一休(居食屋)日本料理 (38廣場)

營業中

休息中

星期六晚上黎到都唔洗等位，一休的地方都夠多位，所以起旺角啲多人到爆炸的地方可以有坐得耐少少，唔會趕頭趕命，熱茶任添加的地方，像發現新大陸一樣。每日都有特價的食物，同晚上1930前落單的正價食物會有85折。感覺熱食，熟食係好食啲，刺身就一般般 。以上係一部份的食物，左口魚壽司，入口魚油香，一口氣叫左10件，食完2件先拍照，油甘魚都係會吸引人再黎的食物，三文魚頭鍋物，三文魚頭份量大，唔會係啲碎骨，散件。油甘魚就好普通。

由佢未轉大舖食到佢轉左大舖佢依間日本料理餐廳都幾抵食價錢唔算特別貴食到平時我地食開嘅日本料理不過有啲我係細舖食嘅到佢轉左大舖就冇左啦但真係勁好食未轉舖之前仲有壓板依個真心爆好食佢上到黎個陣仲有板壓住 未甩模咁樣嫁幾得意因為好少食日本野係會有依啲野舊壽司上面係三文魚 仲要有魚鬆最頂仲有啲牛油一黎到個陣就都覺得出奇因為好少壽司會有牛油嘅出現黎到啲員工仲會係面前燒溶舊牛油等等個啲個feel好似睇緊表演咁食落舊壽司個口感幾得意係冇預計過係出奇地好食樣樣野都好夾夾得黎岩岩好係食過咁耐最特別嘅壽司可惜 依家轉左大舖冇左依隻壽司啦冇得再食多次但佢其他嘅壽司都唔錯天婦羅海老卷每一件都岩岩好一啖一件入面個天婦羅炸得好鬆軟令到舊壽司同上面舊芒果好夾蟹籽海膽炒飯一黎到你淨係見到少量嘅海膽同蟹籽感覺上好似比佢欺騙左但事實上撈均哂成個炒飯之後食落就會覺得冇比佢欺騙到佢每粒飯都會有啲海膽同蟹籽黏住 好似成飯包住啲配料咁仲要每一粒飯都係粒粒分明充滿住海膽嘅甜味亦唔會炒到過哂火唔錯玉子壽司同饅魚壽司其實同平時食開個啲壽司舖頭嘅分別就唔太大不過不失價錢方面都唔算太貴

首先我唔係第一次黎食哩間野，亦都唔係第一次嗌「特上」刺身拼盤。哩盤特上比係其他最大分別既就係有拖羅（トロ）同埋鮑魚。最期待既當然係拖羅。今次侍應上菜時，佢同我地講，拖羅留到最尾先食，原來果三舊拖羅仲未溶雪，筷子敲落去依然有聲，可謂擲地有聲。算，姑且信佢，留到最後先食。但係愈食愈唔對路，見舊拖羅開始有血水，於是我就擺左舊入口。嘩⋯咩黎架，咬落去好似擦膠咁，哩舊真係拖羅？而且完全無吞拿魚味🤮其實除左舊拖羅，三文魚腩都係無味😑之後同個師傅反映返，佢完全唔覺得有問題。我同佢講，咁不如你自己食舊試下，你就知我點解咁大反應，但係佢當然唔會理我，仲問我咁你想點。之後佢話切過另外兩舊比我，仲會溶埋雪先上。結果上到黎既係哩三舊野。試過擺落口咬，但咬唔郁。唉，當我自己唔好彩。比錢既時候同個女職員講「我都係對哩碟野好失望」。點知，換黎既只係一句語帶不屑既「ok」。到最後一個職員同我地轉達師傅既說話「拖羅係咁架喇」。叫佢搵個話到事既過黎都支晤以對。係我見識少，哩三舊好似打左蠟既野都叫拖羅，叫返板長自己食又唔敢。🤷🏿‍♂️食物質素差，態度又差。ok，唔會再有下次。無環境，無服務，盛惠6百幾，食樓下kfc仲gur

是日同朋友聚餐去左呢間日式餐廳，訂左730但遲左20分鐘先到，好彩都有留位。呢個拉麵落左單一分鐘後就上左菜，懷疑係整定左，因為冇咁熱，紫菜相片中都見到係淋晒，味道唔夠濃，整體一般炸雞軟骨炸物方面口感還不錯，幾香口，由於比較大粒都有少少雞肉食到，感覺好似抵食左，哈哈呢個炒飯有少少腥味，鑊氣係有，但味道一般。今餐最好食都係呢碟和牛粒，仲要加上是日優惠價，味道同質素冇因為平左而hea整，所以呢道菜值得一試！冇咩特別既太卷

