越好

營業中

休息中

係連城呢個大商場，要搵到好食但價錢又唔太貴既餐廳真係幾難，除非你食連鎖店啦。但係今日就比我搵到呢間越南餐廳！好食大份之餘價錢又唔貴，性價比極高！沙爹串燒牛肉撈檬：好香串燒味，牛肉肉質唔錯，個撈檬個味好地道，岩岩好～越南豬扒飯：豬扒好香肉質不錯，我將隻何包蛋整穿撈飯食，口感一流😆😆炸蝦餅：新鮮炸，點埋個醬真係幾好食蝦醬雞中翼：一定要試呢個雞翼！！🤤🤤真係好好食！我同朋友唔係因為太飽的話，一定再叫多一份！真係食到停唔到口架😆😆😆而飲品方面，我食越南餐廳就一定會飲咸檸7，個感覺好match，而朋友叫既柚子蜜個甜度岩岩好，唔會蓋過野食既味，100分🤤

好耐無約沙田友出街今次佢仲介紹我食間越南餐廳仲特別推薦「蝦醬雞中翼」首先「越好」個地點已經完勝一切就係沙田火車站連成廣場1樓扶手電梯一上就見到間餐廳啦 好彩個日18:00去到 仲有些少位置 首先食得越南菜 點少得 生牛肉河粉 湯底非常清甜 河粉都唔會一舊舊 牛肉入口屬於脆爽個隻 我朋友就叫左 越南豬扒撈檬 豬扒份量都有成個手掌攤開咁大 再淋上越好秘制醬 清爽感大大提升 酸度剛好 再來就是兩款小食 炸蝦餅和蝦醬雞中翼 蝦醬雞中翼算得上是招牌吧 鹹香鹹香的 真的讓人吃完又想再吃總之 這次的聚會也因為吃到一餐好吃的而變得很圓滿

皮膚敏感勁耐冇食牛肉啦，今次同朋友去沙田行街😋去食個晚飯。果斷揀咗越南野🇻🇳我哋叫咗生牛肉湯河，雞扒撈檬，蝦醬炸雞翼同埋咖映多士。🥰生牛肉岩岩熟，超級嫩滑，湯底都好正宗，好味🥰雞扒撈檬有驚喜，雞扒係有啲似烤雞嗰種，口感同味道都幾有新鮮感。朋友好鍾意食烤雞翼佢話炸得好脆而且加埋蝦醬味好夾。多士大大份啱晒啲大食嘅人🤭最後飲埋兩杯特別飲品就畫上完美的句號🏠越好 (沙田)沙田沙田車站圍1號連城廣場1樓109號舖

見Openrice comments唔錯，好多人讚，所以去左試，但真係難食到要寫食評。叫左2人餐，塊豬扒超難食，食左一件就放棄。牛都唔好食好鞋，如果要揀，牛𦟌好少少。然後飲品好難飲，未飲過咁難飲的咸樽七！小食都唔好食，最鐘意食雞翼的我，都覺得難食到食唔晒雞翼。雖然價錢幾抵，200唔使2個人，有2碗湯河，2個小食，2杯飲品，但性價比好低，真係好難食。另外，門口係等位無得拎飛，要係門口企係到排到，順序入去。

呢日請咗半日假到連城辦啲事，未夠鐘搵間餐廳坐低食個下午茶先~ 連城一樓餐廳林立，諗咗一陣決定試吓呢間唔洗排隊但網上評價又唔錯的馬拉過江龍！睇吓越好下午茶 menu 先～第一次食，點咗生牛肉湯河($45)，有三大塊牛肉，都厚嘅，湯底都OK～下午茶套餐包一杯熱飲，有得揀美祿😁 (咁啱後來坐我對面的食客都揀同一個組合，人氣之選？)另外忍唔住加咗$18 有我至愛的炸蝦餅，剛炸起，熱辣辣，正呀😋蝦餅望落大塊，但如果厚啲會更好，哈哈！

