スーパー丼 (駱克道) (已結業) 查看

早前於報章得知三位年輕才俊乘着租金回落於銅鑼灣黃金地段租下舖位開丼飯店，用上築地食材炮製刺身丼。刺身最重食材新鮮，既然講到每日由築地運送抵港，去開銅鑼灣又一試無妨。餐廳風格日式，裝修簡約，有小型吧枱。丼飯有刺身亦有熟食，對刺身丼比較感興趣，北海道海鮮丼有大拖羅、油甘魚、帆立貝、海膽、三文魚籽等，食材豐富，就叫上一個，再加20蚊有沙律同麵豉湯。沙律除沙律菜外亦有柚子肉同蟹肉，沙律菜新鮮爽脆，柚子肉清新再加上鮮甜蟹肉，沙律只需略加調味就已經好清新開胃。北海道海鮮丼除刺身外仲有牛蒡漬同蒜頭漬，兩種漬物都酸清爽脆。刺身方面，先嘗油甘魚，油甘魚口感柔軟細滑，入口甘香，油份豐滿。大拖羅雪花紋滿佈，入口即溶，油香滿瀉，但又唔會滿口肥油，真係十分滋味。帆立貝用檸檬片分隔，雖較薄身，但亦腍身甜滑。海膽鮮甜毫無腥味，入口即溶，貨色比得上活海膽。三文魚籽充滿光澤，脆卜卜一咬即破，滲出點點魚油脂香。北海道海鮮丼整體海鮮刺身量多飯量較少。