時嘅味道。講返今餐，一上檯見到4件多士堆成一座小塔，放喺傳統瓷碟上，造型有趣搶眼。 多士烘得香脆無比，咖央醬絲滑香甜，外熱內冷嘅感覺正到無朋友。咁有驚喜嘅甜品，好彩我哋有叫到嚟食，因為個人認為佢比兩款麵食更出色、更好味。

樂酒場 がくさかば GAKU HALL 📍尖沙咀白蘭軒道1號麗東大廈地下H & J號舖及閣樓 上篇都已經咁豐富，下篇又點可以失禮？本篇將會介紹樂酒場嘅signature dishes，兩款都係超おすすめ嘅菜式，用上餐廳自慢(引以為傲)嘅刺身片，新鮮味美，事不宜遲，立即分享！ [價錢 Price] 💰$138 サンモン寿司ごぼれ 🍣 朋友食呢道菜嘅時候講咗啲幾有道理嘅評論，令我決意引用佢嘅說法，介紹呢道賣相同味道都咁出色嘅三文魚層層疊。佢話：「香港人咁鍾意食三文魚，但嚟嚟去去嘅變化都唔大，每次食落口感同味道都差不多。但呢度唔單止有得睇表演，食落口感仲咁豐富，能夠將料理方式一成不變嘅菜式整得獨一無二，呢點一定要讚下。」 話有表演睇嘅原因，係因為店員會將整呢道菜式嘅食材分成小碟上檯，同時端上一隻類像冰柱、冰塊嘅碟，準備喺客人面前料理。半透明嘅碟上整齊地排左6件青瓜絲小卷，喺上面密密麻麻地放上一條又一條長長嘅三文魚刺身，平均地鋪好鋪平後，再喺上面蓋上一片芝士，繼而倒上滿滿嘅蟹籽同蔥花，加埋師傅自家調製嘅特別醬汁，三文魚層層疊，完成！ 現在開始係Showtime！店員用火槍細心炙燒三文魚層層疊嘅表面，熱力令芝士溶化，焦香芝味四溢；三文魚刺身條油分充足，燒過後魚油更為濃香，味道賣相都一流。因為小卷選用非常清新嘅青瓜絲做餡，所以食多兩件都唔怕膩！ 講返朋友嘅評論，幾乎每間日本嘢都有得食呢幾類食材，組合同配搭亦好相似，但樂酒場嘅呢種風味真係未食過，而且仲好睇得，價錢又唔貴，大家嚟到必定要叫返碟！ [價錢 Price] 💰$328 迷の刀 五雕刺身盛リ 另一招牌推介係有5種新鮮刺身嘅盛合，今晚我哋就食咗油甘魚、帶子、三文魚、甜蝦同吞拿魚，仲有些少三文魚籽作點綴，整道菜式猶如畫作一般，盛載嘅碟亦配過顏色，睇到師傅嘅心思。除咗顏色鮮艷搶眼外，擺盤都好有心機，切去蝦頭，將蝦身捲起，造型感十足。片片三文魚刺身亦有捲成玫瑰花狀，彷彿同旁邊嘅食用花爭艷鬥麗。其餘嘅刺身就按顏色分類擺放，紅綠／黃白相間，繽紛，不失和諧感、平衡感。刺身肉質細嫩，油份豐富，儘管唔係厚切都食得好滿足。

樂酒場 がくさかば GAKU HALL 📍尖沙咀白蘭軒道1號麗東大廈地下H & J號舖及閣樓 我同朋友今年未必夾到假去日本，睇見個個都食日本嘢，又刺身又串燒咁，我哋啲日食癮又返晒嚟。既然無得飛去日本食，索性喺香港食返餐好嘅，一止口癮。 之前喺尖沙咀覓食時發掘到一間昭和風嘅日本餐廳，由裝修至料理款式都滿滿和風，餐牌有齊中文、英文、日文，部分菜式仲搞鬼哋有日文拼音嘅普通話添，老闆用心設計餐牌呢點好值得欣賞！聽住日文歌，坐住和席たたみ，牆身貼滿大量和風海報同打卡able嘅燈牌，真係有啲似置身日本居酒屋！ 因為我哋叫下叫下叫多咗，而且每道菜都好值得介紹，所以分開咗兩篇同大家分享。上篇先為大家介紹焼き物、卵料理、サラダ、ドリンク同逸品—おでん！ [價錢 Price] 💰$30 手羽先 🐓 一本雞翼有兩隻，燒前經已細心處理，將兩端骨頭嘅接口斬開，食用時更方便，仍可保持儀態。雞翼用鹽同醬汁輕輕調味，已經好滋味，雞皮烤得脆口，建議喺食用前唧上鮮檸檬汁，有助味道昇華！ [價錢 Price] 💰$52 ズッキーニの豚バラ串焼き 🐖 我哋另外亦都點咗一品二本嘅西葫蘆豚肉串 ，薄切豚肉表皮烤得香脆，食落有少少甜滋滋。中間卷住嘅翠玉瓜好爽口，未試過呢個配搭，估唔到又幾夾喎。而且有兩串共6粒，都算經濟實惠！ [價錢 Price] 💰$68 アボカドの山葵 🥑 牛油果山葵漬簡直就係為我同朋友而設嘅一度前菜，因為我哋兩個真係超級鍾意食牛油果，而且平時喺屋企食嘅時候，都會加豉油再加wasabi一齊食，口感就好似食緊素食版嘅三文魚咁。不過必須要承認，平時嘅豉油都偏鹹偏重味，加埋攻鼻濃味嘅wasabi，有時真係會食唔到牛油果自身嘅味道。 但呢度前菜沙律就無呢個問題，佢嘅牛油果唔會熟到爛，係有一定硬度嘅情況底下切成薄片，用醬油浸至三份一，再喺牛油果表面倒上香蔥、wasabi、紫菜同芝麻，食法新穎，同時可以平衡到調味料同牛油果嘅鮮甜味，牛油果愛好者必點。 [價錢 Price] 💰$68 明太子入り厚焼き玉子 🍳 上篇介紹嘅食物同飲品裏面，我同朋友嘅首選必定係呢道明太子醬厚燒玉子！之前都有講過明太子同玉子燒基本上係居酒屋定番嘅組合，所以都比較難做到有特色，變化亦唔會好大。但呢度真係比到我哋驚喜！相信大家同我哋一樣都係第一次見到三角柱形狀嘅厚燒玉子燒，而且啲明太子醬仲係包裹咗喺裏面，打橫咁睇成條三角朱古力咁，造型可愛獨特！ 重點係佢好睇之餘，真係好好食！佢哋玉子燒保持到濕潤，口感鬆軟嫩滑，明太子醬嘅鹹度亦適中，整到菜基本上無一點可以挑剔，果然越用心做看似簡單嘅菜式，就越能令人留下深刻印象。以後諗起樂酒場，我哋一定會記得呢度咁令人難忘嘅三角明太子醬玉子燒！ [價錢 Price] 💰$84 (不加配薄餅 $68) 蟹と蟹みそ殼焼き 🦀 朋友同我都係出晒名嘅愛蟹之人，嚟都專門食海鮮嘅樂酒場，又點可以唔試試佢嘅蟹味噌甲羅燒？如果唔加配薄餅的話，價錢會比較平一啲，但我哋覺得就咁食會好寡同好膩，所以加配咗薄餅沾嚟食。薄餅烤得好乾身，每一片其實都好薄好迷你，食多一兩件都唔怕佔咗個胃好多位置，而且將滿滿嘅蟹味噌放上去，一啖食落去就更加滿足！ 呢度嘅蟹味噌甲羅燒多咗蟹籽，所以入口除咗食到濃郁嘅蟹鮮味，口感亦富有層次。甲羅燒即燒即上檯，醇香嘅蟹味撲鼻而嚟，好睇又好食。 [價錢 Price] 💰$108 おでん盛り合わせ 🍢 提到香港人嘅comfort food，應該離不開燒賣魚蛋呢啲平民小食；而數到日本人嘅comfort food，話係關東煮相信都無人會反對。關東煮可謂貼地嘅日本國民美食之一，普遍程度係隨便走入一間便利店就會買到嚟食。今晚食到賣相吸睛、味道純樸嘅關東煮，感受到去正宗日本滋味，令我哋身心靈都好滿足。 招牌關東煮嘅材料豐富，我相信師傅會隨着當日食材調整內容。我哋呢個拼盤有烚雞蛋、大根、蒟蒻、雞肉、腐皮布袋、豆卜、秋葵，數下數下都已經有七樣啦！食材放喺湯內烹煮，可以吸滿清甜嘅湯底，如果喺冬天食到呢個熱辣辣嘅關東煮拼盤，一定暖入心頭！ 話佢造型吸睛係因為條大根有把刀插住咁連鍋上檯，輕輕用刀一切，就可以將大根切件，入口多汁、鮮甜、無渣、好味道！腐皮布袋內包滿日式年糕，煙煙韌韌，頗有驚喜。最特別應該就係加咗秋葵同雞肉，呢兩樣都唔係一般關東煮有嘅食材，清甜嘅湯底將兩種食材嘅原味道發揮得淋漓盡致。簡單嘅食材、簡單嘅味道，足以令人食得開心滿足，難怪會係招牌菜之一！ [價錢 Price] 💰$52 完熟マンゴーソーダ🥭 芒果梳打 我揀咗杯無酒精嘅清新飲品，提早感受夏天嘅氛圍。店員推介芒果味梳打，飲落無平時嗰種好假、好唔天然嘅芒果甜味。即使無落好多冰，溫度都keep到，又唔怕啲冰融溝淡咗杯嘢飲，喜歡解配食串燒時飲。 [價錢 Price] 💰$68 はちみつレモン カクテル 🍸 自家製蜂膠檸檬燒酌係人氣飲品之一，除咗因為自家製之外，飲品裏面仲有粒粒蜂膠，真係比較少見，夠晒特別！仲有唔算非常嗜酒，不過去到居酒屋，就多數會叫番一兩杯含酒精飲品輕鬆下。燒酌嘅味道好有層次，杯緣抹上一層鹽，加上先檸檬嘅清新，開胃得嚟好易入口，一個唔小心，飲完一杯就會再接一杯！

Dough Bros Pizza & Doughnuts 📍鰂魚涌海灣街4-6號嘉榮大廈地下7號舖 難得同朋友夾到時間聚會，大家都好有共識，寧願俾貴少少叫外賣速遞，都唔想嘥時間去餐廳排隊食飯。朋友話附近有間我想食好耐嘅連鎖pizza店，可以趁人多叫多幾款口味，難得一遇嘅機會，我當然有好好把握喇，所以我哋就叫晒Dough Bros最受歡迎嘅兩款食品──手工酸種pizza同爆醬冬甩。 [價錢 Price] 💰$385.2 (堂食價) 分享套餐 （2－4人）👨‍👩‍👧‍👦 呢個套餐包含兩款pizzas、三款dounuts同兩款飲品。 伏特加醬雞肉薄餅 🍕 第一款pizza我哋揀咗期間限定嘅伏特加醬雞肉薄餅，用上招牌手工酸種麵糰 ，搭配水牛芝士、雞肉、橄欖、甜椒、紅洋蔥同脆羅勒，打造成微辣濃香嘅pizza。 Dough Bros嘅pizzas最與別不同嘅地方，就係選用咗手工酸種麵糰製作餅底，打開盒蓋會聞到好輕微嘅酸氣，食落口後慢慢轉成甘甜味，口感豐盈有嚼口，唔會過乾過硬，的確好出色。 呢款口味各種配料份量平均，唔會有邊種食材特別出眾，就咁食個pizza會覺得普普通通，但一點咗佢嘅神級蒜蓉及香草醬，即刻好食到飛起，唔信嘅你自己試下！ 卡邦尼薄餅 🍕 另一款pizza由我發辦，我就梗係要試下啲特色嘢啦！我揀咗特色薄餅系列入面嘅Carbonara pizza，整個pizza有滿滿嘅Carbonara sauce、Mozzarella cheese、意式bacon、黃金蛋黃、Parmesan cheese、黑胡椒同新鮮Parsley，味道同一般嘅Carbonara差不多，但配pizza食，我就真係第一次啦！ 可能因為我本身就超級鍾意食Carbonara，所以我覺得呢款口味好好食，芝士香醇得嚟唔油膩，重口味人士仲可以用pizza crust點醬嚟食，簡直無得輸！ 爆醬冬甩 🍩 甜品方面，有大家都好期待嘅爆醬冬甩，當日有好幾款口味，朋友們想食最classic嘅nutella，而我就想試試比較少見嘅開心果白朱古力。 點講呢，雖然我係好鍾意食甜品，冬甩亦唔係我抗拒嘅嘢食，但呢款冬甩真係唔太啱我口味。首先，佢聲稱爆醬，望落都好似滿到咇晒出嚟，但其實入面嘅餡唔係好多，頂準係比一般有餡嘅冬甩多啲啲，已經係第一個失望位。 其次就係佢嘅口感同味道都無太大記憶點，外皮炸得唔夠喉咁，無沾到醬嘅內餡有少少乾同粉，表面嘅砂糖亦加唔到分。最後就係開心果白朱古力，無開心果味之餘，食真啲仲有陣酸酸哋嘅味道，希望唔係壞咗先係咁啦。 冬甩整體質素平平，但索價$38一件，真係唔多抵食。

