星林居酸辣米線餐廳

營業中

休息中

以前最愛的米線 隔左好耐無食今次食返之後 已經唔係以前果隻味道🥲總是差了些甚麼 但講唔岀😗·依舊咁大碗嘅米線同餸菜 幾鍾意佢個湯 真係幾好飲 紫菜真係好好食😂莞茜、蔥 勁多好滿足🥰蘿蔔真係好大舊 好入味😋

先講最嚴重嗰樣：送餐個男人，全程口擘擘咁 ，準備放到我枱面嗰陣，喺我面前，滴咗滴口水落地下…今次就話滴吾中碗麵姐，咁搞法，下次就滴落碗麵，搞到我食到好不安⋯（我firm係滴落地下心諗冇事既🥲）跟住之後都留意到佢出餐，又係口擘擘，耷低頭望碗麵隔離張單（佢豐厚嘅嘴唇底下面有三碗麵）我心諗 嘩好危險呀呢條友 ，分分鐘其他食客遭殃 ⋯最後做咗大嘥鬼，食剩好多就走咗🤮仲有啲員工感覺服務態度好冷漠 60幾蚊唔係想要求幾好五星級服務 但求唔好已讀不回就夠👍🏻

今日就過返去尖沙咀做嘢，所以就一樣想快快手手食啲簡單嘢搞掂，同埋諗住陪個朋友一齊食齋，佢齋得嚟仲要係冇雞蛋嘅，所以突然間諗起星林居，食米線，只要唔食辣嘅時候就唔會有肉。行過去買嘢都算方便嘅，唯一奇怪嘅係自己揀餸嘅時候冇得叫蘿蔔，但係佢係有一款蘿蔔腸仔米線嘅。佢嘅小窩米線，我朋友鍾意食，因為佢個湯比較甜，我就加咗酸味，整體來講維持到佢嘅水平，米線同湯都好好味。唯一就係試吓加咗個腐皮角，以為剩係得腐皮，點知原來係魚肉嚟嘅，所以全部俾晒我食，整體嚟講星林居都仲係值得讚嘅。不過題外話，唔知個湯本身會唔會有肉汁嘅呢？

今日突然想食米線咁岩又係尖沙咀返工。於是去左星林居食一入到去無乜人，亦都無人招呼。自己一個人搵個位坐坐低左有個老人家收銀見到我坐低眼望望唔理我又入返收銀到。寫完紙仔諗住落單，個老人家叫都無反應。有個大陸客寫單寫得唔好，比佢小返轉頭！野食已經無之前咁好！我叫左杯凍咖啡飲左2啖就放低左！食完去7仔買枝裝咖啡仲好飲比錢個時比$100佢！收$91問我有冇$1我話無。老鬼即時黑面跟手掉返$9比我出街一定要帶散銀？都幾好笑$15/1個餸 每樣得2舊

好難食..之前有朋友推薦過呢間米線..今日去試..伏到嘔…首先衛生環境麻麻…之後上米線，我哋三個人，個男侍應將第一碗米線放係枱邊，之後我朋友自己推個米線去自己面前，佢係坐外面果個，佢碗米線最方便拎到，跟住我坐佢對面，個侍應照樣將個米線放係我朋友碗米線旁，要我哋自己推返埋自己個位。都算啦，最後一碗米線佢都係放同一個位，但我個朋友係坐佢放呢果個位嘅對角…跟住同佢講「唔該幫我放呢邊（指住我朋友個位）」跟住佢話：「呢度係自助㗎」跟住碗米線要係兩碗米線中間推過去我左手邊果個位度…因為張枱好細，而張單又痴住係碗底，推碗米線果陣張有油嘅單飛咗落我身上…我都未試過一個侍應可以咁癲..跟住個米線湯又唔熱..叫大辣一啲都唔辣…湯又少…好難食….絕無下次🥲🥲🥲服務負十分食物一分

