大邊爐火鍋店

营业中

休息中

老店大邊爐最好就係服務！侍應著晒正裝suit咁serve客人，我都係去過兩三次當然就唔認得我，但見佢有客到時叫得出客人個姓就知佢地賓至如歸😆👍🏻我上次同朋友來過今次帶媽媽黎食，一坐低就有酸菜醃蘿蔔超開胃😋😋叫咗個海底椰青雞湯鍋 $128 有好多海底椰，有d肉係腍有d肉就硬d，但全部雞肉都好滑仲有叫咗個餃子好大粒好足料同鮮味，最特別係魚皮餃都係四色入面唔使另外再叫，魚皮好煙韌👍🏻👍🏻跟住有個香咋樣豆卜都幾好食，打開見到一半豆卜一半魚滑，媽咪都好滿意今餐🤭

九龍城食肆大多都係地鋪，仲要泰國菜為主，最近都開左唔少西餐廳，但有間樓上老字號邊爐鋪頭，都係最近有朋友介紹先第一次食。一坐低侍應比左豉油同醬料，乾濕蒜，蔥，辣椒，沙嗲醬，可按自己口味配搭。餐牌都正常係丸餃，配料，海鮮，肉類等等，最吸引我既就係香炸釀荳卜，明明個名好似小食，但竟然係用來打邊爐，炸左既荳卜好薄身，釀左墨魚滑落去好足料，打完邊爐索左d湯係脆同林之間口味很好，感覺有d似響鈴。肉類方面，有個餐點叫做傳說中的封門柳，咁即係必試啦，但隔離有個仲吸引，手切三式肥牛，除左封門柳，仲有和牛同牛粒，來到果然冇令人失望，大大碟亦睇得出手切刀工好好，封門柳果然必食，嫩滑而不失牛肉香。

朋友話打邊爐，要九龍區......係OR搵，搵到一間未聽過的邊爐店（我太孤陋寡聞），睇相覺得唔會伏......就訂位啦﹗一去到；感覺格局有點像高級老派食肆，已經放左一半心；雖然係火鍋店，但食左成晚都唔會煙霧灕漫，環境很舒服；跟住見到店員，都是已上年紀的中年人；西裝畢廷、髮型結實、打扮合宜，又加左分；再睇menu；不是一般火鍋店的食材，有些你睇名都知係手工嘢....只係怪自己只有一個肚，無計﹗兩個女人，叫左傳說中的封門柳、三寶丸、三秒腐皮、生菜、魚皮、蝦丸併墨魚丸.......其實都已經好犀利架喇......封門柳無得輸，無渣，因為我D牙好麻煩，但全晚都無因為牛痴牙，利害；仲要好有牛味；三寶丸係豬牛墨；全部手打之作，好實淨，好彈牙；食完再encore蝦和墨丸；發現墨丸係超水準之作；魚皮，淥5秒仲係好脆；三秒腐皮，其實係響鈴......我自已覺得油味太重了........下次可以skip不過唔好意思，因為太好味，所以忘了影相下次會再來﹗

第二次係九龍城打邊爐，今次試呢間，聽聞係九龍城既老店火鍋，已經有19年歷史，仲要夠近地鐵站😂所以就試一試😙今日收工收得早，6點半已經上到去，即刻有位，之後都陸續有人來😜好彩早左唔使等位姐今晚同好姊妹撐檯腳，兩個女仔叫左一檯野食，雖然餐廳地方細細，但野食質素好高❣️就算係魚皮都係大舊兼好食👍真心無揀錯我哋叫咗脆香腐皮，三寶丸（有牛丸，豬肉丸，墨魚丸），仲有叫咗一碟例牌封門柳😋😋仲有西洋菜，粟米，炸魚皮封門柳雖然只係例牌，但都好大碟，肉質好juicy，仲要厚度剛好，碌一碌擺入口，剛剛好仲要講埋個冬瓜瑤柱湯底，堅係有瑤柱，無吹水😝連裡面淆湯既豬肉，都好淋同入味，好正今晚既食物都好有水準，值得下次再來食🙂

