Vision 8

放工約咗朋友去荃灣行陣，隨意行下睇下有咩晚餐食，經過兆和街有間西餐小店，決定入去試試！首先送上餐包，意想不到餐包都好有誠意又好食，令我充滿期待！有一片薄脆多士、兩款麵包都係烘過，外層脆脆地，配上黑松露牛油！蕃茄水牛芝士配意大利香草醬 $98————————————又Fresh又豐富嘅前菜，水牛芝士屬於淡芝士，比較適合大眾口味，加埋蕃茄一齊食，令成個感覺更fresh，再加上香草醬，有淡淡嘅橄欖油香味，層次感更豐富。烤美國極佳級肩胛牛扒 $288————————————非常特別，因為有得揀芥未籽汁，味蕾可以多一點點🤏🏾刺激。果然係極佳級，牛肩胛嘅脂肪含量較多，肉質鮮嫩具彈性、味道濃厚。我地Order五成熟，內裏做到半生熟效果，好滿意。份量又大，真係抵食！小元貝•西蘭花忌廉汁燴意大利飯配 加拿大海膽 $218————————————燴飯做得剛好，意大利飯外軟內韌，裏面仲有一點點生嘅口感。加拿大海膽味道濃郁，質感軟滑。蘋果金寶配雲呢拿雪糕 $78————————————有驚喜，特別嘅做法，金寶形成一粒粒Cube，非常香口！好似食緊烤烘過嘅曲奇，軟化左嘅蘋果切成一片片，配上特有嘅醬汁，好好食！