影片
睇戲前喺附近行下睇下有咩岩食，見到開左間新既車仔麵就想試下，因為可以快食～叫左下面啲菜色式一人餐 - 牛牛麵 $83 🐄🍜車仔粗，腐乳通菜，鴨屎檸檬茶。澳洲牛筋丸、潮州牛肉餅、牛腩、牛肋條、秘製金錢肚、滷水牛筋、冰糖蘿蔔呢個牛牛麵份量一啲都唔少，麵底多，而且好足料，牛筋丸超級彈牙，秘製金錢肚好入味，個牛筋軟淋適中。👅豬豬麵 $58 🐖🍜豬豬自選麵底（油麵），湯底豬骨湯及秘製魷魚汁（辣），中辣，熱檸茶豬大腸、豬手、貢丸、腩肉、豬皮、豬紅、時菜豬豬麵個豬骨湯底好鮮甜加埋辣既秘製魷魚汁一流呀！豬大腸好易入口，要一讚個豬皮👍🏻係吸哂啲湯汁，正，豬手擺喺最尾內食因為覺得係重點，豬手煮得好腍，好似入口即溶咁。🌶️另外呢到提供無限量既菜脯，對於我呢啲鍾意食辣既人係好吸引。✨✨✨經典煎釀三寶 $26✨✨✨✨呢個我覺得係必點，無諗過一間車仔麵店可以整到咁出色既煎釀三寶，一定要趁熱食，個紅腸釀左好彈牙既魚肉，啖啖肉，仲要價錢係非常合理。同埋店內既店員都好有禮貌亦都好好客。住喺荃灣附近又多左一間車仔麵既選擇，對於我呢啲車仔麵愛好者又可以減少選店既困難👍🏻
繼續閱讀
食完又再黎食😋喺荃灣嘅「幸福麵館」，呢度嘅港式車仔麵真係好受歡迎，選擇多到眼花撩亂！我哋今次叫咗兩碗唔同嘅麵。第一碗自選5餸麵： 滷水汁湯底；呢個滷水汁湯底香氣十足，味道濃郁，我叫咗少辣，所以唔會太刺激。 滷水雞翼尖和滷水牛舌：肉質好嫩，滷水味道好入味。 魚肉春捲：外皮酥脆，內餡鮮嫩。蝦餅口感彈牙，味道鮮美。魚腐吸收咗湯底嘅味道，好正。第二碗自選5餸麵： 沙爹湯底，湯汁濃郁，帶有花生醬嘅香氣，微辣嘅味道好開胃，食落去有種特別嘅風味。滷水腩肉、滷水雞翼和 滷水牛舌：腩肉嘅脂肪適中，肉質軟嫩，食落去好滿足。 牛肉丸：牛肉丸彈牙。 魚肉春捲：外皮酥脆，內餡鮮嫩。
繼續閱讀
Lunch time 同同事食飯，見係多款式既車仔面，就入咗去食見到牛牛面，有咁多唔同類別既牛，menus 寫有牛膀，牛筋，牛腩，而且寫到明冇果樣野就有牛肉餅或者雞翼replace ，就叫左嚟食上到枱見到都幾豐富，但打鬆個面就發現冇牛膀，咁見到有牛肉餅都明嘅，少一樣但再睇下，點解會冇牛筋呢？向樓面姐姐表示冇牛膀同牛筋之後，佢同我講有牛肉餅，我話咁雞翼呢？佢入廚房講完之後，比我聽到，廚房只係向樓面姐姐表示有多牛腩（啲牛腩細粒到我都唔知多幾多）然後樓面姐姐只係後補左牛膀比我，咩解釋都冇，但亦都冇將廚房所講嘅轉達比我知湯底我揀牛腩汁，但淡而冇味我只能講份量少，唔會飽，而且比少咗野你都唔會知！！！提出都冇咩用
繼續閱讀
本來想食隔籬嗰間日式蛋包飯，點知人哋晚市一定要訂位，所以就嚟試吓呢間車仔麵。見其他食評推薦豬豬面餐，就叫咗個，另外叫咗個三餸麵，豬軟骨、冬菇、腐竹米 。豬豬面係有豬手，豬皮，豬紅 。豬手係滷水過嘅腦汁同其他餐廳有啲唔同，偏向台灣嗰種，有藥材味嘅滷水。炆得唔會太腍，有啲咬口。另外，豬紅豬皮味道就同大部份餐廳一致。豬軟骨都好好味，冇汁係偏甜嘅肉都炆得好腍唔會黐牙，最誇張嘅係份量，整整三大嚿豬軟骨，食完呢個餸都幾飽。每一個餸都可以揀唔同嘅執底，佢又腩汁沙嗲咖喱等等，仲可以挑選唔同嘅辣度，我見佢枱上邊有擺咗罐辣味雞粉，所以面冇叫太辣，但係我發現佢枱上嘅辣粉同後廚加嘅嗰種辣汁係唔一樣，後廚嘅辣汁係更加惹味 。埋單100出頭，真係幾抵食 。
繼續閱讀
呢間幸福麵館真係好可以話係隱藏係小巷嘅寶店。佢嘅車仔麵真係好好味，今日閒日嚟試嘅時候都已經好多人，令我非常期待呢度嘅車仔麵價錢唔算貴，食後覺得好出色值得推介。朋友點左魚魚面，魚味鮮甜濃郁，配料好多魚🤣有魚腐，鯪魚肉，魚蛋，魚皮餃，魚肉春卷，香菇同菜等等，簡直超豐富又夠魚，唔同食料唔同口感味道，配搭油麵真係啖啖滋味。我就揀咗個自選四送車仔麵，金錢肚炆得夠晒入味，蝦餅又彈牙，魚肉春卷吸左湯汁好好味，配料份量十足，餐廳真係落足本。可以選擇唔同醬汁，按自己口味喜好，層層香味太好食！另外都試左個馬來蝦米辣椒醬（免費問職員拎），超級推介，風味十足，唔會太辣，反而蝦米香味更突出，絕對令味道提升！呢餐食完真係好滿足，食完又唔會口渴，港式風味滿滿，讚！
繼續閱讀