高質火鍋👍🏼實力老店九龍城有咁多食物選擇，能夠喺度屹立19年，呢間大邊爐一定有佢嘅本事😀今日終於可以跟朋友來試一試，簡單而言，佢係一間不賣花巧、比較踏實傳統嘅火鍋店。但係打邊爐最緊要就係個「鮮」字，佢地完完全全合格之餘，仲有好多驚喜👏🏻以下係一啲食後推介：椒鹽墨魚丸⭐️⭐️⭐️⭐️餐前小吃，墨丸彈牙而不油膩，好惹味😋安格斯肥牛⭐️⭐️⭐️⭐️⭐️不得不說，真係貨真價實！肉質彈牙之餘，肉味十足，肥瘦均勻，叫咗碟大嘅都覺得唔夠喉🤣白膳片⭐️⭐️⭐️⭐️⭐️亦係非常新鮮！碎骨已經處理好，大大嘅一片放入口度，非常有滿足感。魚類愛好者必食～滋味牛丸⭐️⭐️⭐️⭐️粒粒手打，牛味十足！如果再彈牙啲就更好，不過已經係水準之上。炸魚皮⭐️⭐️⭐️⭐️⭐️勁脆、勁香👏🏻一定係新鮮炸出嚟先至會有呢個口感。我哋仲食咗好多蔬菜，全部都冇伏好乾淨新鮮。服務態度亦非常好，值得再光顧。

今晚又返風，行過九龍城想食啲暖身嘢，一於打邊爐啦！問九龍城友有邊間推介，佢哋話呢間差不多20年嘅老字號好食。因為唔熟九龍城，所以諗都唔諗，就去試吓餐廳門面唔大，但原來係上樓舖，上到去好整齊，空間感亦非常OK。我哋嗌咗個清湯底，混醬裏面特別推介手做嘅沙嗲醬加咗少少已經非常惹味！打邊爐，最緊要就係碟肥牛。今日叫咗盤安格斯，肉同肥膏嘅比例啱啱好灼一灼就即刻腍身、入口啖啖肉味，真係非常高質。見到枱枱都會嗌魚皮同埋響鈴，原來又係即叫即炸勁新鮮。佢仲可以雙拼咁上，啱晒我哋人少少食唔多，但係又想乜都試嘅爲食鬼。另一推介就係呢個西洋菜帶子餃粒粒脹卜卜真材實料之餘，D帶子肉仲係厚切咁上！淡淡都食到帶子肉，鮮味十足。另一個強推嘅係炸芋頭。佢哋揀嘅芋頭真係冇得輸， 淥一淥就食得，粉粉嘅口感，帶着濃厚嘅茘芋味！出面真係唔容易食到。總括而言，所有食材都睇得出係經過挑選，先至會serve比客 而且服務員會經常過嚟問啲嘢得唔得，同埋落單時會好客觀咁講乜嘢靚乜嘢唔靚，好有親切感同人情味。下次嚟九龍城，大家真係要嚟支持吓呢間高質小店。

高質之『大邊爐』九龍城出名多好野食就係人都知，今晚放工一齊同朋友去咗九龍城『大邊爐』，唔講唔知『大邊爐』原來已經係19年既老店，門面雖小，行入去有條樓梯，上到去地方闊落，裝修唔算豪華，但坐位好寬敞同坐落都舒服，我地兩個人叫左，(湯底) 冬瓜瑤柱 $88：個湯好清甜，好多冬瓜片，仲有多瑤柱粒，瑤柱粒雖然細細粒但好淋唔會好靭，湯底仲有d排骨肉，d排骨肉都係超淋，完全無諗過d排骨肉咁好食，手切安格斯肥牛 $348：油脂分佈十分平均，賣相靚仔，唔會好多根，非常有牛味，三寶丸 $108：牛丸肉質好彈牙，十分香牛肉味，梅菜豬肉丸都足料，梅菜鹹鹹唔會蓋過左豬肉味；墨魚丸入口都好鮮味，整體三種都好有口感，好好食，三秒腐皮 $66：本身唔知咩黎，諗住叫下黎食，原來係響鈴，不過呢個真心好食，比平時出面食開既薄，而且好香豆味，魚皮 $48：十分脆口，而且魚皮唔算好厚，淥完入口都香同咬口唔會靭左，西洋菜 $38：十分新鮮，淥完入口好爽口無渣，粟米 $38：超級甜，正真心，整體都十分好，食物質素高，環境舒服，下次可以再食！