前排出咗尖沙咀行街，肚餓嘅時候突然之間好想食米線，上網一搜尋就搵到呢一間尖沙咀有啲名氣嘅米線店，一於就試吓《明火小窩米線+豬紅+豬大腸+蘿蔔》💰$66湯底揀咗多酸用中小辣，米線一上枱嘅時候，湯底幾乎滿瀉，事關米線嘅份量非常多，湯底裏面有肉碎芽菜酸菜，味道都唔錯。呢度揀辣度酸度同埋特別要求，都多項目作選擇。豬紅入口非常滑，豬大腸用鹵水浸有，巨型蘿蔔亦入味同甜，呢度可以選擇嘅餸都算足夠。環境方面，大大塊霓虹燈嘅招牌一定搵到呢度，餐廳位於3樓要行樓梯上去，餐廳裏邊面掛滿大大細細的霓虹燈牌，同一般嘅米線舖風格不同，枱與枱間有啲窄，枱面仲有啲立黐黐，如再乾淨啲就更好。👽星人指數👽👅味道：7/10🛸環境:6/10💫CP值：中🚀回頭Encore:✅📍 星林居酸辣米線餐廳 (尖沙咀)尖沙咀金馬倫道14號金輝大樓3樓

#米線關注組 今次黎到位於#尖沙咀 獲獎無數既#星林居 🌟星期六去到 難得唔洗排隊😝〰️環境空間大 坐得都舒服〰️自己填表落單 配料選擇多 超過30款 主打食酸辣米線 麻辣可另加〰️🍲雲南過橋米線 $65因為諗唔到食咩餸 唔知那來的勇氣 我哋兩個人叫咗兩碗過橋 大癲😖！見到實物真係嚇死咗😂超。足。料‼️ 個碗明明已經係滿滿既料 但竟然仲有兩三碟裝住啲料😯〰️雲南過橋配料：〈豬腩肉·雞中翼·紅腸·腸仔·冬菇·蟹柳·腐竹·牛𦟌〉味道方面 我叫小中辣 普通酸〰️夠辣夠酸 濃郁湯底 非常惹味 米線應該都有特別調味 味道會偏酸 米線質地偏淋 有少扣分啦🤏另外可以特別要求 多/少/走芽菜 韮菜 莞茜 等等 多莞茜份量真係好足料架🥰

第一次嚟食嚟之前已經知星林居嘅評價好壞參半今次叫左小鍋米線 墨丸 豬肚 蘿蔔 豬紅 生菜生菜分開上 唔錯蘿蔔夠唸 豬肚個味甜甜地都彈牙其他餸就無乜特別湯底不過不失 無想像中咁差不過服務態度就唔好啦而且等野食都等得耐相信出面有其他更好嘅選擇

無試過米線咁唔好食，相都無影叫完野食期間，見到長髮員工拎碗野出黎碗邊有條粉，年老女人話，咁樣點拎出黎見人叫佢拎返入去但只係放返係架推餐車到整，我見佢用手放返條麵入去，再推車出黎🫠🫠🫠隔左陣野食到我叫左小小辣，係食唔到有辣味湯唔夠熱，芽菜多過d 米線😬冬菇好重姜味，豬大腸還好豬紅都係有陣味，唔識形容由於個碗細菜係另上，即係烚菜咁中途見到有個食客男，叫錯左杯野飲同員工講左幾次都解決唔到最後人地話唔要個杯淨檸檬加冰但年老女人態度勁差，叫人地自己處理左佢🙄全程食客男都好聲好氣唔明點解要咁對食客到我食完埋單，行去收錢到講枱號年紀男人態度勁差又問我幾號枱我大大聲再講一次😤😤第一次打食評發現太多打手攪到自己都中伏希望唔好再有人中伏

星林居酸辣米線餐廳 (尖沙咀)尖沙咀金馬倫道14號金輝大樓3樓去完小王子展覽🎭就同謙哥去咗食酸辣米線。謙哥叫左明火小窩米線配響鈴、芝士腸、火腿，少少辣非常酸，年青人嘅口味都係勇敢，上菜嘅時候已經聞到濃烈嘅酸辣味，非常之大碗，非常飽，好足料。響鈴勁脆！芝士腸同火腿就係年青人愛嘅味道。謙哥覺得湯底都幾好飲，就係鍾意佢夠酸。明火小窩米線🍜小辣小酸，配豬膶同豬大腸，非常暖胃同補血。非常足料，一碗都夠兩個人份量㗎！鹹檸七好開胃！