Poke Go 📍灣仔汕頭街5-7號地舖 最近我同朋友少咗四圍覓食，食少咗多油多鹽嘅街外嘢，就連今年嘅情人節，都選擇咗比較健康嘅素食，原因係我哋都想食得健康一啲。呢晚放工，我同朋友喺廈門街同汕頭街搵食，無意中發現一間主打食poke bowl嘅餐廳，店內近乎客滿，吸引咗從未食過poke嘅我一試。 甫坐下，店主就親切哋問我哋係咪首次光顧，然後向我哋介紹兩種餐點叫法同分別。佢推介初嚐poke bowl嘅食客點signature bowl食，因為6款主打嘅signature都係餐廳精心調配，為最新鮮嘅食材配上最合適嘅配搭。 當然，如果想更有自由度，可以由main protein到dressing都自己一手一腳挑選，合共接近40種食材可供選擇，食客可以按個人喜好mix and match，而且價錢豐儉由人，照顧到唔同飲食習慣同營養需要嘅人士。 [價錢 Price] 💰$128 NALU 🍱 朋友本身想食有吞拿魚嘅signature bowl，但當晚吞拿魚已售罄，所以佢揀咗食八爪魚。呢個組合入面有蕃茄仔、粒粒粟米、蟹棒沙律、和式青蔥。搭配嘅醬汁係辛味蛋黃醬，味道微辣醒胃，越食越勁，但因為怕太辣，所以就走咗辣椒碎。 呢個組合全部食材都一粒粒，所以口感非常豐富，八爪魚爽口帶些少嚼勁、蕃茄仔新鮮爆汁、粟米鮮甜可口，加上一大球蟹棒沙律，仲有半壽司飯同半珍珠糙飯，滿足感爆曬燈！ [價錢 Price] 💰$128 ONO 🍱 我選擇嘅signature bowl主要由三文魚、溫室青瓜、雞蛋絲同蟹棒沙律組成，base同樣可以揀一或者兩款。細食啲嘅我揀咗半壽司飯，半沙律菜嘅組合，營養均衡之餘，又唔怕淨食greens咁悶，配搭新穎、自由度好高。再喺大大碗poke上淋上秘製果仁芝麻醬（more sauce）同灑上香脆芝麻，滋味滿分！ 幾種配料配搭得好好，整體口感清新不油膩；肥美嘅厚切三文魚粒混上nutty sauce，表面沾滿蛋絲同芝麻，口感同味道均具層次感，係ONO嘅特色之一。其次就係新鮮爽口嘅沙律菜同溫室青瓜，水份爆滿，食後非常清爽。半飯半菜嘅完美組合，絕對係關注健康但又唔想放棄美食嘅人嘅恩物，大家必定要嚟試試！

那個ㄋㄚˋ ㄍㄜ˙ NAGE Taiwanese Cuisine 📍大角咀埃華街116-118號地下8A號舖 呢晚放工，我同朋友又去咗旺角睇開倉，點知再次無任何收穫，失望嘅我正準備講想返屋企嘅時候，朋友帶咗我行好遠好遠嘅話搵食，話附近佢收藏咗好幾間餐廳，想同我一齊食下。 行下行下，我哋嚟到大角咀，搵咗一間又一間佢bookmark咗嘅餐廳，每間都爆滿排長龍，我心情就越嚟越差，行到好攰於是我有對佢發少少脾氣。不過好彩朋友非常包容我，無嬲我發忟外，仲帶我食好嘢，所以我要喺度同佢講多謝。 嚟到人氣高企嘅那個，同樣店外排晒隊，但見到門口貼住三月底結業嘅公告，我即刻收返晒啲脾氣，唔想辜負朋友一片苦心，喺結業前帶我一嚐人氣旺盛嘅那個便當。 餐廳價錢佛心，餐品足料上盛，相信係吸引食客嘅主要原因。其中，又以外賣大杯裝手搖只賣$10最為吸引，價錢同品質方面的確無得彈。不過唔知係唔係生意太多，做到員工都有少少脾氣，所以見佢哋對某啲食客嘅態度唔太友善。明白忙起上嚟就容易燥底，但如果能提升服務態度，相信大家都會開心啲。 提提大家，餐廳只收現金，想過嚟食記得袋定啲cash啦。 [價錢 Price] 💰$68 那個滷排骨便當 🐖🍱 我嚟之前只係聽過foodie朋友們提過，話呢間餐廳好受歡迎，經常大排長龍，但一直無研究過有咩招牌菜。落單時，因為唔想食太炸太熱氣嘅嘢食，所以我揀咗滷排骨便當。