今日同老公拍拖👩‍❤️‍💋‍👨，行沙田新城市，原來喺沙田火車站上面個連城廣場有咁多嘢食，咁啱見到間食越南菜嘅餐廳“越好”，見個環境幾好，所以就諗住入去試下。地方都ok唔算太迫。牆身仲有一幅越南嘅壁畫。話明係食越南菜🍜，越南河粉同檬粉一定係必食之選。我成日都話一間餐廳好唔好，試佢招牌菜就知。越南四寶湯河🍜：四寶包括有牛腩/牛丸/牛展/生牛肉，一次可以滿足曬四個唔同願望，可以食曬佢嘅招牌，生牛肉入口即溶，牛丸彈牙，牛腩肥瘦適中，牛展厚薄剛剛好，仲有佢個湯底好甜，我哋連湯都飲曬。越南豬扒撈檬🍜：塊豬扒好大塊，而且醃得好入味，加埋佢自製嘅檬粉汁，簡直係絕配。蝦醬雞中翼🍗：呢個我唔知算唔算係越南菜，但用蝦醬醃嘅雞翼真係第一次食，真係好鬼好食，啲蝦醬味入曬入雞翼入面，又炸得好香脆，唔會感覺好油膩，我一個人都食咗三隻。恐龍美祿🍹：下面係美祿，上面係濃濃嘅cream，夏天飲一流。越南香茅茶🧉：唔係糖水沖出嚟，唔會好甜，仲飲到好濃香茅味，有一種好fresh既感覺。

女兒時常去沙田新城市廣場做gym減肥，佢發現有間食越南菜嘅餐廳，叫越好，食過唔錯，減肥食都冇負擔。今日就叫埋我過去一齊食。夏天天氣炎熱，清爽越南菜最啱食。越好雞扒湯河：雞扒醃製得好入味，煎至金黃色，食起來不油膩又有口感。湯底清甜可口，散發出陣陣獨特的越式風味，配滑溜的河粉最好味！越南春卷湯河，春卷餡料有粉絲、芋頭絲、木耳絲等，香脆可口又爽口。蝦醬雞翼即叫即炸，肉嫩皮脆，有香噴噴嘅蝦醬味。炸蝦餅口感鮮香又彈牙，唔會死實實。鹹檸七味道甜中帶咸，檸檬清爽，鹹甜交雜、冰涼解喝！紅豆冰奶味香，紅豆夠林夠甜。

某一日係到辦事,諗住快快手食個快飯,見呢間都幾抵同埋食評都正向,就簡左呢間!以晚餐黎講,五六十蚊就食到都算係咁,雖然湯河黎講唔算抵!心諗拿拿聲填左肚都算點知越心急越出事, 由落單個下等左20分鐘,仲未有得食因為趕時間就催佢,催完之後等多7分鐘先有上台!雞翼越好湯河 $58雞翼口感係外脆內嫩但成口油,油溢味蓋過雞翼味或者好大陣雪味湯河正常,湯底好咸不過我失算,唔記得走青中意食茜的朋友應該好中意湯底好大陣茜味

話說今日打完疫苗, 趁身體未有反應, 拿拿林同丫妹係附近搵間餐廳速食再回家休息。丫妹話平時經過見到有間粉麵餐廳幾多人幫襯, 有興趣試試。餐廳面積唔大, 除散叫, 更有一人同二人自選套餐, 更加抵食!【二人餐】HK$176 自選兩款主食、兩款小食、飲品兩杯生牛肉湯河: 牛肉浸係熱辣辣湯底上檯時仲見到色澤粉嫩, 肉質鮮嫩, 湯底味道濃郁清香, 自行加入青檸汁、辣椒粒, 清新惹味, 滑滑河粉索咗些少湯底, 更加好味又大碗。熟牛腩湯河: 熟牛腩夠晒林, 牛味香濃juicy, 而且份量幾多, 值得一試!越南炸春卷: 外層超酥脆, 一咬脆得有聲, 入面有碎肉、粉絲、雲耳絲, 很有層次, 點少少酸汁, 更加開胃。 炸蝦餅: 外層香脆不油, 扁薄蝦餅鮮甜彈牙 紅豆冰嘅紅豆較少, 食起黎甜甜地唔硬, 淡奶味偏重。+$3恐龍美祿: 美祿頂層加了cream+美祿粉, 入口更加香滑。

今日約咗朋友係沙田食飯，近近地就去咗連城廣場食，上到去發現好多餐廳都幫襯過，有上海姥姥，靠得住，Euro Go Go 等等，朋友話夏天最啱食啲清爽嘅越南菜，佢話減肥食都冇負擔 😂 加上呢間餐廳我哋又未食過所以就試吓。為免中伏所以就去 Apps 睇下啲評價先 😝 見幾多人對越好四寶湯河都讚好，所以就決定試下，叫咗越好四寶湯河、炸蝦餅、蝦醬雞翼。越好四寶湯河 ($60) : 食材有牛丸、牛𦟌、牛腩、牛肉，河粉口感細滑有彈性，而且湯底一啲都唔油膩 👍🏻 試完啲基本嘢就試試啲牛，估唔到都幾有驚喜 😱 牛丸彈牙多汁 😍 牛腩口感軟腍，油脂豐富 😍 牛𦟌厚薄適中 😍 自己覺得最正就係牛肉，睇啲雪花紋同油脂分佈就知唔係普通貨色，呢個湯河可以話係鎮店之寶。蝦醬雞翼 ($38)，炸蝦餅 ($38) : 蝦餅沾上薄炸漿，炸至金黃色，口感外脆內爽又夠彈牙 😋 蝦醬雞翼脆口又大隻，食落時口內散發出微微嘅蝦醬味道，呢兩款小食幾有驚喜。😋

