好吃韓國料理

營業中

休息中

午餐幾抵食， 40蚊左右， 間餐廳位於女人街， 好近西洋菜街， 旺角行到攰可以去食下。間餐廳個環境幾企理乾淨， 有種住家經營feel， 唔係嗰啲好大型連鎖店嗰種。 佢個餐有牛肉湯， 都幾清淡。 然之後就有前菜， 都係我哋平時食開嗰啲泡菜 之類。 我嗌嗰個石頭鍋飯好新鮮， 將啲配料撈埋一齊好正， 如果唔夠辣唔夠泡菜你可以將之前啲前菜撈埋落去， 咁食落去就更加過癮。

鐵板燒雜錦，雞牛豬，配白飯，送餐湯和配菜，凍飲加2蚊~餐湯味道一般，比較淡。配菜係小菜同泡菜，幾開胃~鐵板燒份量好足，雞牛豬分量平均，3種調味都唔同~最鍾意豬肉，最有韓式風味，有點像泡菜的味道~牛肉配上洋蒽幾惹味，雞肉普普通通~整體滿意~

係女人街見到有間韓國野，不太起眼，就試一試。好細一間，一眼睇哂，環境普普通通，應該係家人經營。小前菜係泡茶同醃大豆芽，正常表現，不過不失。仲有一個湯附送，裡面有幾舊蘿蔔，唔熱，小小暖，又冇乜味，唔知飲緊咩。由於太想念韓國蛋捲，見到就想叫碟試試，但一見到就已經失望完全唔熱，冇蛋香，冇煎香，冇味道之餘仲要好老，食之無味，棄之可惜。韓國炒粉絲，好味，麻油味香濃，但太濕太黏，食落似一餅野。韓國石鍋豬肉拌飯，冇咗好多配料，亦都冇雞蛋，食落唔豐富食完呢一餐就算，唔會有下次。。。

曾幾何時，「純豆腐辣湯」是自己在韓國菜館用餐時常吃的菜式，不過其實不常吃韓國菜的我，已很久沒吃過這簡單而開胃的菜式了。這一天中午，沒有甚麼胃口的我，在旺角通菜街食肆最多，最集中的一段尋覓用膳的地方，無意中竟給我發現這間韓國菜小館子，門外張貼的多款午餐中，赫然見到久違了的「純豆腐辣湯」（$47），價錢相宜，正好給我一點刺激，讓我開一開胃。主菜未到，前菜先來，紅的泡菜，綠的青菜，泡菜甜中帶辣，辣裡有甜，青菜爽口，為這午餐帶來一個好開始。餐湯是常見的韓國菜館的餐湯，湯內有少許蘿蔔椰菜，味道是預期之中，無驚，亦無喜。主角跟白飯一起送上，熱燙的辣湯，開胃惹味，索湯的豆腐正是絕配，加上已被辣湯浸泡至全熟的雞蛋、少許蜆仔和牛肉，令本來無甚胃口的我不禁把這湯完全喝光。飲品揀了「凍柚子蜜」，雖要另加數塊錢，但這冰凍涼快，味道怡人的飲品，正是喝辣湯後的良伴。下次再吃這喜歡的「純豆腐辣湯」，不知道又會是何時呢？

當日整完指甲，隨便行隨便搵到呢間韓國餐廳，見好耐無食過韓國野就入去試下。其實佢間餐廳外面望落幾韓國feel，但入黎就完全唔同，好有中國風味🙈 一個人既空間送上冷菜 & 泡菜，佢呢2款都好味，個泡菜仲唔會好咸同好冷藏味。個例湯都唔錯，甜甜地又清清地。石鍋什錦牛肉伴飯$50，個賣相唔係太吸引，因為普遍既韓國拌飯上面既餸菜都會放得好整齊，呢個有d隨心放。講真個飯麻麻地，牛肉唔多，菜都唔算多，唯一好既就係個鍋夠熱，個底好多飯焦😆跟餐加$10可以要1份 炸紫菜粉絲卷3卷，但送到黎有4件，我就唔客氣。炸到脆卜卜好香口，4個真係唔夠喉。不過呢間韓國真係唔夠韓，麻麻地可以再試多次既，但就真係唔韓國feel🙈