等上餐嘅時候先search到，原來係呢度人氣no.1嘅餐品！ 見到嗎大家？塊排骨唔單看大過個碗，仲大過我塊面，上檯時仲見到啲醬汁咋咋下，未食都已經甚感驚喜。最重要係佢無偷工減料，即使大大塊都無刻意拷薄，有一定厚度。大大大排骨先炸至表皮脆口，再落鑊用帶甜味嘅醬汁覆蓋整塊排骨，表皮外脆內軟糯，的確幾好食。 便當有白菌粟米粒、味醬炒野菜、家常炒粉絲、玉子燒、甜酸菜等嘅配菜，份量足而且營養均衡，仲可以揀選飯量，性價比勁高！不過都有少少地方挑剔，大排骨食得過癮，但好快感到飽膩，而且近骨嘅位置唔易炸透，所以肉色有少少粉紅。 [價錢 Price] 💰$58 臺南蝦卷便當 🦐🍱 朋友比我更唔想食太炸太酥脆嘅嘢，所以佢揀咗臺南特色美食—蝦卷。我剛剛去嗰轉臺南都好想試下地道嘅蝦卷，可惜病咗食唔到，比較唔到兩者嘅分別。但總括而言，蝦卷口感爽口彈牙，表皮少少脆口，唔會過份油膩，亦有混入青豆等菜蔬，灑上椒鹽後，台味十足，都不失為一個好選擇！

Cappadocia Turkish Kebab 📍灣仔駱克道114-120號嘉洛商業大廈地下A號舖 提到土耳其，大家可能會諗起伊斯坦堡或安卡拉等嘅名字，因為前者係土耳其最大嘅城市，而後者就係首都，但相信更多人會聯想到滿天熱氣球嘅畫面，始終真係喺土耳其先可以見到咁嘅壯觀奇景。而最廣為人知嘅，應該就係卡帕多奇亞呢個地區啦。 朋友之前用佢媽咪趁假期去咗一轉土耳其，當然有到訪呢個勝地啦，佢仲食咗唔少地道土耳其美食，時不時都會講想再食土耳其菜。身為100分朋友嘅我，當然要搵返間水準唔錯又正宗嘅土耳其餐廳招呼佢啦，所以我就搵咗呢間係我公司附近以卡帕多奇亞命名嘅餐廳，約咗佢放工後去回味一下土耳其食物嘅滋味。 甫進入餐廳，就見到富有土耳其特色嘅裝修同擺設，好似馬賽克掛燈、景色優美嘅風景照、土耳其球衣等，播埋土耳其歌曲，彷彿置身土耳其。餐廳由土耳其夫婦用心經營，嚴選未經雪藏過嘅新鮮肉類製作餐品，又以環保餐具器皿盛載食物，可見其細心同用心。 [價錢 Price] 💰$80 Lamb Kebab Wrap 🫔 嚟到呢到，當然要食人氣no.1嘅kebab wrap啦，我咁鍾意食羊肉，唔洗諗即刻揀好。友善嘅老闆主動同我哋分享，話羊肉係喺星期一開始醃製，醃足一日，不入凍櫃。醃料方面只係用咗olive oil、salt同black pepper調味，簡單調料就吊出新鮮羊肉嘅鮮味，食過齒頰留香，愛羊之人必點！ 餅皮質地偏軟唔乾身，但即使卷住咁多汁嘅羊肉都唔會淋晒，加上上餐前已切成兩份，食用方便。內裏包裹住嘅生菜亦好食，性價比高，亦能飽腹，吸引唔少人買嚟當lunch或dinner。 [價錢 Price] 💰$80 Lamb Kebab Bread 🍔 同樣夾有大量羊肉，麵包口感就脆口得多，而且包面灑有芝麻，咬落麵包時會聞到好香嘅芝麻味。包身偏薄，外脆內軟，夾住充滿肉汁嘅羊肉kebab、新鮮蕃茄片同塗滿特色醬汁，完勝burger！ 溫馨提示，羊肉包實在太多汁，建議大家影完相好快啲開餐，免得肉汁醬汁浸淋呢個咁好食嘅包！ [價錢 Price] 💰$70 Mix Kebab Rice 🍱 老闆娘話好多人都叫wrap同bread，但佢推介我哋食佢哋嘅kebab rice，所以我哋叫咗份mix meat一試。出奇地，佢哋無用較長較瘦嘅印度米做飯底，而係揀咗一般較飽滿嘅白米去煮，所以白飯可以吸盡烤肉嘅肉汁，滋味非常。 