放工當日同朋友去九龍城食飯估唔到小小的樓梯上到去原來是有間火鍋店好好坐好啱朋友傾計2個人叫左個好有牛味的牛肉唔會好多根而且好有牛味個湯底是冬蔭宮好有特式牛丸墨丸手打有口感，好好食仲有新鮮娃娃菜同埋 響鈴配埋啤酒真係飽哂

*此餐廳收取加一服務費。四寶丸（單點$176），和哥滋味牛丸肉質彈牙，牛味濃厚；梅菜豬肉丸好足料，梅菜嘅甜味令豬肉嘅鮮味更加突出；手打鮮蝦丸味道鮮甜；手打墨魚丸食落有鮮味。澳洲帶子（單點$118），肉質厚嫩，食落好新鮮，配料有金蟲草花。東洋金湯（單點$88），內有豬骨、南瓜、粟米、牛蒡，飲落好鮮甜，帶有淡淡胡椒味道。鮮蝦水餃（單點$52），皮薄餡多，蝦肉、豬肉比例適中。支竹（單點$34），豆香味濃。芥醬（兩位$36），包括有指天椒、香蔥、炸蒜、蒜蓉、自家製XO醬、豉油、沙茶醬。酸菜（單點$15），青木瓜口感爽脆，味道酸甜。竹蔗茅根水（單點$72），味道清甜。

好耐都無去九龍城打邊爐，今晚癮起即去！哩大邊爐門口唔大，要上一層先到，不過隱世得黎又好高質🤩我地叫左冬蔭公湯底，酸酸辣辣好醒胃！牛肉方面，個手切安格斯必食！油脂分布平均，有肉味👍🏻👍🏻👍🏻即炸響玲同手打三寶丸都超新鮮，推介！油麥菜都好fresh, 索哂湯嘅辣味，好惹味！

喺九龍城想打邊爐🍲…朋友推介呢間✨佢話由細食到大…開左就嚟二十年嚕～朋友提提我...隔離有部𨋢可以搭上一樓座位好闊落…坐得好舒服～調味架雖然唔算超多…但個沙茶醬好惹味😋！仲有佢嘅自家制XO醬…已經夠好味！仲有佢個酸甜木瓜…打邊爐時間唔中食一舊…食吓食吓成碟俾我食曬。🎈平時叫得多芫茜皮蛋湯底…今次試吓好少有嘅🌟泰式冬蔭功湯底($88)🌟…果然好特別～🎈 偷聽隔離枱讚話🌟肉眼邊肥牛🐮($388)🌟正～所以跟隊嗌左…果然係正！肥瘦適中…好夠肉味！下次一定會為呢碟肉眼邊肥牛再嚟過！🎈每次打邊爐都會叫🌟白膳片($108)🌟…呢間係超…..大……片！熟左都仲係咁大舊….又爽口, 最緊要唔會油膩~🎈🌟東山羊肉片($72)🌟好抵食～唔會有陣羊羶味.九龍城不愧為美食天堂！

落咗成日雨，陰陰濕濕好鬼凍一於搵朋友仔去九龍城打邊爐，今日我哋食呢一間係已經屹立喺九龍城19年嘅火鍋店--大邊爐。呢度嘅湯底竟然有少有嘅泰式冬陰功$88，我哋梗係要試試佢啦 ！ 一上枱已經聞到酸酸嘅冬陰功香味， 湯底仲有唔少豬骨。果然係落足料！肥牛係打邊爐必不可少， 呢度竟然有手切肉眼邊肥牛$388，真係唔係間間鋪都食到㗎。廚師厚切開邊，食落有咬口、彈牙，有牛味。並唔係連鎖店果啲 薄薄一片，食唔知幾碟先食到個口感。東山羊肉$72 呢度啲肉嘅特點係厚切， 羊有羊味但無羊肉騷味， 鋪頭仲配埋特製嘅腐乳醬， 羊肉加埋呢個腐乳醬，簡直將羊肉提升到另一個層次。白鱔片$108 呢度嘅白鱔片真係要大力推介， 白鱔片厚薄均勻，肉質脆而不膩，真係會令到你食唔停口。 佢亦都令我對白鱔片有新嘅觀感。炸芋條$42 芋頭炸完再打邊爐，拎出嚟食仲係原條完整嘅。芋頭鬆化，打邊爐再食小小澱粉質簡直係大滿足。 我同我個friend兩個人食真係好飽， 兩個人慢慢食，傾下偈咁又過咗一晚啦。呢度真係好多人會嚟，食提議大家預約。

