影片
以上資料只供參考, 請與餐廳確認詳情
黔知味牛肉麵（$45）可選不同辣度，要咗BB辣。湯底味道濃（以原牛骨熬制湯底），並不是死咸，BB辣輕輕吊起辣味，配埋芫茜蔥，再加枱面嘅花椒粉，味道層次更豐富。牛肉薄切，小片，但好多片（應該都有十數片），牛味一般，質感偏嚡。麵條似幼版米線，滑溜兼有些少彈性。黔知味蹄花米線（$46）同樣要咗BB辣，湯底係同一款。蹄花即係豬手，有兩大件，炆得極腍，食落欠缺口感，味道普通。米線口感比麵條多啲。黔知味夜郎糍粑：三色糍粑（$22）本來係糯米、玉米、高粱各一件，但無玉米，所以要咗兩件高粱。即煎，外層脆身，裡面軟糯，加埋花生碎、黑白芝麻、椰絲碎、黃豆粉、黃糖漿，多重味道加口感，味道不錯。但糯米（白色）同高粱（深紫色）味道有咩分別就食唔出，但糯米口感比高粱就滑少少。黔知味大定玫瑰冰粉（$22）冰粉口感類似涼粉/愛玉，但本身完全無味。配料加上糖浸玫瑰花瓣、提子乾、山楂碎、糖蓮子碎、花生碎、黑白芝麻，整體味道淡酸帶甜，第一次食幾有趣嘅。
繼續閱讀
湯麵簡直就係行幾步就有一間，我自己係好鍾意食米線嘅，以前會食麻辣湯底，近排唔食得辣，所以就揀啲清湯米線！今次嚟到呢一間食牛肉米線嘅店，雖然選擇唔係特別多，但係都好有驚喜咁！佢嘅招牌牛肉米線，米線偏粗，有口感，最鍾意係佢嘅湯底，牛骨煲出嚟嘅，唔可以話超濃郁，但係濃厚度適中，食米線啱啱好！佢嘅牛肉係好薄嘅薄片，幾特別！另外幾鍾意佢嘅冰粉，佢嘅冰粉會有一種玫瑰香，有啲提子！佢個底就唔係好甜嘅糖水，但係配埋提子食同埋啲花生配料，我就覺得啱啱好！
繼續閱讀
放工同老婆路過，見有間食店門外排哂長龍，行埋去八卦下，原來排緊台灣食店。見隔離嗰間店鋪相對人少，又有D肚餓，又吾想排隊，即管入店一試，店名叫黔知味，完全吾知係食咩菜。叫蹄米線（問過老闆娘，原來係豬腳)、宣尉府豆幹。豬腳非常淋。豆幹一定要點辣粉食。最後叫咗碗酒釀丸子加蛋，好好味，忍吾住再叫多一碗，正！吾明此店味道吾算差，為何食客相對少？所以要為佢寫這篇食評！希望為食嘅香港人都可以比機會小鋪，嚐嚐不同嘅味道！
繼續閱讀
見到有新餐廳就試試！黔味牛肉麵唔係好多地方有得食，真係幾有特色！我地就叫左個黔知味牛肉同蹄花米線！估唔到個牛肉份量都幾多，舖滿左成個碗面，而且薄切夠吸湯！蹄花就即係豬手，煮得好炆好入味，仲啖啖肉又夠滑！呢度既雲吞係限時供應，粒粒夠大粒，肉汁滿滿！小食叫左個怪味牛肉，配上酸酸既醬汁同辣椒粉！ 都幾特別！甜品我地叫左酒釀小丸子+雞蛋，熱辣辣即刻整，好香桂花味，又唔會太甜，食完暖笠笠！另外都會有d特色飲品好似什果賓治，價錢又唔太貴！平民之選
繼續閱讀
最近去荃灣試了家叫黔知味的牛肉米線，真係好驚喜！這裡的食物新鮮得無話可說，牛肉又嫩又滑，米線的口感也超級Q彈，湯底濃郁，喝一口就覺得好滿足！黔知味牛肉米線牛肉的味道非常足，搭配米線真係一流。而且份量都好大，性價比高！黔知味肉碎燃干撈米線肉碎的味道香，讓人一口接一口，根本停不下來，配上特別汁，正！另外，餐後的酒釀小丸子也好好味，軟軟的，還帶點酒香，吃起來又甜又香。再加上他們的涼拌海帶，涼拌青瓜和涼拌木耳，整體的搭配真係清爽又開胃。黔知味牛肉米線不但食材新鮮，味道好，還非常划算，地點又方便，無論工作日午餐或者週末約朋友，都好適合。下次再有機會，我一定會再來！！
繼續閱讀