每次去開尖沙咀都會必食既米線🫶🏻由之前大肚去產檢，到而家生左小朋友每次經過尖沙咀都必定會上3樓食星林居米線🤭佢嘅普通酸米線，再加大量嘅蔥同芫荽真係十級正😋😋直頭係耐唔嚟嘅話，都會特登搵日過嚟食返碗🤣米線材料非常豐富🥰只係帶咗三個餸，但成碗已經滿晒😍老公就食咗個小鍋過橋米線已經有齊晒幾個餸諗都唔使諗😆其實最緊要係佢個酸味湯底，真係食過返尋味雖然都食過好多間唔同嘅米線但星林居米線係最令我回味🤣🤣PS:第三圖係小朋友嘅米線，佢哋唔要蔥芫荽芽菜，所以比較清淡🙌🏻

如果提起雲南米線，而家你地會諗起譚仔或者三哥，但其實當初將雲南米線引入香港係星林居，對我黎講都叫由細食到大，充滿著回憶。不過創業易、守業難，近呢幾年，不斷話星林居的質素每況愈下，加上近年不斷有新的米線店，所以我都有一段時間無去星林居。適逢星期日，周圍都排晒隊的情況下突然想起不如食星林居。搭著破舊的老爺Lift上到去，裝修依舊，但好似見唔到老闆娘。呢度叫米線有樣野好係可以叫多蔥多茜多芽菜，個秘技係蔥、茜同芽菜位置唔好圈但填上「多」字就得。配料方面，雞翼係必叫，今次食完味道都Keep到。呢度的雞翼係好入味，個滷水都調得唔錯，但佢維持到雞翼的肉質，唔會過鞋。另外叫左紅腸，正常發揮但份量足。最後就要評下湯底，其實個味道唔錯，有層次夠底蘊，但可以再濃稠一點，另外就唔知點解呢度的湯底特甜，我估未必個個接受到。星林居其實都幾用心，食得出係每碗即煮，因為連米線都入味，而配料都多，價錢算合理，不過要接受到比較甜的湯底。整體黎講又未講到坊間講到質素好差，或者只係多左其他選擇，星林居被比下去吧！

明火小鍋米線🍜呢間米線已經幫襯咗好多年，次次都係食小鍋米線，湯底味道濃郁，重口味人士一定喜歡😬我覺得星林居的湯底偏酸口味，一般都會選小酸、小小辣就足夠☺️配料選咗豬紅蘿蔔豬皮，最考驗餐廳的功架，非常入味😋朋友點咗蘿蔔同炸醬，一樣大讚蘿蔔又甜又入味！飲品選擇咗柑桔蜜，好潤喉又可以解辣😝 🦥星林居酸辣米線餐廳 (尖沙咀)尖沙咀金馬倫道14號金輝大樓3樓🌲🌲🌲🌲🌲🌲🌲🌲🌼懶好食指數：4.6/5🌼懶住去指數：4.6/5🌴只想懶住食、懶住玩、歡迎餵食🌴💤🦥得閒就Follow吓，不過懶得Follow翻你🦥💤

話說呢間嘢係好多年前有個朋友推薦嘅好多年前喺另一間分店食過，一直覺得都ok今次嚟呢間分店食番，睇下keep唔keep到水準結果大失所望我今次叫咗小窩米線，要咗BB辣同埋多酸酸就夠，但唔夠辣所以好怪，好唔夾，所以我就自己加番辣油補救番，咁呢個係我自己剔得唔好，各位下次食多酸記得留意番碗米線嘅湯底冇以前咁濃郁，肉碎都冇乜，同埋啲米線煮到好林，成碗野好似pat pat咁，食唔番以前嗰個味道唯一值得讚嘅係啲餸味道ok，份量都夠，叫多茜量都多，唔使另外再加錢，同埋個蘿蔔有驚喜，夠林夠入味又無根

📍星林居酸辣米線餐廳📍以前返工時期,經常會食嘅一間酸辣米線🍜今日經開尖沙咀,心血來潮,重溫當年嘅味道🤤一入到去店舖,依然都係咁多人食🤩味道同埋質素,都係同以前一模一樣架😋⭐️蟹柳,墨魚丸🦑酸辣米線🍜⭐️蟹柳,牛筋丸🐮酸辣米線🍜✨酸辣米線味道香濃,味道酸酸辣辣,食落去非常開胃,而湯底嘅辣度,有多種選擇,而米線入面有不同配菜,有肉碎,韭菜,腐皮,墨魚丸🦑同牛筋丸🐮質地爽口彈牙🤩