影片
更多
2023-12-18
2583 瀏覽
小漁港海鮮舫 鮮蒸‧鮮味火鍋 Seafood Port Restaurant 📍太子荔枝角道127-133號地舖星期四晚，媽咪帶咗我妹去澳門，得返我同老爸食自己。既然機會難得，無理由食外賣咁頹嘅，於是我就帶咗老豆食海鮮大餐，實行有大食大，等佢哋隔住個海羡慕下！我會知道太子有呢間叫小漁港嘅餐廳，全因為我嘅識食好友介紹，佢食過之後讚口不絕，話性價比高，海鮮又新鮮，叫我bookmark定搵次去食。呢晚臨時臨急要搵餐廳，我就醒起可以帶老爸嚟呢度食，一嚟清蒸健康啲，二嚟又可以坐得耐，唔洗趕頭趕命食。呢間餐廳嘅店員姐姐們都非常好服務，即使座無虛席，忙到甩轆，佢哋依然好有禮貌咁介紹食材、又會不時check下個爐，主動招呼食客，服務一流！ 💰$68避風塘鮮魷 🦑主打海鮮嘅小漁港，除咗蒸氣火鍋外，最受歡迎嘅小菜必定要數到呢道避風塘仙遊。佢嘅炸粉唔會好厚，魷魚炸得剛剛好，爽脆唔韌，我自己最鍾意食魷魚鬚嘅位置。雖然睇落好多辣椒，但其實個椒鹽唔會好辣，反而好重蒜香味，係等海鮮蒸熟期間，可以邊食呢度人氣小菜，邊嘆住玻璃樽裝嘅飲料，唔使呆等。 💰$318/位是日廚師智選套餐 👨🏻🍳我哋揀咗呢一個比較優惠嘅套餐，
📍太子荔枝角道127-133號地舖
星期四晚，媽咪帶咗我妹去澳門，得返我同老爸食自己。既然機會難得，無理由食外賣咁頹嘅，於是我就帶咗老豆食海鮮大餐，實行有大食大，等佢哋隔住個海羡慕下！
我會知道太子有呢間叫小漁港嘅餐廳，全因為我嘅識食好友介紹，佢食過之後讚口不絕，話性價比高，海鮮又新鮮，叫我bookmark定搵次去食。呢晚臨時臨急要搵餐廳，我就醒起可以帶老爸嚟呢度食，一嚟清蒸健康啲，二嚟又可以坐得耐，唔洗趕頭趕命食。
呢間餐廳嘅店員姐姐們都非常好服務，即使座無虛席，忙到甩轆，佢哋依然好有禮貌咁介紹食材、又會不時check下個爐，主動招呼食客，服務一流！
[價錢 Price]
💰$68
避風塘鮮魷 🦑
主打海鮮嘅小漁港，除咗蒸氣火鍋外，最受歡迎嘅小菜必定要數到呢道避風塘仙遊。佢嘅炸粉唔會好厚，魷魚炸得剛剛好，爽脆唔韌，我自己最鍾意食魷魚鬚嘅位置。雖然睇落好多辣椒，但其實個椒鹽唔會好辣，反而好重蒜香味，係等海鮮蒸熟期間，可以邊食呢度人氣小菜，邊嘆住玻璃樽裝嘅飲料，唔使呆等。
[價錢 Price]
💰$318/位
是日廚師智選套餐 👨🏻🍳
我哋揀咗呢一個比較優惠嘅套餐，撞正星期一至四嚟食，一個價錢免加一、免茶芥、免小食，計落非常化算。雖然茶芥同小食都係免費嘅，但都唔馬虎㗎，一坐低就飲到熱辣辣嘅玄米茶，仲有好好味嘅蕎頭同炸黃豆，最啱一邊打牙骹一邊食。
刺身拼盤 🍣
我無諗過喺蒸氣海鮮店，都會食到咁新鮮嘅刺身㗎，品質真係令人有驚喜！刺身款式隨機，我哋呢份拼盤就有三文魚、北寄貝、希靈魚、帶子同油甘魚。五款刺身都非常新鮮，我自己比較喜歡三文魚同帶子，兩者都非常甘甜，質素可以媲美日本刺身專門店！
八款時令海鮮 🦀
食晒刺身之後，店員姐姐就會喺鍋底加入豬骨、生珍珠米、元貝仔同水，為煮粥底做好準備。之後佢哋會喺鍋上面放上唔同嘅食材去蒸，我哋嘅第一份食材係海鮮，有鮑魚、蒜蓉扇貝、馬友同埋大蝦，大火蒸7分鐘就食得。
新鮮鮑魚蒸起非常彈牙，鮑魚邊唔會蒸到韌晒；蒜蓉扇貝唔似一般酒樓嘅做法，不加一滴豉油蒸起即食，扇貝同樣唔會蒸到老晒，烹煮時間恰到好處；馬友魚係四款食材裏面最好食嘅一款，近肚嘅位置滿是魚油，店員姐姐提醒蒸起要第一時間食，因為咁就唔怕凍咗會有腥味；四隻大蝦都有我手板咁大，而且啲蝦肉結實彈牙，絕對新鮮。建議大家唔好點豉油，食下四款海鮮嘅原汁原味！
第二份海鮮主要係貝類，有蠔、蜆同螺。呢次蒸嘅時間就再短啲，短短5分鐘後就有得食。呢種蠔嘅殼係邊嘅，唔係一般本地蠔，肉身冇咁飽滿，但勝在無咩腥味同雜質；啲錢隻隻都大大隻，蜆肉鮮甜多汁；螺處理得好乾淨，不過食嘅時候就要花啲心機，慢慢用牙籤撩出嚟，好在有老爸幫我撩晒咋！
第三份海鮮係兩隻螃蟹，蒸咗12分鐘。其實一開始食蒸海鮮前，店員姐姐就已經將兩個蟹殼放咗喺鍋底度同啲生米一齊煮。呢兩隻蟹好多膏，而且肉質結實，蟹味濃郁，細心嘅老爸幫我將啲蟹多肉嘅地方剪晒落嚟，仲幫我拆肉添，抵我帶佢嚟食好嘢嘅！
時蔬主食 🥬🍜
主食方面，有蟲草花蒸雞配烏冬底，仲有好幾款嘅時令蔬菜一齊放喺荷葉上面蒸。店員姐姐話要蒸兩次，首次蒸咗10分鐘，煮散咗個烏冬之後再蒸多咗4分鐘，之後就有得食喇。蟲草花蒸雞將雞油迫晒出嚟，圍邊嘅蔬菜都吸收晒雞油精華。南瓜、芋頭、粟米、紫薯同蒜蓉勝瓜都索滿雞汁，芋頭同紫薯簡直無得輸！我亦都好鍾意放喺蒜蓉勝瓜上面嘅蝦乾，鹹鹹香香勁夾。
主角蟲草花蒸雞好嫩滑，雖然呢份雞肉偏肥，但同時雞嘅油脂都比較多，所以烏冬吸滿雞油嘅香味，意外地好食！
最後不得不提整餐嘅重點—集所有精華於一身嘅蟹膏豬骨粥。我哋喺熬粥嘅過程中額外加入四隻蝦頭，所以粥底充滿着蝦蟹嘅鮮甜味；鹹豬骨非常入味，元貝仔增加口感。喺整個煮嘅過程都無加一粒鹽去調味，靠嘅只係每份食材嘅原汁原味去調味，煮出一窩鮮甜美味嘅蟹膏豬骨粥！
張貼