朋友約我黎食 話呢間大邊爐🫕火鍋有好多年歷史沙嗲湯底好好味 🤤 一於試試佢 不又想清清地就揀左鴛鴦鍋 另一個湯底就要冬瓜瑤柱湯底 好足料 有好多瑤柱喺入面添一定係要牛牛🐮架啦一份安格斯肥牛同金錢牛展 再一份黑毛豚肉🥩🥩再order左鮮蝦水餃 🥟皮薄餡多 超足料 夠哂一粒 另外再叫左份三寶丸墨丸、牛丸、豬肉丸🍡🍲丸類都係打手 彈牙 淥完大大粒 又爽口 要分幾啖食😎沙嗲湯底 就一定必叫撈丁😎出前一丁！襯埋安格斯牛肉自製個沙嗲牛麵 入哂味 一流呀 食到🤪🤪🤪冬天打係必食架！！

11月打風後，天氣開始轉涼，又到最適合打邊爐季節😂，九龍城比人既感覺係去食泰國菜，但其實有間隱世打邊爐，都好出色，用心做好每一樣材料。今日小篇👧🏻來到9龍城的大邊爐火鍋老店，環境寬敞，比人一種舒適的感覺。⭐海底椰青雞湯鍋一間好的火銅店，首先湯底係最重要的，呢度既清雞湯好香好香椰青味，湯底黃白黃白色，係老火雞湯味道，一開始已經好好飲，入邊仲有好多新鮮雞肉可以食，雞味濃郁，完全冇雪藏味。⭐西班牙黑毛豬唔食牛肉既朋友可以食西班牙黑毛豬，份量多，豬肉味濃沃，唔肥唔瘦，肉質軟嫩。⭐鮮蝦水餃人手自家制鮮蝦水餃，鮮蝦餡料多，包到脹卜卜，仲有8件，新鮮好食。⭐三秒腐皮小篇最愛的三秒腐皮，自家鮮炸，小篇建議浸入湯一秒索曬啲湯汁，口感更佳。⭐時令什菜有西洋菜、生菜、白菜仔，洗得乾乾淨淨，蔬菜新鮮爽甜。#cc_九龍城推介——————————————————💕Encore指數：4/5 💕環境：4/5💕推介指數：4/5——————————————————如果鍾意我既分享pls follow —> @cc_foodie_dairy ☺️💕📍大邊爐火鍋店九龍城城南道12號#大邊爐火鍋店

從地鐵到宋王臺站，行約3分鐘，經過這間毫不起眼的店舖，門口窄小，而且還要上樓梯，抱着嘗試的心態，上到樓梯的盡頭，發覺裏面別有洞天，店舖設計裝潢不算很豪華，但卻很舒服。職員見到我們後，很有禮貌，主動跟我們打招呼，帶我們入座，介紹了頂級象拔蚌刺身，真的非常新鮮，鮮味無窮，店員介紹這是頂級的象拔蚌，不是很多地方可以品嚐到，當然價錢也不是簡單，但我們還是決定試一試，一試之後，真的不簡單，這質素真的對得起這價錢。另外要介紹的是牛肉，牛味濃郁，店員主動地介紹我們怎樣吃不同的部位，有些要煮的時間較長，有些則較短，跟着提示的方法去煮，我們品嚐到跟別家不同的牛肉鮮味。最後特別想提到的是炸響零，新鮮炸物，豆味出色，不論是乾吃，或是浸湯品嚐，都有不同的感受，剛吃的話不會乾涸，浸湯吃就會外軟肉脆，很喜歡這個感覺。很滿足的一頓晚餐。即炸響鈴牛三寶頂級象拔蚌刺身豆豉XO醬，酸瓜