玉桃軒酒家 (鱷魚恤中心)

营业中

休息中

今日放假，和家人去飲茶。整棟大廈有很多茶樓，放假飲茶超多人，幸好很快便有位置，而且不用搭枱。茶樓有幾盞大吊燈，都幾光猛。而且有一大塊屏風隔著，令空間感大點。假日都有優惠點心，不過每款要加$2。叉燒包內的叉燒不會很油膩。馬拉糕很鬆軟，不會很甜。鯪魚球爽彈。叉燒腸熱辣辣，滑溜溜。鮮蝦豆苗餃豆苗足量，皮薄且煙韌。貴妃雞飯不過不失。咸菜豬肚煲的豬肚很稔，但咸菜竟然是甜甜的。馬荳糕凍食，有椰汁的香味。放假飲下茶，食個包，吹下水，簡單但開心。

一早同家人飲早茶，唔算難等位，又坐得舒服。蜜汁叉燒腸$19.8，夠熱，叉燒味香，北菇棉花雞$21.8，巨型北菇片一大塊，相信隻菇好大隻，魚肚棉花都有成三四舊，夠新鮮彈牙，索晒雞湯味，還有滑雞，新鮮、嫩滑。再來早晨孖寶，鳳爪排骨飯加粟米雞粒餃$29.8兩樣，迷你盅頭飯都算夠多餸。粟米雞粒餃真係第一次見，好新穎的配搭，外皮雖然較厚，但餡內雞肉鮮甜，粟米及芹菜粒極爽口，還有冬菇粒，健康食品選擇。重點推介新星，酒樓都有土匪雞翼$48有6隻，皮脆乾身，唔油膩，有啲芝麻香，又夠大隻，我一人食左三隻，超香脆。壓軸叫埋甜品椰汁百合燉雪蛤$38@，椰汁味香，有蓮子多舊雪蛤夠多料，滋補甜品。

星期六同屋企人10點幾到玉桃軒飲茶，地方夠大，樓底高，坐得夠舒服，服務員服務週到，大家都好肚餓，叫左個午市特惠餐套餐$128，包一隻乳鴿，一碟菜，一個火鴨絲炆米，見抵食嘛。另外再加左幾籠點心！上菜效率好快，點左十幾分鐘已上菜，炸乳鴿皮脆香口，肉質夠嫩，多肉汁，火鴨絲炆米都好大碟，熱㷫㷫夠鑊氣，鴨肉都好多！上湯蒜子菜芯，好清甜，最欣賞原粒蒜子炸香，蒜香撲鼻。點心叫了豉汁煎釀茄子$16.8，鯪魚肉釀面，夠彈牙，花膠瑤柱鮮蝦灌湯餃（特點）$29.5，灌湯餃多湯，湯味鮮味濃郁，餃內有花膠、鮮蝦、瑤柱、冬菇粒、蟹柳和豬肉，花膠仲要唔止一舊，好豐富，真材實料！餃皮唔會太厚。香芋鴨腳扎$18.8，我好鍾意食腐皮，索晒啲汁，又淋身，芋頭夠粉，軟綿綿，鴨腳夠入味又稔身。茶錢$10/位，埋單每人唔洗$100真抵食。走時大堂還留意到一大幅花花牆，主打婚宴場地，都不錯呀！

今日和家人一行3人到玉桃軒食晚飯, 呢間酒樓環境唔錯, 很乾淨又唔算嘈吵, 侍應都好殷勤有禮。本身覺得個4人餐很吸引, 但只有豉油雞而非大家想試的脆皮雞, 於是全部散叫。我地叫左4個餸: 上湯龍蝦伊麵, 清蒸沙巴龍躉, 翡翠花姿珊瑚蚌,醬油金蒜脆皮雞(半隻), 3個人食好满足。波士頓龍蝦伊麵 ($238/隻, 伊麵加$48)龍蝦好新鮮彈牙, 伊麵味道唔錯, 3個人食份量岩岩好。清蒸沙巴龍躉($188/條, 約14兩)魚肉好新鮮嫩滑, 蒸得好好味。翡翠花姿珊瑚蚌 ($108/例)裏面有西蘭花,鮮魷,珊瑚蚌,草菇。鮮魷和珊瑚蚌好彈牙, 清清地唔使叫其他菜。醬油金蒜脆皮雞($138/半隻)十分推介呢味餸,隻雞的皮真係炸到又薄又脆,唔會太肥,雞肉唔會乾, 非常好食,真係無揀錯!

