隨心 (已搬遷) 新店位置

慶幸呢個週末天氣好好，可以享受戶外嘅long weekend,真係要珍惜一下。今個週末，去完附近大型商場後，隨心走入咗舊公司附近嘅新加坡馬拉菜餐廳🍴夜晚去到大概7成滿，好在唔洗等位就有得坐。一坐低，發現menu都幾多選擇。最後我地兩個order左無骨海南雞飯，帆立貝喇沙，沙爹串燒，黑椒肉骨茶同埋一個生薑茶。最先上嘅係肉骨茶，熱度啱啱好，唔會太鹹同埋有暖胃既感覺。之後上既laksa好足料，有3隻新鮮帆立貝，蟹柳，魚片同蛋。店員仲好好心提我地要快啲食，避免麵吸左湯。第一口試麵底，米粉mix瀨粉口感豐富Q彈，亦有掛湯功效。順口試個湯，一入口好香蝦乾味同埋椰漿同湯portion啱啱好，唔會太漏或太稀。帆立貝亦大隻新鮮。（之後友善既收銀姐姐同我講話佢地係由新加坡入口十幾種材料再響香港磨碎做個湯底，所以個soupbase好似local laksa咁）接住係令人期待既海南雞飯！用藤藍樣既膠碟上，碟上飽滿既雞同飯配上三款醬汁賣相一流。👍🏻食一口雞，好滑同香，再配一啖雞飯，口感非常柔軟同和諧，食落香而不膩。沙爹賣相好可愛，用炸籃上，沾一下花生醬食好香口，肉質鮮嫩同花生醬夾得好好。最後生薑茶唔太甜幾暖身。