台北倆伴

營業中

休息中

今日放工去咗大圍站嘅「圍方」行街，行咗一陣肚仔餓就搵下午茶食，見到間台灣嘢「台北倆伴」好多人排隊，就入去試吓。大腸麵線拼淡水焢肉刈包 $52呢碗大腸麵線唔會好糊口，味道唔會超級重，麵線份量足夠，大腸都無蘇味。焢肉刈包有一舊五花肉，配上酸菜，中和咗五花肉嘅膩，包都好軟熟，整個配搭非常好。鹽酥雞肉鬆滷肉飯 配紫菜貢丸湯及地瓜酥 $62鹽酥雞味道啱啱好，唔會太鹹，外脆內軟又多汁，令我諗起台灣嘅味道。滷肉飯配上肉鬆好好味，如果可以再多啲汁就會更加美味。跟餐 芋香珍珠奶茶 $12呢杯飲品叫咗小甜，所以甜度啱啱好，有淡淡嘅芋香香味，珍珠都好有口感，唔會好腍。跟餐 大甲芋頭芋圓鮮奶 $18鮮奶好香，攪勻咗之後每一啖都有芋頭碎，間唔中啜到粒芋圓都幾煙靭。古早烤台灣香腸 $56好鍾意食台灣香腸，所以喺香港食親台灣嘢都一定會叫，今次嘅香腸煎得都算幾香，配上生蒜頭，提高咗香腸嘅香味。食到最後唔夠蒜頭T.T。彰化花雕雞卷 $62好香嘅花雕味，食落都有少少酒味，我唔飲酒都覺得好好味，雞卷都唔會好諧霎霎，$62有成6舊係有驚喜嘅。餐廳嘅侍應全部都好和善，有禮貌，食嘢都食得特別開心。