今年大家都少咗機會出街食飯，難得出去食嘅一次，當然要慎重揀間好餐廳啦。無論係用餐嘅氣氛、餐廳嘅裝潢，以至食物嘅味道，環環相扣。今次就同大家介紹兩間內外兼備嘅西餐廳，好適合同朋友一齊去chill返日，以美食暫時忘憂。

Oolaa（灣仔、上環） 

香港人出街食飯愈嚟愈有要求，唔止食物質素要高，用餐環境都好重要。呢間餐廳喺灣仔、上環等都有分店，樓底高，環境寬敞，坐得幾舒服，上環嗰間仲有個綠色小庭園嘅位置。餐牌選擇多元化，由意式到法式等菜式都有供應。佢哋更係少數開得勁早嘅西餐廳，每朝7、8點就開始營業，想食個靚早餐以後識路啦？

Oolaa’s any which Way

早餐梗係要食得豐富啲，呢度嘅全日早餐好受歡迎，特別係可以自選早餐組合，可以喺蘑菇、煙三文魚、雞肉、煙肉、甜薯蓉、牛油果、薯餅等等多款配菜中任揀3樣，再加多份蛋多。隻蛋仲可以想點煮都得，煎蛋炒滑蛋定奄列等通通都唔係問題，夠晒彈性。

BBQ Glazed Baby Back Pork Ribs ½ Rack

講到全店最人氣嘅菜式，應該就係呢道ribs喇。大大份好抵食，仲配埋烤粟米沙律同薯條，非常豐富。豬仔骨都幾厚肉下，面層燒至有微微焦香，淋上自家製嘅燒烤醬就更香口，咬開肉質幼嫩，仲有肉汁添。

Char Grilled Wagyu Beef Burger

選用新西蘭和牛製作嘅和牛漢堡，淨係塊堡都勁厚，有成200g架好足秤，肉味香濃又夠juicy，係幾有驚喜。面頭再配埋煙肉同太陽蛋等，一啖真心咬唔晒，記得要淋埋餐廳自家製嘅漢堡醬汁，層次立即提升。

Mediterranean Flat Bread

地中海Pizza同樣吸引，一上枱已經聞到鹹鹹香香嘅parma ham，不過又唔使驚會好膩，因為每塊都放咗好多種唔同嘅菜喺上面，例如有火箭菜、椰菜、菜薊等中和返。值得一提嘅係餐廳特別設有一個280至300度高溫嘅石磚爐去進行製作，所以每塊pizza都非常脆身。

Loaded Nachos

Nachos可以話係最佳嘅佐酒小食，一塊一塊脆卜卜咁，好易食唔停口。呢度炸得薄脆都不在話下，仲加入咗車打芝士，帶有淡淡鹹香。而自家製嘅醬汁先至係精髓，以牛油果、法式sour cream、蕃茄沙沙同胡椒等混製而成，互相配搭，味道平衡。

City Hall Tapas（屯門） 

屯門愈開愈多有特色嘅餐廳小店，好似位於紅橋嘅呢間酒吧咁，環境富有情調，提供多款西班牙小食，氣氛唔錯，幾適合同朋友嚟摸摸酒杯底，chill返一晚。

手打牛肉漢堡

漢堡配啤酒，係好多人嘅comfort food。呢度嘅牛肉漢堡仲要係手打嘅添，特別多汁，肉味香濃。而且相當足料，蕃茄洋蔥肉堡芝士煙肉等，疊下疊下都幾高，視覺效果一流。

法式羊架配薯蓉雜菜

法式羊架肉色粉嫩，肉質軟腍，最緊要係羶味唔重呀。慢慢切慢慢食，好好享受滲出嚟嘅肉汁。

英式炸魚薯條

講到啤酒嘅最佳拍檔，當然唔少得炸魚薯條啦。兩者都炸到金黃色咁上枱，炸魚外皮脆卜卜，值得欣賞嘅係炸漿薄薄地一層，內裡嘅魚肉依然可以保持嫩滑呢。

西班牙烤八爪魚伴辣肉腸

八爪魚同辣肉腸都可以話係西班牙嘅經典下酒菜。海鮮同鹹香肉食配搭埋一齊，各有提鮮功用，令整體嘅味道層次都提升。八爪魚烤得軟腍入味，連埋辣辣地嘅辣肉腸一齊食，係幾惹味。

鵝肝多士伴蘋果金寶及法式奶油多士

鵝肝嘅厚度望落同塊多士差唔多，兩邊煎到微焦，油香豐富，入口近乎即溶，不過就咁食可能會有少少膩，所以餐廳就特意伴埋甜甜酸酸嘅蘋果金寶喺側邊啦。

心動不如行動！有興趣就快啲約埋三五知己去嘆下美食！快啲bookmark定啦！

*以上圖片只供參考，所有食品以實物為準. 食品供應因餐廳而異