好耐冇同屋企人出街食飯，今晚約好去屋企附近酒樓林立既鱷魚恤食中菜，都幾期待。 一行三人都好鐘意食龍蝦，見玉桃軒風評唔錯，就拍板訂台喇。事前一早睇中左有齊多款海鮮既龍蝦沙巴龍躉餐，有龍蝦、魚、珊瑚蚌、雞同紅燒翅等，可惜係四人餐怕食唔哂，套餐內亦只係豉油雞而唔係脆皮雞，於是好任性地打算跟個餐既菜式散叫。見到晚飯孖寶好抵食，清蒸海斑仔配半隻醬油金蒜脆皮雞只係$298。 師奶性格又計埋散叫爭幾多，見脆皮蒜香雞$138半隻，清蒸沙巴龍躉$188，計埋都只係貴少少。 特意問經理兩款魚有咩分別，原來散叫既魚會大少少，咁都係散叫啦。上湯焗波士頓龍蝦 ($238/隻) 伊麵底 (+$48)龍蝦鮮甜彈牙，肉質扎實，三個人分岩岩好。伊麵盡吸龍蝦上湯既精華，芡汁唔會太杰，咸淡適中，略嫌上湯放多左少少。龍蝦鉗啖啖肉好滿足。脆皮蒜香雞 ($138) 半隻皮脆肉嫩，唔會炸得過火，點埋老抽醬汁真係好惹味，有水準。清蒸沙巴龍躉 ($188)魚肉嫩滑有彈性，起肉時完全離骨，蒸既時間岩岩好。翡翠花姿珊瑚蚌 ($108)珊瑚蚌大約有十塊，好足料。花枝、西蘭花、彩椒等新鮮爽脆，最重要係唔油膩夠健康。最後埋單平過龍蝦沙巴龍躉餐，

今日約咗同婆婆一齊飲茶，鱷魚恤中心有好多間，巧合下我地就試試呢間。一入到去佢門口嘅姐姐就好Nice咁招呼你，唔似一啲大型嘅連鎖酒樓對人不理不睬😊點心紙嘅點心款式齊全，部份仲充滿新意，例如薑汁撞奶，海皇脆脆腸👍🏻呢兩者係我嘅最愛！薑汁撞奶嘅薑味太濃，入口輕微嘅辣同埋奶融合，滑而不甜👍🏻👍🏻反而係椰汁百合燉雪蛤就比較啱小朋友，因為椰汁本身比較甜，百合同埋雪蛤就令到好感更加豐富。海皇脆脆腸有六大舊，炸過嘅金網包裹著爽口的椰菜、蘿蔔，口感十分之豐富！淋上甜䜴油也不會影響脆脆嘅口感👍🏻👍🏻👍🏻👍🏻👍🏻👍🏻真係好鍾意！叉燒包鬆軟嘅叉燒蜜汁甜甜哋好幸福呀～～蝦餃王同埋菜苗餃都係非常足料👍🏻👍🏻皮薄餡多