本身想食日本野，但這個時間落左場。諗住隔離沙爹王食啦，點知又裝修。行多兩步見到呢間好吃韓國料理，太肚餓所以都唔想再行，就呢間搞掂個lunch。應該係我食過，認為評分最低的韓國石鍋飯。豬肉只有3塊，芽菜同蘿蔔都係得幾條。泡菜係朋友唔食俾埋佢嗰份我，唔係嘅話呢個飯應該都冇乜味。 野飲ok，檸茶嘅茶底不會太厚。最後想講下服務態度，問佢野唔應，手指一指就走。其實間店冇乜人，佢好似好忙咁款走左，原來係坐埋一邊玩手機😅😅😅。

《必叫泡菜嘅菜式》.呢間我之前都食過次，再食嘅原因係咁啱就腳同埋我想食韓國野😹佢係正女人街咋，而且佢有泡菜嘅菜式好高質🤤不過今次想試下其他野，所以冇叫到，總結下次都係叫番有泡菜嘅菜式好d.🔻整體評分：7/10🔻價錢：人均$100.今次叫咗佢嘅鐵板牛肉同雞肉，屬正常水準冇咩特別，佢$72有埋湯同兩款配菜，CP值都唔錯，而且重！點！係！佢嘅其中一款配菜——泡菜好好食，醬汁係出面現成買唔到🤤.至於個招牌紫菜金倉魚飯卷就不過不失，唔知點解我有錯覺以為佢好食就叫咗🤪但事實麻麻地，school food個飯卷好食好多。.👉🏻上次我食嘅係泡菜炒飯，真心佢有泡菜嘅菜式就好好食，強烈推薦佢嘅泡菜！！！.🔸呢7/10分係因為個泡菜而比嘅整體評分黎，如果淨計上面兩個鐵板，應該只得6分😹.📍好吃韓國料理 (旺角)旺角通菜街24號地下E號舖

喺旺角唔知食咩好，就嚟咗呢一間好吃韓國料理，貪佢唔使排隊，我覺得價錢都偏貴，上菜份量唔太大，一般嘅湯飯大概80左右，兩人食嘅部隊鍋就170+1，每人大概$100，但係部隊鍋唔算大，剛好夠飽，材料唔算豐富，即係最普通嘅餐肉、香腸、公仔麵、豆腐、芽菜同埋少少牛肉，其實好多材料都好平，如果佢份量多點就好，佢跟個鍋加埋一個飯先夠飽，但係真係唔算特別多材料，湯底係香港人口味，甜多唔辣，唔需要特別飲嘢， 可以撈飯食，飯都幾香口。配上嘅冬瓜湯就偏甜，唔太特別，小菜泡菜都係香港人口味，完全唔會覺得過咸過辣，芽菜幾爽脆，如果部隊鍋可以再豐富啲，多啲豬肉就會更加好了！不過不失，可以接受，但未必再食～

咁啱好想食韓國餐廳 又喺旺角行緊街 跟住就上網搵下邊啲地方仲有位啦打去其他地方都已經full咗咁就試下呢間！！！ 入到去呢坐位都好似韓國嗰啲餐廳 食飯前老闆仲送咗一碗湯畀我哋飲 。 員工服務態度都好好，滿面笑容……………………………… 呢個餐牌見到好多選擇 ，雖然唔可以話全部都好精緻，但都不過不失。 而且呢價錢仲唔貴 絕對可以接受 係一間值得去嘅餐廳。性價比高， 前菜值得一提非常之好食加咗幾次 一定要試嘅朋友都覺得好好食， 而且係連所店嘅，質量有保證 ， 得出老闆用心嘅質素。最開心嘅係可以喺mongkok ，食到甘嘅質素， 韓國餐廳嚟講呢間都算唔錯。 環境方面都算ok 地方都近地鐵站嘅 食完嘢出去行下都仲得。 員工態度都好有禮貌………… 總體嚟講係值得推薦，之後會再返去食㗎哈哈

