《米芝蓮指南臺北 2019》繼日前公佈新上榜嘅車胎人推介後，今日公開夜市街頭小吃名單，共有24嘅店家分佈喺8個唔同夜市，當中有15間係首次上榜！包括IG大熱嘅冰火湯圓，50年老店筒仔米糕，人龍店酥脆蔥抓餅等等。
人氣打卡熱店
臨江街夜市 御品元冰火湯圓
近年Instagram大熱之一，店家原本嘅手工芝麻、花生湯圓質素已經唔錯，最特別嘅係加埋桂花刨冰一齊食，啲湯圓好似飄喺雲上面嘅賣相，加上一凍一熱嘅冰火口感令唔少年輕人都去打卡！
圖：斑比
古早台灣風味
南機場夜市 無名推車燒餅
南機場夜市今年有兩間新上榜，呢間由一對老夫婦主理，主打古早烙烤餅，因為人流多所以基本上好大機會食到新鮮出爐嘅熱辣辣燒餅！以蛋形嘅甜酥餅最受歡迎，糖粉加上芝麻香氣誘人。加咗蔥嘅長燒餅同樣滋味。
圖：阿發的簡單幸福
寧夏夜市 方家雞肉飯
喺台北嘅寧夏夜市都食到嘉義名物雞肉飯！熱辣辣嘅白飯加上香噴噴嘅雞絲同肉汁，最緊要係細細碗唔怕飽到食唔落其他夜市小食。當地人另一推介係滷豆腐，口感柔嫩，加醬油膏一齊食最啱。
圖：斑比
延三夜市 施家鮮肉湯圓
捷運大橋頭站附近嘅延三夜市係其中一間今年新上榜夜市，裡面有唔少老字號。好似呢間施家鮮肉湯圓1964年開業，店如其名主打鮮肉湯圓，外皮Q軟而且一咬就會爆出肉汁！香噴噴嘅香菇肉飯亦係每枱必點。
抵食飽肚小食
南機場夜市 松青潤餅
潤餅類似春捲，但唔需要油炸。呢個檔口嘅潤餅就出名夠晒足料，細細一份就有豆芽菜、肉鬆、紅燒肉、豆干、白蘿蔔絲、紅蘿蔔絲、炸豆皮、蘿蔔乾，再灑上花生粉，無論口感定味道層次都非常豐富。
士林夜市 好朋友涼麵
唔少人都話係士林夜市必食小食之一，因為佢地嘅辣油同麻醬調配得非常好！麻醬非常香之餘，辣油嘅後勁增加味道層次，而涼麵更加咗少少檸檬汁，令麵條食落少少清新嘅酸香，夏天食一流。
《米芝蓮指南臺北 2019》必比登推介夜市街頭小吃名單
南機場夜市
阿男麻油雞
臭老闆現蒸臭豆腐
松青潤餅（N）
無名推車燒餅（N）
饒河夜市
阿國滷味（N）
紅燒牛肉麵牛雜湯（N）
陳董藥燉排骨
福州世祖胡椒餅
士林夜市
鍾家原上海生煎包（N）
好朋友涼麵（N）
海友十全排骨
臨江街夜市
梁記滷味
駱記小炒
天香臭豆腐（N）
御品元冰火湯圓（N）
公館夜市（N）
雄記蔥抓餅（N）
藍家割包（N）
延三夜市（N）
高麗菜飯 原汁排骨湯（N）
大橋頭老牌筒仔米糕（N）
施家鮮肉湯圓（N）
華西街夜市（N）
小王清湯瓜仔肉（N）
文：Cathy