阿木台灣麵 (豉油街) (已搬遷) 新店位置

之前食過廣華街分店嘅阿木台灣麵，印象好好，知道佢喺豉油街都開咗新分店，所以去再食多次。我兩點左右去到，鋪頭都係坐滿，出面都排咗四五個人，等咗大概十幾分鐘左右就有位，舖面都唔細，裝修幾簡單精緻。 我叫咗一個麻辣半筋半肉牛肉麵，小食就叫咗炸大腸，嘢飲叫咗無糖珍珠奶茶。🍜🍜🥩牛肉麵黎到好大碗，麻辣味勁香，聞到已經食指大開，我試咗一啖湯，飲落帶微辣但好惹味。麵我加錢叫咗關廟麵，麵體偏粗，食落好有咬口，煙煙靭靭，而且好掛湯，所以食落 夠曬濃郁同埋麻，啱曬我呢種鍾意食辣嘅人。牛肉牛筋分量好多，牛肉係厚切嘅，好入味好腍，牛筋就滑捋捋，入口即溶。😋小食方面，炸大腸炸到好香脆，清潔得好乾淨，唔會有怪味，完全係外脆內軟，食曬都唔會覺得好油膩。🧋🧋珍珠奶茶屬正常水平，珍珠係偏淋嘅。整體嚟講好抵食呀，唔怪之得一直keep住咁多人排隊，下次經過冇咩人一定會再食。聽店員講阿木喺附近白布街開咗一間阿木生活百貨超市，我八卦行去睇下，點知好驚喜，入面有好多台灣直送嘅零食，生活百貨等等，依家冇得去台灣，我都買咗幾盒鳳梨酥解下相思之苦，大家去食完牛肉麵都可以去睇下呀。