大邊爐火鍋店

营业中

休息中

今晚又返風，行過九龍城想食啲暖身嘢，一於打邊爐啦！問九龍城友有邊間推介，佢哋話呢間差不多20年嘅老字號好食。因為唔熟九龍城，所以諗都唔諗，就去試吓餐廳門面唔大，但原來係上樓舖，上到去好整齊，空間感亦非常OK。我哋嗌咗個清湯底，混醬裏面特別推介手做嘅沙嗲醬加咗少少已經非常惹味！打邊爐，最緊要就係碟肥牛。今日叫咗盤安格斯，肉同肥膏嘅比例啱啱好灼一灼就即刻腍身、入口啖啖肉味，真係非常高質。見到枱枱都會嗌魚皮同埋響鈴，原來又係即叫即炸勁新鮮。佢仲可以雙拼咁上，啱晒我哋人少少食唔多，但係又想乜都試嘅爲食鬼。另一推介就係呢個西洋菜帶子餃粒粒脹卜卜真材實料之餘，D帶子肉仲係厚切咁上！淡淡都食到帶子肉，鮮味十足。另一個強推嘅係炸芋頭。佢哋揀嘅芋頭真係冇得輸， 淥一淥就食得，粉粉嘅口感，帶着濃厚嘅茘芋味！出面真係唔容易食到。總括而言，所有食材都睇得出係經過挑選，先至會serve比客 而且服務員會經常過嚟問啲嘢得唔得，同埋落單時會好客觀咁講乜嘢靚乜嘢唔靚，好有親切感同人情味。下次嚟九龍城，大家真係要嚟支持吓呢間高質小店。