。數數手指，原來對上一次嚟都已經喺5年前嘅事，時間真喺眨吓眼就過。睇番個環境，好似無乜大變，仍然保持到新簇
。踏入餐廳，一邊喺吧位，俾客人小酌吓，中間就喺用餐區，再入啲仲有一排位，所以，地方都幾大。餐牌以小型報告板形式夾住啲菜單，白色喺食物，黃色喺飲品。不過，未講主餐牌嘅食品、飲品，先點題講吓啲推廣
。第一個推廣喺Tapas Combo，一枝西班牙檸檬啤配一客是日小食，只賣$68；而第二個推廣喺每日優惠，到訪當日喺星期四，所以，一份48個月嘅黑毛豬風乾火腿配一杯紅酒，只賣$98。再講到食物選擇，有超多款西班牙小食，數一數接近30款，然後，仲有沙律、多款主菜及甜品。整體嚟講，都不愁無選擇。飲品方面，由紅白餐酒、啤酒、烈酒、果汁、汽水、啡茶，都一應俱全，當然，更加唔少得西班牙果酒啦。而7:30pm前喺歡樂時光，酒類飲品都有優惠，適合早收工嘅朋友過嚟小酌幾杯。
Estrella Damm Lemon、Red Wine、Sangria $70
酒逢自己千杯少，雖然我哋唔喺酒友，但小酌一杯無問題嘅檸。前兩者喺優惠嘅配搭嚟，小弟就揀咗飲枝檸檬啤，早前就試咗啲本土手工啤，甚有驚喜，而呢枝嚟自巴塞隆納，酒精度得3.2%嘅啤酒，既易入口，又有陣陣檸檬清香，真喺幾好飲。呢度所揀嘅紅白餐酒喺唔錯架，老友就試咗紅酒，都大讚非常之好，酒身好掛杯，入口好醇和。另一位朋友就話嚟到食西班牙菜，點都要試試加入多種水果、玉桂嘅西班牙果酒，雖然喺紅酒底，但感覺變得好清爽，紅酒跟果香好平衡，佢大讚有特色。爆谷雞粒、洋蔥圈配七味沙律醬呢一個就喺是日小食，雖然只喺啲炸雞軟骨同洋蔥圈，但外觀做得唔失禮，而且呢類炸嘢配啤酒就真喺絕配，啲雞軟骨咬落咯咯聲，幾爽口，洋蔥圈好清甜，沾上隻七味沙律醬，食味大提升，又去咁啲油意感。西班牙橡果飼黑毛豬風乾火腿（48個月）一來風乾火腿喺嚟自西班牙嘅黑毛豬，自然質素有一定嘅保證，其次就喺風乾咗48個月嘅貨色，嗰份肉香更加濃縮，外觀色澤深而有光澤，將火腿放入口，先喺有一陣陣嘅鹹香，再有啲油潤嘅感覺，而且，咬落嘅質感，柔韌卻喺肉質細膩。西班牙薯仔軟臘腸蛋餅 $88 講到西班牙小食嘅經典，相信西班牙蛋餅都當之無愧，近乎家家西班牙菜館都有呢一道菜式。厚厚嘅蛋餅煎得金黃，份外吸引，侍應幫我哋切開，不得不讚佢細心，因為我哋三個人，佢就將個蛋餅一開六，每人食到兩件。蛋餅切開，仲有少少流漿嘅情況，所以，啲蛋入口好軟熟嫩滑；內裡填滿好多薯仔粒，仲加有西班牙嘅臘腸，味道更豐富，令口感、食味都唔單一，讚呀！蕃茄銀魚柳多士 $88呢道多士做得小巧別緻，色彩配襯好好，唔好以為喺普通多士一件，墊底嘅脆包喺由西班牙空運過嚟再烘焗，小弟都曾經晌另一間西班牙餐廳食過，所以，翻兜推薦俾佢哋試吓。塊麵包果然好香脆，塗上大量鮮蕃茄蓉，茄味鮮活，銀魚柳同樣嚟自西班牙，並以醋醃，非意大利嘅油浸，肉質緊致，帶點酸醋香，令人好醒胃。炸西班牙青椒 $78西班牙出產嘅甜朝都頗有名氣，之前喺其他西班牙餐廳都試過，真喺幾特別，見到小食當中又出現呢款西班牙炸青椒，故此，再次點嚟俾老友一試。以前食嘅係烤焗，呢次喺炸嘅，但感覺一樣好，炸透嘅青椒軟化晒，入口陣陣清甜味，再晌上面灑上大量炸蒜粒，作為下酒菜，效果真唔錯。西班牙燒乳豬配青蘋果蓉、烤新薯 $298作為香港人燒乳豬仔梗喺食得多啦，不過，西班牙嘅燒乳豬就未必成日食喇，見呢款菜式喺推介之一，當然，心癢癢亦好想試。一客燒乳豬仔都幾大份，乳豬件亦香脆可口，肉質軟熟，帶點油香，最有心思喺配上青蘋果蓉，酸香醒神，口感綿滑，正好中和乳豬嘅油脂，此外，烤新薯亦好有薯香，非常好味，真不愧為招牌菜式。西班牙海鮮炒飯 $268作為西班牙菜嘅代表，非經典嘅西班牙海鮮飯莫屬，餐廳有西班牙墨魚汁飯、西班牙龍蝦海鮮飯，但我哋就揀番最基本嘅西班牙海鮮飯，以正宗嘅「大鑊飯」奉客，面頭放有唔少海鮮食材，包括大蝦、大蜆、青口、魷魚，一睇就知啲海鮮喺靚料，可謂甚有睇頭，而呢個份量，大概可以預2-3人享用。 不單只啲海鮮好有鮮味，飯底加入蕃紅花、海鮮湯去煮，並混入少少豬腩肉，除鮮香之外，更有份鹹香嘅惹味，且入口微微濕潤，飯粒卻好分明，的確好好食。 西班牙玉桂油條 $68去到甜品時段，老套啲都要再試佢哋嘅「西班牙油炸鬼」依款西班牙經典甜點。油條炸得金黃，灑咗唔少玉桂粉，沾上朱古力漿，油條脆而不膩，裡面好軟綿，帶有獨特嘅玉桂香，沾上朱古力漿份外美味。廚師精選甜品 $88本來一份「油條」過過口癮，但大家都覺得未夠喉，追加多一份是日甜品：士多啤梨拿破崙，雖然賣相就做得唔喺好細緻，但用料十足。首先，啲酥皮烘得好酥脆，又富牛油香，中間嘅吉士，綿滑且甚具蛋香，加上放有清甜嘅士多啤梨同藍莓，真喺一啲都唔失禮。今晚，老友都好滿意餐，亦對西班牙菜有咗好多認識，更好欣賞啲西班牙小食。此外，服務值得一讚，主動換碟、添水，所以，整晚用餐都頗舒服寫意。…查看更多