平時都好少過嚟觀塘，行過見到有飲茶嘅地方就同左爸爸去飲個午茶。一出地鐵站B2出口就見到有好幾間酒樓嘅廣告牌，點指兵兵就揀咗呢一間！門口望入去環境都幾大，同埋唔會話好嘈！入到去見到都係一班叔叔姨姨們喺度飲緊茶，好羨慕佢哋平日一班朋友可以坐定定，食個包嘆個茶！🙈午茶 茶介一位＄9 點心紙嘅食物種類有好多！午市仲會有啲優惠美食篇花蝦蒸腸粉食落口好軟滑，有別岀邊食到嘅咁硬同甘膠質！新鮮即叫即做嘅果然唔同啲🤤🤤🤤熱辣辣小籠包小籠包粒粒都咁大粒，而且皮薄肉多！不單止甘，仲好多汁添！食嘅時候真係要小心啲食！唔係就辣親咀🤭🤭🤭之後仲叫咗呢度嘅招牌明爐叉燒皇！明白點解係招牌啦！叉燒以枚頭肉為材料，食落去肉質唔會硬實，肥瘦適中，入口唔會好油膩！配合埋叉燒蜜汁，好正！齋係叉燒，我同爸爸都可以添兩碗飯😂😂😂飲茶食點心之餘，都要嗌返碟油菜心！平衡一下均衡飲食呀嘛！

之前睇過食評 覺得大致上的評價都可以 所以帶佐幾位客一起去食飯。但係感覺好差 一來服務員態度好差（應該話有幾個女服務員的態度好差，又咁啱都係我地俚邊），令到我係客人面前好尷尬。D餸都好一般，感覺上好求其，唔知係唔因為服務態度太差影響佐心情，總之以後都唔會再光顧。

今日放工之後相約母親大人一起食飯。老人家唔鍾意生冷日本菜又唔鍾意辛辣泰國菜，一於帶佢去我公司平時去開的酒樓食小菜啦。一入到酒樓，樓面阿哥招呼我地坐咗有電視的一邊，岩晒我媽一邊睇電視一邊食飯。待應比咗個前菜我地過下口癮先，炸菜雲耳夠爽口，雲耳清腸胃一向都知道玉桃軒的叉燒不錯，阿媽又想試埋燒腩仔，咁不如就叫個燒味拼盤皆大歡喜啦～叉燒一直都係無得輸，蜜味香甜燒到得好惹味，厚薄肥瘦適中我第二鍾意就係油雞，可能我本身好甜，油雞皮好香滑雞肉夠嫩。我媽就鍾意燒腩仔燒得夠香南瓜鮮菌炒帶子，南瓜唔會煮到林晒變蓉咁，咬落都幾清甜。帶子都幾鮮，唔洗點調味已經好夠味，口感夠滑，唔似出面用咸味蓋住啲陳年海鮮扮晒野。母親大人話呢間酒家唔錯，可以keep住食。下次唔洗帶佢試啲千其百怪既餐廳

今日想食中式小菜，去過呢度飲過茶，一於試下晚飯先！今晩想食健康啲所以叫左三味較健康嘅餸！帶子賽螃蟹：賽螃蟹很嫩滑，加上鮮味帶子（睇下粒粒都好大粒吓）和爽脆西蘭花（滿滿咁鋪底）真係好健康又有營喔！杏片黃金蝦丸: 大大粒蝦丸,上面鋪滿一片片脆卜卜的杏仁片，熱辣辣，入口鬆脆，𡁻落夠曬彈牙，味道咸淡適中！😋😋這味三蔥爆遼參，夠晒滋陰養生！！遼參選用上等參，夠彈牙！加上最健康的三色椒，同埋殺死細菌一流的大蒜同葱，又係一味有營嘅餸菜！👍🏼👍🏼

晚上與家人到apm旁的鱷魚恤大廈的玉桃軒酒樓吃晚飯。酒樓的位置非常方便，正正在觀塘地鐵站旁平日的晚上不用排隊，入座後侍應立刻準備茶和開胃小菜。香片清澈而幽香，為飯菜除去油膩感。酸酸甜甜的木耳正式為我們開動胃口！因為醒胃菜是要加錢，若果不吃的話可以先讓侍應收起。「涼瓜鮮班頭腩煲」，魚肉經過滾油炸後再放進煲内，保持肉質鮮美嫩滑，涼瓜亦不澀。魚的份量並不少，所以十分抵食！「蘭片燒汁牛柳粒」，平時常在街外吃不少肉質粗糙的牛柳粒，但玊桃軒的牛柳粒很鬆軟，而且與燒汁十分配合，加上兩個餸都有菜有肉，配答很好！整體來說很不錯

