大圍小館

營業中

休息中

今晚叫咗半隻茶薰雞同埋蜑家鴛鴦魷，呢兩個餸都係佢哋嘅招牌菜，另外是日例湯係花旗參紅棗烏雞湯，再加埋個甜品小食脆皮炸白兔牛奶糖，非常滿足的一晚。佢個茶薰雞做得非常出色，隻雞嚟到嘅時候一放上枱就已經聞到好香嘅煙熏味，佢嘅煙燻味仲維持咗好耐。通常咁重煙熏味就代表佢啲雞肉有機會煮得太耐，但係師傅真係好嘢，啲雞肉仍然好嫩滑，又入味又嫩滑係好考功夫嘅。個花旗參紅棗烏雞湯非常足料，睇吓湯渣幅相就知道，每人都飲到兩碗。蜑家鴛鴦魷好好食，兩種魷魚一個鮮甜一個重魷魚香味，配合得非常好。個脆皮炸白兔牛奶糖其實就係炸鮮奶，不過鮮奶入面加咗大白兔糖溶出嚟嘅糖漿，又唔會太甜，所以覺得幾好，佢仲有幾粒大白兔糖拌碟。呢間嘢仲有糖水送，今晚係薏米白果腐竹糖水，非常足料，仲要免費送，真係好抵。