呢排好多麻辣火鍋店開張，辣椒仔們應該好開心。紅磡都開咗間食辣嘅舖頭，不過就唔係打邊爐，而係食香港好少見嘅錫紙貝殼粉絲，幾有新鮮感啊！

餐廳主打湖南菜嘅，由小食到主菜都係辣嘅。呢度招牌菜就係幾位店主喺大陸食過之後覺得好好食，好想引入嚟香港，於是專誠返咗去湖南學廚一段日子。錫紙貝殼粉絲，即係用張錫紙，包住晒所有嘢，包括湯底、沙白、粉絲，另外仲有木耳、茶樹菇、生菜等等索湯一流嘅配料，咁樣就可以鎖住晒啲精華。叫多一兩款其他料例如心心腐皮角、墨汁花枝丸等等係會再開心啲嘅。湯底可以揀要清香辣又得，要麻辣又得，要原味都得嘅，不過建議返，原味都幾清下，除非你想食清淡啲啦。辣嘅程度都可以揀。

沙白冇沙，清甜得嚟索埋湯底嘅辣，好香口，同埋都幾多隻呀。當啲海鮮同配料吸盡湯嘅精華嘅同時，湯底亦都盡得海鮮嘅精髓，好鮮甜。粉絲索湯能力亦甚高，軟硬度適中。

另一款菜式津巿牛肉粉，見到湯底鮮紅色啲，就知道都係辣辣der。一碗起碼有7、8嚿牛腩，好足料。而粉方面，可以揀河源米粉、沙河粉、粉絲或者湖南米粉，幾種粉類嘅索湯力都做得幾好，同埋放耐咗都唔會話變得太腍。湯底嘅牛味香濃，唔使特登飲，就咁食一束粉就已經可以感受到。

主食暫時得兩款，另有7款涼拌小食，繼續都係辣嘅，好醒胃。牛栢葉、豬肚雙拼都得，兩款都好爽口，至於醉凍雞翼，亦算入味，紹興酒味都幾香。

成餐食咗咁多辣嘢，食返個甜品中和返啦。餐廳未有㗎，亦未必日日有貨，就算有貨，都係限量供應，所以要食到呢個原隻濃濃椰皇釀啫喱都必須有啲運氣。打開個椰皇蓋，就會見到椰肉同啫喱連成一體，啲啫喱好清甜呀，原來係用返椰皇水直接製成㗎，食完仲可以刮埋啲椰肉食，唔好浪費！

鮮蒲
地址：紅磡祟志街29號地下

文、相：Kar