喺樓下見到佢個海報好似幾吸引，咁咪想去試下囉。入到去嘅時候我見到全間餐廳都滿座，咁我就見到為呢一張枱係坐到四個人既台無人，咪坐囉。咁我梗係坐落去，我個餐到既時候， 因為我要嘅係刺身定食， 我見到個侍應俾豉油碟我嘅時候，係用手指放在鼓油碟裡面😥😥😥😥，我等左15分鍾個 麵豉湯仲未上， 咪通知侍應，同時，呢個老闆娘就喺我張台側邊內回度步😂😂““50次””， 同時在虎視眈眈我張枱。我用餐時間20分鐘，佢可以喺我側邊行咗內回步行至少50次，可能因為我霸住咗佢張四人枱，但我初頭上到去嘅時候,我等左好耐，係完全冇人理過我。到找數嘅時候佢我就畀80蚊佢啦，我個餐$77鐘,之後佢俾返$3蚊既時候，大力放在台上。😮😮

旺角一向超多日本野食，淨係朗豪坊入面出面都廿幾三十間。今次朋友話想食日本野，上網做功課見到一休呢間餐廳，餐廳係地鐵站附近夠哂方便，另外要book位心諗應該有番咁上下，咁就一於試下啦~餐廳裝修好有居酒屋味道，暗暗地既燈光同週圍掛哂木牌，有種深夜食堂既感覺，幾適合同朋友飲下食下吹下水。呢度叫野食係單點既，種類都相當多，基本上生熟日本料理、沙律甜品鍋物都有。我地兩個人食量有限，就每樣叫少少試下啦!不過魚生係例外的。我地叫左個松剌身盛合，種類夠多，仲有一小板海膽。擺盤好靚，魚生舖滿盤面，每塊刺身切得又夠厚，令人感覺份量好足!新鮮度就更加出色，海膽係用馬糞海膽，又香又creamy，一D腥味都冇。三文魚、吞拿魚同劍魚腩味道鮮甜冇雪味，厚切又特別有口感，唔錯!赤海蝦好細心咁將頭同蝦身仲特登分開左，方便我地食唔使搣殼，蝦味濃得黎又有少少甜，吞落去之後香味仲留緊係條脷上面，整體黎講相當滿意。之後到赤貝壽司，赤貝正如刺生拼盤一樣新鮮，口感爽脆鮮甜，配埋結實既飯同wasabi鼓油，好味!再黎係黑松露三文魚沙律。黑松露味濃郁，同沙律醬意外地夾，配埋新鮮爽口既沙律菜同三文魚刺身，一脆一軟，口感豐富，幾有特色。另

都唔係第一次去! 食物質素差左! 星期六8點上去即刻有位! .燒原條茄子! 燒得麻麻, 太油太濕! 好在有好多蒜, 勁香! 燒牛舌 (朋友話似豬潤)! 我覺得幾好, 都算厚, 不過唔夠脆身, 唔夠香! 燒雞軟骨! 燒雞翼! 例牌嘢, 無特別! 牛油帶子! 唔好食, 好油膩! 魚生沙律! 沙律汁是另上的, 沙律菜很新鮮, 好多角切魚生, 這個不錯啊! 清酒牛油煮蜆! 好大盆! 只得5隻無開, 2隻有沙! 無乜清酒味, 反而牛油味幾香! 黑松露 (醬) 帶子炒飯! 有1小茶匙黑松露醬喺飯面, 有為數不少的角切帶子炒飯, 飯炒得夠香, 不過唔夠乾身! 服務就一般般啦, 明顯哋唔夠人手!

今日晚餐時間嚟食嘢，去到原來都幾多人，問一問原來要book定位，但好彩今日早左嚟，有人取消booking，等左一陣就可以入到去可能一嚟佢位置近朗豪坊，二來聽朋友講呢度嘅日本料理係抵食，所以一早已經好多人，咁我哋就急不及待入去坐低 叫咗啲刺身同壽司食我哋就叫咗海膽刺身、三文魚刺身同埋鰻魚卷嚟到都個賣相都幾好嘅，我哋首先就試咗海膽刺身先，不過一食就發覺啲海膽唔新鮮，一d都唔甜，雖然未變壞，但係好難食，非常失望再試埋個三文魚刺身，佢切得都算厚身，味道就正常，但係啲三文魚都唔算肥美只係普普通通最後食埋個鰻魚卷，覺得個卷反而比兩個刺身好雖然呢度嘅日本料理算係幾抵食，但係我覺得佢嘅質素mama地

好耐沒有到一休吃日本餐了，咁啱經過旺角又看見一休，就即興入咗去食日本菜。一坐低點了香芒乳酪松葉蟹卷$52， 刺身三點盛 ( 油甘魚兩，三文魚腩三，甜蝦兩隻 )$68， 一休海鮮沙律$68，還有壽司。香芒乳酪松葉蟹卷 ~ 價錢抵吃，平時吃日本菜的卷物起碼都要100蚊或以上，這個只是$52， 芒果放在卷上面又甜又美觀，食落都唔錯。刺身三點成 ~ 都算新鮮。一休海鮮沙律 ~ 份量挺大的，而這個價錢來說算是超值。壽司 ~ 點了幾款壽司，味道正常但沒有令人留下深刻印象的感覺。一休的地點比較方便，食物質素中等，對店員的服務態度沒有太大印象，但環境是坐得舒適的。

