麵館皇

營業中

休息中

今日響銅鑼灣收工唔知食咩好，知道登龍街好多好嘢食就同老公過去行吓睇吓~睇完之後發覺嗰條街好多餐廳都試過，唯一係呢間麵館王冇食過，可能因為入口唔算好起眼所以一直都冇意欲行入去食~ 我哋見反正冇試過就入去試吓啦，點知酸菜肉碎令我好有驚喜其實我一向都比較鍾意食湯麵，但因為嗰日天氣真係好熱所以唔想再食熱嘢，於是就決定叫個撈麵試吓~ 肉碎辣度適中之餘唔會太肥膩，夾埋酸菜食非常開胃，完全係夏日消暑恩物老公就叫咗成年人不作選擇嘅藥膳灌湯麵，乜餸都有齊夠哂飽肚~ 唔好見到藥膳呢個名就驚，其實佢藥味都唔算太濃，所以唔特別鍾意藥膳料理嘅人都唔會抗拒，值得一試~ 另外我哋仲叫咗個雞翼都係水準之作，炸得好脆~ 不過成餐飯令我最懷念都係個酸菜肉碎，我諗佢會成為我日後黎銅鑼灣嘅必食之選