酒屋一杯喜

營業中

休息中

開完會想飲返2杯，完全冇諗過喺天后竟然可以有得happy hour，呢間餐廳唔係同事介紹，都唔知道原來咁好feel，環境好有日本嘅感覺，不停播住日本歌，門口仲要開放式， happy hour傾偈嘈啲都冇問題，除左飲酒，我哋叫咗幾款食物，飽肚得來，又可以送酒。小食細細份，味道真係唔錯，芝士夾梳打餅，咸香味道可以送多一杯酒飲。沙旬魚乾，夠香脆，幾款串燒都做得好出色，尤其鹽燒厚切牛舌好惹味，超級好味。見到隔籬枱食刺身，我哋就少少地點左份5味刺身，有五款唔同嘅刺身，全部都好新鮮，好鮮甜，牡丹蝦特別出色，超級大隻，好有口感，好滿足。飲多幾杯啲男士們開始肚餓，呢度除咗有炒飯同埋拉麵，估唔到連福岡嘅名菜，牛腸鍋都可以食到，個人覺得呢度嘅牛腸鍋比起福岡冇咁肥膩，更加適合我嘅口味，另外醬油拉麵我哋每人叫咗一碗，醬油湯底好香濃，麵質軟硬度適中，最鍾意叉燒係薄切，好味得來唔會食到好滯，飲飽食醉，真係好開心，成班同事已經講好咗下星期要再嚟。