如果講到優雅同浪漫嘅餐飲體驗，法式餐館一定係唔少香港人心水之選，今次就精選幾間高水準法式餐館，有名廚自立門戶嘅，亦有溫馨小店，大家喺香港都可以感受正宗嘅法式味道！
法籍米芝蓮名廚坐鎮 LALA 
圖：由牆畫到菜式，中環呢間法式餐廳都充滿巴黎嘅藝術感同浪漫氣氛，絕對係拍拖或慶祝嘅新選擇～餐廳由米芝蓮法國菜餐廳前法籍大廚Franckelie Laloum聯同Michael Larkin共同營運，仲以兩人姓名命名𠻹。主打摩登風格嘅法國料理以更簡約、專業兼具創意技術重新詮釋，其中龍蝦酥盒、火焰安格斯牛肉、燒雞配雞油飯等都係推薦選擇。當然配埋精緻手工甜點同特色雞尾酒，會為整餐飯畫上完美句號啦。
創意法國菜 Maison ES 
圖：ko918918
如果想搵一間環境優雅、充滿法式情調嘅餐廳，灣仔呢間係唔錯嘅選擇。餐廳隱身於灣仔小巷，門口擺放單車同百合花，帶住濃厚法式復古氣息，就好似嚟到巴黎街角嘅精品小餐館。菜式融合傳統同創新，鮮蟹肉意粉嘅意粉係自家製，煙韌有咬口，每條麵都掛滿特製醬汁，微辣惹味，蟹肉鮮甜多汁；銀鯧魚柳配柚子牛油白汁煎至微脆，魚肉軟嫩細緻，搭配柚子牛油白汁，增添淡淡果香同奶油香氣，再加上魚子醬，整體味道更顯奢華。呢間餐廳特別適合閨蜜約會、浪漫午餐或者週末悠閒時光。
典型巴黎小酒館 Nissa la Bella
圖：南法風情餐廳，紅色牆身掛滿復古相框，加上溫馨燈光，讓人一入座就即刻感受到浪漫悠閒嘅氛圍。提供多款傳統法國菜，當中特別推介週末限定brunch套餐，係週末輕鬆享受法式美食嘅好去處！開胃前菜有法國生蠔、法國雞肝醬配脆麵包、法式蒜蓉牛油焗蝸牛等選擇，主菜就有多款經典法式風味，如香煎牛腹肉配薯條，外層焦香酥脆，內裡嫩滑多汁，牛味濃郁，輕輕撒上香草提味已經好正；油封鴨腿鴨肉嫩滑油脂豐盈，搭配普羅旺斯燉菜同濃郁牛肉汁，每一啖都充滿地中海風味，非常滿足！另外仲有咖啡同三款甜品供應㗎～
西環高質法式小店 Bistro Du Vin
圖：呢間位於堅尼地城嘅法式小館裝潢充滿復古氣息，紅色大門好搶眼，入面樓底高，空間感十足。推介菜式有呢道House Made Duck Rilette，自家製鴨肉醬，輕輕用香蔥調味，配埋脆卜卜嘅多士，鴨肉鹹香味濃，絕對係開胃之選。另一道鴨料理油封鴨腿都係必食，外皮香脆，鴨肉嫩滑得嚟有油香，配埋用鴨油煮過嘅薯仔冇得輸；龍蝦湯足足有半隻龍蝦肉分量，口感豐富，湯底夠鮮甜又唔會過分穊身。想喺寧靜嘅西環區感受一頓悠閒又高質嘅法式晚餐，呢間餐廳CP值唔錯！
必試牛肉他他 jean may
圖：呢間位於灣仔街角嘅小店由曾於米芝蓮大廚Pierre Koffmann手下學藝嘅Tiffany Lo主理，主打經典法國家常菜，以時令食材入饌，質素絕對有保證！前菜法式生牛肉他他選用和牛，配上蛋黃、香草、調味料拌勻，入口濃郁軟滑，帶少少微辛辣味道，簡單但極具水準。招牌橙香鴨鴨皮香脆，內裡肉質juicy，帶淡淡橙香酸甜味，每一啖都令人驚喜。甜品棗布甸都唔錯，濃郁焦糖醬完美包裹溫熱嘅棗泥蛋糕，口感綿密濕潤，唔會過甜，加上冰涼香草雪糕更完美～
文：Yanica、Cathy
編：Cathy