Mix Kebab有羊肉同雞肉，羊肉同上面嘅口感味道一樣，但肉汁更多，羊肉味更突出；至於雞肉脂肪比例較少，雞味唔算濃但肉唔會乾柴，以簡單調味醃製後，味道恰到好處。Kebab上唧滿特色醬汁，食次攪拌一下，將碎肉、肉汁、油份同醬汁混合米飯，啖啖滿足。 朋友一向注重均衡飲食，佢好欣賞伴碟嘅沙律菜，認為新鮮蔬菜能平衝營養需要，當中部份菜類略帶酸味，則能中和肉飯嘅油膩感，整體味道出色，推介各位一試。 [價錢 Price] 💰$50 Humus Turkish Pita Bread 🫓 朋友分享，話佢去到土耳其食嘅每餐飯，幾乎都會見到humus嘅身形。佢認為如果要體驗正宗土耳其料理，就必須要叫返份嚟試。我自己去北歐嘅時候，當地人有帶我去摘自家種植嘅chickpeas，然後手把手咁教我整humus。就係嗰次體驗，我知道呢款dip天然健康，唔洗加太多調味就已經好好食。 呢間餐廳主打homemade同用天然食材製作食物，所以呢款humus都係老闆一手一腳調製，加入olive oil後口感變得特別幼滑，chickpeas味道濃厚，即使係素食都可以食得好滿足。 相比起lamb bread用嘅麵包，我更鍾意呢款pita bread。佢比我食過嘅pita bread鬆軟厚身，橫直相間嘅條紋令麵包受熱均勻，表面烤至微焦，聞落麥味濃香，配humus食為之一絕！

究極堂 Kyukyoku Do 📍 (永光中心) (銅鑼灣) 銅鑼灣登龍街28號永光中心11樓 兩年前嘅3月14，我認識咗經常喺我食評入面被提及嘅「朋友」，2024年嘅3月14，係我哋相識兩周年嘅紀念日，所以我決定帶佢去食佢最近成日話想食嘅魚生飯，慶祝呢個大日子。 講到我哋鄰近美食匯聚嘅地區，絕對非銅鑼灣莫屬。之前去過登龍街幾次搵食，都留下唔錯嘅印象，今次我就book咗位於永光中心11樓嘅究極堂。仲有幸坐到朋友最愛坐嘅吧檯，邊食邊欣賞窗外嘅街景同師傅認真料理。 餐廳嘅裝修好有格調，唔似一般打住和風旗號嘅餐廳裝修咁俗氣，偏暗嘅環境配上暖色系燈光，都幾浪漫。呢度環境同座位舒適，非常適合約會、三五知己小聚或者同一大班朋友搞聚會，仲可以book VIP房，而且炮台山都有分店，如果早啲知，之前就唔洗為諗去邊搞gathering咁頭痕啦！ [價錢 Price] 💰$218 究極丼 🍱 入正題，同大家介紹下今晚嘅主角── 究極丼！淨係睇相都見到呢碗海鮮丼有幾足料啦，師傅選用赤醋飯做飯底，酸度柔和易入口，配新鮮海產食，簡直一流。加入赤醋後嘅米飯味道比一般白飯香醇，加上香口味濃嘅飯素同食到中段拌入嘅醬油漬蛋黃，整碗丼飯口感順滑，味道極佳。 咁正嘅飯底，當然要配返同樣高質嘅刺身嚟食先啱啦，係飯面上鋪滿咗各式各樣新鮮刺身，包括：油甘魚、三文魚、赤海蝦、海膽、帆立貝、三文魚子、吞拿魚蓉、炙燒右口魚邊同紫菜天婦羅，食材新鮮豐盛，刺身款款足料厚切，大部分都有兩件，同朋友開心share嚟食，比我自己獨食更開心。各款食材各有千秋，每款都鮮甜可口，無一款可以挑剔，但要數到最鍾意嘅，肯定就係巨型赤海蝦！蝦肉味道鮮甜，肉質彈牙不在話下，蝦頭內嘅蝦膏出乎意料外甘甜，毫無腥味，朋友鐘意到吸晒兩隻蝦嘅蝦頭膏，可惜到佢合上雙眼品嚐口中鮮味餘韻。 淨係呢個究極丼已經值得攞5粒星，真材實料高品質，難怪會成為招牌菜。 [價錢 Price] 💰$58 明太子芝士焗炸豆腐 🍳 明太子芝士玉子燒食過好多次，味道間間大同小異，無咩驚喜。