Moodie Wine & Dine

營業中

休息中

收工約左舊同事係娛樂行睇夜場，係附近周圍行吓睇吓有咩野食，行過和安里成條街好多餐廳，經過呢間餐廳門口見到人地叫既食物賣相唔錯，價錢又唔貴，就行入去試下先。餐廳佈置得好地中海風格，下層適合2人世界，另外有條旋轉樓梯上一層，可以一大班人聚會。 餐牌選擇唔算多，嘢食雖然配搭簡單，但食落又幾有驚喜， 我哋叫一個前菜、一個主食、一個甜品。前菜係西班牙傳統蒜油大蝦，每隻蝦都好重蒜油味，超彈牙，帶少少辣，味道好夾。萬眾期待既主食慢煮伊比利亞黑毛豬配秘製杏脯醬，食落好juicy而不膩，配埋嗰張酸酸甜甜好開胃，加埋香滑薯蓉，食到停唔到口。食完主菜都已經8成飽，埋尾加多個甜品先至完美，甜品原本想試西班牙油條配朱古力醬，可惜賣晒，店員就介紹試佢哋個蘋果金寶，蘋果蓉再加埋肉桂嘅香味，酸酸甜甜有熱辣辣嘅果蓉，配埋凍冰冰嘅雲呢拿雪糕，簡直係絕配。值得一讚喺餐廳店員好細心，當我哋食完嗰頭盤，店員好主動講主菜要多少少時間準備，中間好留意我哋需要,適當時候添水同換餐具。