中午打算與同事吃開年飯，見這間評分高，就選這間，點知中伏，打算吃豪點，中午飯叫套餐，誰知道價錢貴、食物差、上菜快到似打仗，性價比極低之選，菜不熱，乳豬肥、不太脆，龍蝦不新鮮，人手少，服務差，叫他慢點上，當你無到，一下子來4個菜，根本來不及吃，你估食快餐店嗎？人均消費超過$400多的午飯，對服務與食物有些要求也正常吧！這樣的食物與服務對得住客人嗎？為了講句公道話，才寫這食評，讓其他食客有所警覺，特別寫這食評，不會再來。

新春期間，襯著假期和家人吃飯，爸媽喜歡吃中菜，所以便選擇了觀塘區這間中式酒樓。新年期間，餐牌當然都會轉為新春好意頭的菜式。 京式片皮鴨 （$388/1隻）👍👍👍👍這個是一食的價錢，二食另加$138。片皮鴨燒得皮脆肉嫩，薄餅熱辣辣，口感帶點煙靭，與青瓜、大䓤和海鮮醬包著片皮鴨同吃，多重美味和口感。唯片皮鴨片得太厚，一隻片皮鴨只切到十多片。玉桃軒小炒皇 （$128）👍👍👍👍小炒皇材料豐富，有韮菜花、紅黃椒、蝦乾、魷魚、蝦粒、腰果等，鑊氣夠，調味適當。菠蘿咕嚕黑豚肉 （$138）👍👍👍👍菠蘿咕嚕黑豚肉，脆炸的粉漿包著啖啖肉的黑豚肉，外脆內鬆軟，酸酸甜甜的咕嚕汁配合菠蘿和青紅椒，味道醒胃。蘭片燒汁牛柳粒 （$138）👍👍👍👍方塊的牛柳粒，肉質鮮嫩又多汁，用了燒汁煑。牛柳粒下還有爽脆的芥蘭。松露菌皇炒蝦球 （$168）👍👍👍👍這碟松露菌皇炒蝦球，材料包括蝦球、西芹、彩椒，什菌，並加入松露菌一起炒。蝦球爽彈肉嫩，松露醬帶起整碟菜的味道。翡翠炒龍躉斑球 （$198）👍👍👍👍這是龍躉斑球配西蘭花和彩椒，龍躉斑球切成厚片，魚片有彈性富膠質，魚肉鮮美可口，西蘭花鮮嫩。

第一次到觀塘呢間酒樓飲茶，非常失望，首先在接待處排隊等攞位，個接待員唔係跟先後次序比位，我同另一位女士提及我地到先架喎，佢都唔理，跟住我懷疑佢特登比個騎呢位比我😔至於環境仲差，好嘈，衛生方面，我見到地下好多用過既紙巾同紙巾袋，環境仲差過舊式屋邨酒樓，至於食物，冇驚喜，個布拉腸粉係凍既，部長幫我換左，再上既係一團粉，最後一個壞印像就係走既時候，係接待處等lift, 又後個接待員，佢大大聲同其他人講，個客埋左單架喇，叫佢走喇，唔好比佢仲坐係度，我地係度等lift既人都覺得好奇怪，點解D員工可以咁無禮貌，仲要當住D客面前咁講，所以我一定要係呢度講，雖然我唔會再黎亦叫D朋友唔好黎，但都希望比佢地管理層知道，真係好差

一個極度唔好嘅跌錢團年飯經驗年三十團年飯就老人家喜歡上去酒樓食， 上openrice睇呢間係觀塘酒樓之中最高分， 咪膽粗粗上嚟試下，本身對駱駝漆大廈嘅酒樓都冇乜好感，上到去全部得套餐貴到飛起，大時大節都唔緊要，啲嘢嚟得耐又唔夠熱又唔好食，餸菜垃圾唔新鮮，人手唔夠服務又唔好，諗唔到有咩長處，五人食都千餘元埋單， 一般屋村酒樓水準，本人覺得名不乎實，一定唔會返再轉頭， 為咗唔會再有人受害，我一定要講返句公道說話