我哋睇餐牌時，發現除咗一般日式菜式外，餐廳好有創意哋研發唔同fusion菜式，例如麻婆咖喱芝士pizza、韓式鐵板雞頸肉、大赤蝦烤芝士牛肉卷等。其實樣樣我哋都想試，但無奈個肚無咁多位，所以就揀咗明太子芝士焗炸豆腐。 將口感滑溜嘅硬身豆腐原塊油炸後，喺表面塗上大量明太子同鋪滿芝士，放上小鐵鍋入爐烤焗，表面香脆充滿芝士芳香，內裏濃香滑溜，正！ [價錢 Price] 💰$118 黑松露牛油果軟殻蟹卷 🥑🦀🍣 呢款卷物包含晒我哋最鍾意嘅食材：牛油果、黑松露、軟殻蟹同蟹肉。雖然要擘到個口好大啖咁食係有啲尷尬，但大家務必要一啖完整咁食，因為咁先食到各種食材嘅完美配搭！ 黑松露同蟹肉一向係perfect match，而另一pair好夾嘅就係軟殻蟹同牛油果，當兩樣咁match嘅組合撞埋一齊，口感同味道夾上夾，再沾上四色芝麻飯素，格外滋味！ [價錢 Price] 💰$58 脆炸三文魚皮 🐟 呢種三文魚皮好特別，上面保留咗部分細鱗，炸起後異常香脆，每啖咬落都脆卜卜。魚皮顏色偏白，本身自帶魚鮮味，點少少七味蛋醬就已經好好味。 [價錢 Price] 💰$23 半熟玉子 🥚 佢哋有一系列嘅炸串，由常見嘅雞肉串到新機嘅芝士咖喱飯卷串都有提供，創意滿分。我同朋友不約而同地想試下佢哋嘅炸半熟玉子，估唔到佢哋嘅炸蛋真係做到半熟半流心嘅效果，而且無沾上大量炸粉，所以食落無一般炸物嘅油膩感，蛋黃味道濃香，大家不妨一試。 [價錢 Price] 💰$48 煉乳草莓雪葩 🍓 我哋千挑萬選揀咗煉乳草莓雪葩做今餐收尾嘅甜品，三粒紅卜卜嘅草莓，雪凍至結冰後磨成沙冰，再唧上香甜嘅煉乳，簡直絕配。呢款雪葩同食開嘅唔同，有別於傳統做法將草莓打成果蓉，反而將部分果肉挖走，再以煉乳填滿空缺，食落味道清甜冰爽，而且糖份含量仲比雪糕低，好睇、好食又健康！

鬼金棒 Kikanbo 📍尖沙咀金馬倫道20號地舖 又一次去尖沙咀睇牙覆診，搞掂都已經接近7點半，返工返到好攰嘅我哋都想快啲食完晚飯，所以就決定食我哋至愛嘅「快餐」—拉麵！附近嘅拉麵店我哋都未食過，心怕會伏嘅我哋以9秒9嘅速度，衝去食過一次嘅鬼金棒，希望可以趕喺客滿前入座。 事實證明我哋嘅策略係成功嘅，坐低無耐就開始不停入客，幸好我哋有加快腳步，先可以坐得舒舒服服咁食個快飯！ [價錢 Price] 💰$115 芫荽辣麻味噌拉麵 🍜 因為怕太辣頂唔順，所以上次我嚟到好傻咁叫咗碗走麻走辣嘅拉麵，後來先知咁樣食好浪費quota，因為唔食辣同麻，根本食唔到鬼金棒嘅精髓。 所以今次我要一雪前恥，叫返碗小辣小麻，加埋芫荽，食盡佢哋嘅招牌口味！睇相都見到，成個拉麵碗都被滿滿嘅芫荽覆蓋，連五花厚叉燒都被埋沒，份量真係驚人！話說我同朋友都唔係芫荽大fans，但我哋都唔討厭食芫荽，仲不約而同地覺得佢嘅香氣好獨特，配搭唔同食材、唔同菜式都可以有唔同發揮，令食物味道昇華。 加咗咁多芫荽落拉麵度，多多少少湯底都有沾上芫荽嘅清香，湯底本身嘅味噌味唔算重，但蒜香撲鼻，再加上辣麻兩種重口味調料，湯底濃而不油，多飲幾啖都唔怕膩。粗身帶麥香嘅麵條就煙煙韌韌，浸耐咗都唔會淋晒，掛湯力十足。 我覺得芫荽索湯後，食落好似一般蔬菜，所以叫呢款嚟食有比較健康嘅感覺，各方面都比較平均，推介大家一戰！ [價錢 Price] 💰$105 辣麻肉碎拌麵 🍜 朋友今次想試下拌麵，同樣揀咗小辣小麻，一上檯就聞到香料嘅芬芳，賣相都好吸引呀！