影片
更多
2022-06-01
370 瀏覽
老闆娘米線真係見唔到好耐米線關注組啊同埋好多foodie去食，大家都大大力推薦話好好食又抵食，但呢間舖頭都好有個性要睇佢哋社交平台先知佢哋開唔開門，同埋喺街市入邊啊環境比較一般，坐得唔太舒服比較迫，堂食有冷氣嘅，同埋等嘅時候都幾熱嘅！一場嚟到同大家試盡咁多款小食，盡食盡寫食評(正常去食唔好叫咁多餸，會飽死🫣但啲嘢真係幾好食又平，感受到係有用心去做米線，全部嘢都係自家製，起碼食完都唔覺得口渴冇味精。第一次去食嘅小貼士(真心奉上): 1.首先去佢哋社交平台睇吓嗰日會唔會開門。2.真係唔想等咁耐嘅話，最好4:30去到排隊，咁應該好好彩會食到第一輪嘅，舖頭5:00開門。3.真係唔好太遲去，因為太多人嘅話佢哋會截單。一碗米線包一個餸 $48 額外加餸加$12🍴蒙古湯 小辣 (9.5/10)湯底真係冇得輸，蒙古湯好香孜然同胡椒味，係比較重香料味道嘅，飲落好香孜然味同埋少少辣，有少少麻，食完個嘴會好㷫，個辣都係接受到，雖然會出汗但唔會辣得好辛苦，唔係好食到辣嘅真係唔好再加辣了，會頂唔順的。米線煮得比較淋身，份量超級多，女仔嘅話真係可以少米，食完係會超級飽，仲有好多新鮮嘅肉碎到好香，食得出鮮肉嘅味道，
但啲嘢真係幾好食又平，感受到係有用心去做米線，全部嘢都係自家製，起碼食完都唔覺得口渴冇味精。
第一次去食嘅小貼士(真心奉上):
1.首先去佢哋社交平台睇吓嗰日會唔會開門。
2.真係唔想等咁耐嘅話，最好4:30去到排隊，咁應該好好彩會食到第一輪嘅，舖頭5:00開門。
3.真係唔好太遲去，因為太多人嘅話佢哋會截單。
一碗米線包一個餸 $48 額外加餸加$12
🍴蒙古湯 小辣 (9.5/10)
湯底真係冇得輸，蒙古湯好香孜然同胡椒味，係比較重香料味道嘅，飲落好香孜然味同埋少少辣，有少少麻，食完個嘴會好㷫，個辣都係接受到，雖然會出汗但唔會辣得好辛苦，唔係好食到辣嘅真係唔好再加辣了，會頂唔順的。米線煮得比較淋身，份量超級多，女仔嘅話真係可以少米，食完係會超級飽，仲有好多新鮮嘅肉碎到好香，食得出鮮肉嘅味道，又有芽菜蔥花，口感好豐富，真心個湯底係精粹，好好飲。
🍴麻酸辣湯 小辣 (9/10)
集齊麻，酸，辣落一個湯，真係滿足食辣嘅朋友三個嘅願望！飲落好香，少少酸多多麻好香辣，飲得出好多香料辣椒去整，真心有水準，好飲嘅湯底。可能我唔太食得辣，飲咗少少朋友嘅湯底已經覺得好辣頂唔順(食個譚仔酸辣嘅)，但鍾意食辣嘅朋友一定會愛上呢個湯底！(個人鍾意蒙古湯多啲因為比較溫和食得冇咁辛苦🤣🤣
🍴招牌酥炸雞球 (8/10)
三大舊雞球，即叫即炸，個皮好香脆，炸得唔乾，雞肉都有肉汁，略嫌雞球有少少鹼水味，可能醃得太重手，冇期望中咁好食，但都唔錯，起碼抵食大件！
🍴酥炸鯪魚球 (8.5/10)
鯪魚球食到有鯪魚肉味道，口感比較紮實實心，覺得幾唔錯但得三粒又少啲。
🍴反斗蝦膠豆卜 (3/10)
呢個真心好失望，豆卜吸晒啲油，炸到超級硬，真係要浸下個湯先食到，咬落去第一啖就勁油膩，好似食咗一啖油咁😥蝦膠又少，真心不了。
🍴秘製豬腩肉 (9/10)
冇諗過豬腩肉咁好食，有醃製過鹹鹹香香，豬肉炆到好淋，咬落去好香口，油脂入口即化，真心點解冇問推薦豬腩肉，真心好食過雞球喎！
🍴魚肉腐皮卷 (4/10)
魚肉份量勁少，少到食唔到魚肉嘅味道，食落去好普通，好似得一舊腐皮咁，加呢個餸唔係好化算。
🍴野菌腐皮卷 (7.5/10)
呢個都好多人推介，腐皮好香脆，入邊有好多菇同粟米，比較清新，個人就覺得OK好食，比較鍾意食肉多啲🤣
推薦指數: 9/10
真心覺得佢哋嘅湯底真係好好飲冇得輸，但係餸嘅話真係好壞參半，睇你識唔識叫啦，好多人都話炸物比較出色，今次叫咗大部份嘅炸物真係好食嘅佔一半，雞球，鯪魚球，腐皮卷一定冇問題，其他就麻麻哋啦，個人都推薦豬腩肉幾唔錯㗎！抵食好食高CP值，不過記得叫啱餸，我都可能期望太大失落會大！記得食之前一定要做功課如果唔係去到可能冇得食！
張貼
