開心果甜品人氣持續不斷，開心果fans睇吓呢幾款開心果甜品你試咗未？
法式可麗餅+窩夫 Crepe Delicious 
以法式可麗餅吸引大家嘅西餐廳，即日起至9月30日推出開心果可麗餅雪糕同開心果窩夫雪糕，滿足大家嘅甜品胃～可麗餅餅皮即叫即做夠香軟，夾住開心果cream同鬆脆嘅消化餅碎，再灑上開心果果仁同核桃碎，啱晒果仁控。鬆脆嘅窩夫就唧滿開心果cream再灑上開心果碎同玫瑰花瓣，香氣好優雅，兩款都配咗gelato，冷熱交融特別滋味～
開心果奶蓋咖啡 研香
現時銅鑼灣新店獨賣嘅新品～開心果咖啡(牛奶/黑啡底)最受歡迎，特製開心果奶蓋味道好濃厚，質感輕盈唔會太飽滯。而開心果法國牛油牛角酥嘅牛油香氣突出，面層加上意大利開心果醬同開心果碎碎，整體味道幾濃郁。另外抹茶鬆餅配搭嘅醬料混合美國忌廉芝士同意大利開心果醬，加埋一齊甜中帶鹹又幾夾喎。
西西里島開心果巴斯克 睡飽吃吃
圖：呢款西西里島開心果巴斯克芝士蛋糕真係令人一試難忘，入口滿滿堅果香氣，蛋糕中心位置質感順滑細膩，帶少少流心嘅感覺，而邊緣位都保留咗柔軟口感，完全唔會焗到乾硬，甜度適中，食多幾啖都唔會覺得膩～最驚喜嘅係面層Ｋ加上特濃開心果醬，濃郁堅果香配埋滿滿嘅開心果碎，食落去層次豐富，Nutty香味喺口腔中層層散開，堪稱三重開心果嘅極致享受！
開心果三重奏沾醬麻糬 CATCHI
圖：觀塘人氣麻糬小店推出嘅開心果三重奏沾醬麻糬，呢款麻糬絕對係專為堅果控打造，食法就係將麻糬浸入濃郁開心果醬，再沾滿盒內嘅粗粒開心果碎，一口咬落去，堅果香氣同軟糯麻糬完美結合。佢嘅麻糬係偏向煙韌質地，口感豐富，好滿足！另外仲有推出開心果三重奏麻糬禮盒，送禮又得啫。
開心果雪燕西米露 陳茶館芋圓甜品專門店
圖：wongwy66
一間人氣芋圓甜品專門店推出開心果雪燕西米露，將開心果加入台式甜品中，味道令人驚喜！呢款甜品呈綠油油嘅顏色，面層鋪滿香濃嘅開心果碎，糖水入面仲有煙靭彈牙嘅芋圓、大粒飽滿嘅西米同美容養顏嘅雪燕，好足料。而且佢嘅芋圓比一般嘅大粒，煙靭得嚟仲有濃郁嘅芋頭味同紫薯味，煙韌控一定超滿足。
開心果麻糬提拉米蘇 Owens 
圖：好特別嘅開心果麻糬提拉米蘇，面層鋪滿開心果碎，咬落去又香又脆，中間仲夾住香滑嘅cream同煙靭嘅麻糬，帶嚟獨特嘅軟糯口感，完全提升咗甜品層次！至於底層嘅提拉米蘇，手指餅浸滿淡淡嘅咖啡酒香同奶香，整體口感輕盈又濃郁，每一啖都係醇厚而唔膩，令人好滿足～
開心果芝士蛋糕 Mr. CHEESECAKE (已完結)
圖：品牌（Instagram）
鍾意芝士蛋糕嘅朋友一定對呢個日本品牌唔陌生啦！佢哋喺太古廣場開咗間期間限定店（即日起至2025年2月28日），仲帶嚟超特別嘅限定Mr. CHEESECAKE Praline Pistachio開心果芝士蛋糕。以濃郁嘅開心果醬作主角，配搭滑溜嘅芝士蛋糕質感，每一口都散發出開心果嘅香氣，仲有隱約嘅果仁脆口感，層次感十足。
文：Yanica、Cathy
編：Cathy