行過旺角，忽然之間想食韓國野，叫左個泡菜炒飯，啲配菜都幾好食，同埋咁呢間野價錢都唔貴。我等左陣，碟炸飯就黎到，一食落口，啲飯好硬，多油，完全唔係泡菜炒飯果啲味，好奇怪，一啲都唔好食，唔會再有下次。最恐怖係有隻曱甴跌左落有檯客個頭頂度。我諗唔會再有下次

Lunch黎講都算平既韓國野😆睇間餐廳雖然頹頹地但呢個價錢食到呢個質素都ok叫左個炒年糕拉麵 $47 包野飲仲有個湯同前菜同平時食過既有小小唔同呢個麻油味較重 好香口👍🏿中意食年糕拉麵可以試下

亂打亂撞入左呢間食韓餐, 叫左招牌嘅牛骨雪濃湯(配飯), 半隻韓式豬手, 老公另外叫左"一人部隊鍋"(配飯), 雖然雪濃湯唔算太多牛骨, 但每一舊牛骨都炆到好軟諗, 好有牛味！部隊鍋嘅辣湯底飲落幾有層次(有甜有辣), 豬手都唔錯, 都好肯定我下次仲會再嚟！

本身想係一個比較便宜的午餐，看到這個門面跟餐牌，價錢也着實便宜，便抱着一絲的心態再去試一試。因為價錢便宜的關係，試了一直不敢試也很少地方有的炸醬麵，心想就算伏了也沒多大損失。之前覺得炸醬麵黑蚊蚊，梗係好抗拒食佢，睇評價唔錯，終於試咗， OK嘅，唔係想像中嘅重口味，有豬肉同蔬菜粒，個汁索咗蔬菜嘅甜味，甜甜地⋯其實蠻健康也不錯的，也試了辣炒年糕公仔麵，味道也不錯，份量也很多，可以再回購

旺角有一間叫好吃韓國料理 之前未試過 不過今日朋友帶我去就一於試吓鋪頭都唔算難搵嘅 喺旺角女人街附近 餐牌款式唔算多 但係望落都幾有韓國特色嘅 我就叫咗個辣豬肉飯餐 跟餐有兩款配菜係送嘅 跟餐仲有一個餐湯 $40港幣 有飯有湯有配菜有熱飲都係$40 個價錢我覺得都幾OK嘅 啲辣豬肉都唔算好辣 望落去紅色好似好辣咁 辣椒油都幾多 不過可能啲豬肉辣得來有啲甜味 可能係啲甜味令到冇咁辣 配埋白飯 辣辣地甜甜地都幾易入口 餐湯就普通咗啲 唔知點形容 總之就同中國嘅餐湯味道有啲唔同啦 餐湯我就唔係好識欣賞 可能我都係比較鍾意飲中國特色嘅餐湯 配菜就梗係有平時都見到嘅韓國辣泡菜 仲有白菜仔

吉野家牛肉飯我食得多 係時候要轉下食其他嘅牛肉飯 呢個牛肉飯餐嘅白飯好多 牛肉切到一細件薄薄地細細地 仲有啲洋蔥一齊炒 都幾有韓國風味 吉野家嘅牛肉又係配洋蔥煮 呢間韓國鋪頭嘅牛肉又係配洋蔥炒 但係兩間食到唔同味道 其實兩間我都幾鍾意食 今次呢間幾有韓國feel 有啲似喺韓國食嘅韓國牛肉飯 又有配菜 配菜有兩款 冇得揀嘅侍應比咩就食咩 又有湯 又有嘢飲 42蚊一個餐差唔多啦