通常啲人都會食地舖，但今次上樓嘅一休，上到去地方都好乾淨，仲要坐嘅位置都好舒服，看看餐牌點了個雞泡鱼乾，加客海膽軍艦非常鮮甜，再來一個鱼生併盤，質素都不錯！再加埋個牛肉鍋就一流！

星期六行開旺角搵晚餐食，見到呢間日本野嘅餐牌啲野食好似唔錯，價錢算適中，就上左去試下。兩個人點左個槍燒魚生飯，鰻魚飯卷。魚生飯有三文魚，帶子同油甘魚，份量算多。燒完之後啲魚油好香，不過個人怕啲魚油，食到有啲膩。而鰻魚卷正常幾好食。另外叫左個星期六有特價嘅珍寶蕃茄海鮮鍋，$48就有大大個鍋，有唔少蜆，魷魚，三文魚腩骨，青口等等，同埋大量雜菜， 仲加配左個烏冬($12) 落去索埋啲蕃茄湯。另外食夠$100就可以$49.9加配10塊三文魚刺身，好抵食，而且食落都幾香。食咁多野都係大約$250，星期六嘅晚餐算係咁。

係app book左呢間，見openrice都ok多好評，點知伏到喊。叫左兩碟壽司，壽司唔新鮮都唔好食，有冰鮮血水味，食完要吐出黎...唯一正常d係牛油果軟殼蟹壽司，價錢又唔係特別平，唔會再去。希望店家比d心機整好d食物，用d錢同請人寫食評，不如改善下d食物先。服務正常，環境略嫌昏暗，但我覺得呢d都ok。今次中伏既教訓就係唔好盡信食評。😵😵😵😵😵😵😵😵😵😵😵😵😵

突然想食壽司，聽講呢間評價唔錯，就入左黎。雜錦魚生飯：幾新鮮，雖然魚生唔多，不過啲飯好食。鰻魚飯：鰻魚調味得唔錯。厚燒玉子：口感唔錯，我幾鐘意食，不過同行朋友就覺得太甜。牛油果軟殼蟹卷：全場最正，真係想叫多盤。

旺角有咁多野食，有時諗食咩都會心大心細，我朋友就帶左我去一間居酒屋試試，佢話同同事食過覺得唔錯。我地去左都見到有好多人食，差唔多坐滿哂人。黎到居酒屋又點可以唔食串燒呢? 我就一向都鍾意食串燒，所以我就叫左幾款串燒食下。除左串燒下，就叫左一個刺身拼盤、沙律、炸物同炒飯。黑松露三文魚沙律，大大粒三文魚刺身，出面仲有好濃郁嘅黑松露醬，入口有陣陣黑松露香味三文魚又好新鮮，呢個沙律只需要$38，真係物超所值。唐揚墨魚咀，熱辣辣，食之前滴少少檸檬汁同點沙律醬先，先有酸酸甜甜檸檬味，咬落去仲非常香脆可口，仲好彈牙添~北寄貝壽司係我次次去到食日本野都會叫架，都幾新鮮好味刺身拼盤(松) 入面有赤海老、吞拿魚、三文魚腩、劍魚腩同半板海膽海膽夾埋紫菜食同樣好鮮甜同好嫩滑。赤海老啖啖肉好爽口鮮甜，三文魚腩仲有香濃油香味，鮮甜好味。燒牛舌好有厚度，口感豐富，燒到岩岩好，唔會過火。燒雞翼，皮脆肉嫩，仲好多肉汁，好正鰻魚炒飯，粒粒分明，仲有好香燒汁味，炒得好乾身，而且都幾大碟。最後食埋個芝士蛋糕，芝士味好濃郁，而且入口即溶，聽說食甜品係用第二個胃，估唔到真係架~呢間餐廳物超所值，性價比極高，朋友果然無介紹錯

又一天忙到午餐都忘了吃。結果和同事們去了一休吃下午茶餐。一休的下午茶餐是由兩點半開始，至到六點。我叫了一個豬軟骨拉麵，四十二元。有送加州卷，又或者唐揚雞球。而我選擇了加州卷。送的加州卷，有三件，裡面有蟹柳，有青瓜，有蛋，外邊有蟹籽，可能太肚餓，所以一吃加州卷，覺得超級好味。豬軟骨拉麵入面的豬軟骨份量都幾多。肉質都算軟，但軟骨就太硬，硬到咬不斷。所以我只是吃豬軟骨的肉。有一隻蛋。蛋是熟蛋。還有一些木耳，紫菜，粟米等配菜。熱飲要加錢，所以我加了一杯熱檸水。