拌麵嘅麵質同拉麵大同小異，而且一樣有齊芽菜、玉米筍、蔥花等，不過就以較香口嘅炒肉碎取代咗較油膩嘅叉燒。我哋會推介呢款拌麵俾鍾意食濃味嘅朋友，因為佢嘅辣味突出，麻感明顯，配上特製辣麻醬汁同用心熬製嘅湯汁，整個麵層次分明，食材嘅口感同味道都異常地夾。 食到最尾嘅肉碎、配料同醬汁我哋撈埋飯食，一啲都無浪費，一麵兩食，抵食又新奇！ [價錢 Price] 💰$45 肉飯 🍚 雖然賣相同拉麵叉燒差不多，但呢塊肉嘅口感同味道都略勝一籌。由於肉塊未有浸泡喺麵湯內，所以醬汁味相對濃郁，肉汁亦相對較多。肉塊肥瘦相間，瘦肉部分唔會乾柴，肥肉口感Q彈，雖然未至於入口即化，但油膩感唔明顯，怕食脂肪嘅人必試！ 白飯底用上口感煙韌嘅珍珠米，淋上醬汁、曬上香蔥，又一道美味嘅主食。 [價錢 Price] 💰$15 味玉 🥚 每次嚟到都必食佢哋嘅味玉，由於選用日本產嘅靚蛋，所以蛋味濃香、蛋黃色澤亮麗。煮至半熟狀態，筷子輕輕施力就可以將味玉輕鬆分開，橙紅色嘅蛋黃無論撈麵定配飯都一樣滋味。

莆田 Putien 📍元朗元龍街9號形點一期2樓2040號舖 踏入三月，又到咗莆田海蠣節啦，闊別一年，今次嘅海蠣節有增添唔少菜式。而因為上年帶唔到老爸嚟，今年一定要俾佢一嘗海蠣嘅滋味！ [價錢 Price] 💰$228/2道 九層塔香燘海蠣 🦪 為今餐打響頭炮嘅係2022好評滿滿嘅九層塔香燜海蠣，鮮嫩嘅海蠣配上香味獨特嘅九層塔，風味十足。新鮮嘅九層塔經過砂鍋熱力細火乾燜，香氣完全滲入到每粒海蠣裡面，再淋上特調醬汁燜製，令鮮海蠣食落粒粒甘香。溫馨提示，記得要趁熱食，咁先食到最香最好味嘅海蠣！ 黑松露海蠣燒豆麵 🍜 第二道菜，都係老爸挑選嘅，係海蠣節嘅新品──黑松露海蠣燒豆麵。呢道菜特別之處係佢以雲南野生嘅黑松露入饌，湯底再以濃郁嘅骨湯熬製，加入香菇燜至豆麵爽滑入味，啖啖都食到黑松露嘅芳香，海蠣嘅鮮甜，山海雙珍嘅味道發揮得淋漓盡致，一個不留神，就食晒整窩豆麵，飲晒整鍋湯，係全餐入面老爸最喜愛嘅一道菜。 [價錢 Price] 💰$138 砂鍋黃花魚湯 🍲 魚湯係我其中一款好鍾意飲嘅湯品，但要到煲到奶白色嘅魚湯並非易事。莆田選用佢哋嘅招牌香煎黃花魚煨火慢煲，配埋綿密充滿豆香嘅豆腐、蒜子同芫荽，再加上綿綿柔柔嘅芋頭，至燉到鮮甜奶白、老少咸宜嘅靚魚湯。 呢煲魚湯湯色乳白、黃花魚肉脆肉嫩、又以砂鍋盛載keep如溫度，整鍋湯非常鮮美。我必定會再叫嚟食。 [價錢 Price] 💰$48/片 椒鹽豬手 🐖 呢道菜係莆田10醉既其中一道，精選澳洲進口7寸豬前蹄，經8小時反覆烹煮嘅工序，將豬手嘅肥肉完全溶解，萃取佢自身嘅豐富膠原蛋白同膠質，非常適合愛美嘅女士們。味道方面，豬手用上獨特椒鹽配方調製，咬落啲筋煙煙靱靱，脂肪同肉香香糯糯，豬手表皮脆口，每人食一隻都唔會覺油膩。 [價錢 Price] 💰$48/位 酒香竹筒蝦 🦐 呢道菜喺竹筒上排上一隻大蝦，重達30g，色澤紅潤，肉質結實爽彈，造型古色古香，相當特別。師傅用上當歸老酒煨活蝦，除咗可以保留蝦肉嘅鮮嫩，仲可以熬出鮮甜帶微微酒香嘅湯底，整體味道清香、補而不燥。 [價錢 Price] 💰$68 冰鎮南日鮑 🐚 莆田嘅海鮮一向以新鮮味美見稱，而老爸亦好喜歡食鮑魚，所以我就自把自為，叫咗隻冰鎮鮑魚俾佢食。佢哋選用新鮮嘅6頭活鮑魚：喺北緯25度鮑魚黃金產區出產嘅南日鮑，因為係食天然海藻長大，所以鮑魚口感又Q又彈牙，味道非常鮮甜，大家記住一試。