釜山商會

尖沙咀不嬲有條韓國街比所有去唔到韓國嘅人過足韓食癮🥰今次經過見到有新餐廳當然即刻去試一試。餐廳個名叫釜山商會當然就係賣釜山最出名嘅嘢食，食韓國菜當然唔少得試吓佢哋嘅特色前菜6小碟前菜睇落同平時食嘅前菜差唔多，但係味道就的確有少少唔同。主菜我哋點咗釜山豬肉湯飯、肉湯的味道特濃，豬肉肉質鮮美，平時牛肉湯就食得多豬肉湯就真係比較少見。釜山豬肉湯麵，超多超濃豬肉味，而且食麵比食飯更加入味。最後仲食咗店員推介嘅龍頭山塔辣豬骨煱係釜山著名美食，豬肋骨豬肉配上精製濃湯、特製辣醬、新鮮蔬菜同埋勁多勁多勁多嘅芝士，非常邪惡而且份量夠晒四個人食。總括嚟講如果鍾意食豬肉嘅人一定會好開心，加上釜山嘅豬肉絕對唔比韓牛失色，值得一試🤤