今日嚟到沙田搵好嘢食，連接住沙田站地理位置方便，成層有好多餐廳，今次睇中呢間越南餐廳～～見到餐牌有個二人set, 可以order兩個主食加兩個小食，仲有兩杯飲品都幾抵食～揀咗個四寶湯河，四寶有爽彈牛丸、牛腩、牛𦟌同埋生牛肉，湯底好清甜，份量相當夠，牛腩夠林好味，生牛肉薄切嫩滑～～另外，朋友叫咗個飯，咖哩豬扒飯，大大塊豬扒，仲有塊爽脆蝦片，咖哩唔辣岩晒口味，甜甜地夠香濃～～小食就揀咗蝦餅同春卷，兩樣小食都炸得香口，春卷餡好食～

上次食左個香茅雞扒飯，今次就試下個越南豬扒飯（食自己）。 首先，食物賣相唔錯。豬扒份量都唔少，而且仲有蝦片同酸紅蘿蔔伴碟。除左充滿越南風味外，還令食慾大增。 先試下豬扒，豬扒已經切好，方便進食。豬扒都好juicy, 送飯一流。而蝦片亦新鮮製造，咬落卜卜脆。再加上酸蘿蔔，幫你減少油膩感。 越南豬扒飯，配搭剛剛好。

口痕痕想食越南野就過咗嚟～原本諗住係試伏，點知食落去又ok喎！嗌咗個二人餐，所有野加埋都係$176～🍴蝦醬雞中翼脹卜卜咁樣，隻隻都好大隻！新鮮炸好上台，但係都唔會太多油，而且蝦醬味極濃😻岩曬重口味嘅我( ´▽｀)🍴炸魚餅一樣新鮮整好，夠咸夠味，加埋啲甜酸醬食好開胃！而且估唔到佢小食都有咁多舊Lol 🍴沙嗲串燒牛肉撈檬食越南野就最鍾意食撈檬🤤沙嗲汁好正，而且唔會蓋住陣牛肉味，燒得岩岩好！值得讚嘅一樣嘢係佢啲粉唔會太多～之前食親都食唔晒🍴串燒雞咖喱飯沙嗲汁同串燒牛係一樣嘅～呢個咖喱汁有啲驚喜，好夠味，仲有淡淡嘅椰奶香，撈飯食好正！🍴青檸梳打梳打入邊有個青檸俾你自己督，可以自己控制有幾酸！🍴鹹檸七同青檸梳打一樣唔係純醬，有得自己督的🥳

每次過嚟新城市都去「越好」食埋晚餐，貪抵食，又唔洗煩簡食咩餐好。今次過嚟餐牌都有d改動，不過二人餐仲響度👏🏻👏🏻👏🏻主食生牛肉湯河扎肉雞絲湯河呢度湯底好清甜，次次食之前都必定飲兩啖湯食食河！ 呢度出名牛肉湯河，牛肉大大塊，肉嫩而且新鮮的彈牙。扎肉同雞肉完全係我至愛，必食之選。小食蝦醬炸雞翼炸蝦餅餐廳炸物系列好正，雞翼炸到外皮香脆，蝦餅第一次叫，好太塊，統統即叫即炸，咬口彈牙好味！飲品凍奶茶桂圓紅棗茶

真係好耐冇上黎連城廣場食野沙田友真有福而家有各式各樣既餐廳進駐難怪平日夜晚都咁爆見天氣咁悶熱食下越南菜都好見二人餐都幾抵嗌兩個主食兩個小食同兩杯飲品只需$176我地嗌左越好人氣四寶河分別有生牛肉牛展牛腩同埋牛丸生牛肉色澤粉嫩口感柔軟牛𦟌十分入味牛腩軟腍牛丸都幾彈牙河粉口感都好爽加上湯底味道濃郁越好雙寶飯有雞扒同豬扒醃料味道濃食落咸咸甜甜幾有風味小食嗌咗炸蝦餅同炸越南春卷炸蝦餅新鮮炸起熱辣辣炸越南春卷入面有好多芋頭絲食落好香口熱蜂蜜柚子茶恐龍美祿原來係美祿加cream有趣