One Pho You (已結業)

有日突然好想食蕃茄蟹肉湯檬，左搵右搵之下就發現左呢間越南菜餐廳，係出呢個食評之前已經食過2次，分別食左：🦀蕃茄蟹肉雞絲青口湯檬($85+10%)因為真係好想食所以諗都冇諗就秒點左呢個🤣賣相好有心思，非常適合打卡。配料好豐富，青口有4大隻，亦有大量蟹肉，麵都比得多，但係雞肉反而就唔係太搵到，整體嚟講份量算大，就算好肚餓都會夠飽。不過個湯就覺得有啲失望了，蕃茄味唔夠濃，味道偏淡，調味亦仲有改善空間🥥椰奶亞答子冰(套餐轉特飲+$15)店員將飲品送到嚟個時，提醒如果覺得唔夠味先落糖漿，當時都覺得幾奇怪，第一次見椰奶類飲品會提供糖漿。飲落去就明白個用意，因為都真係幾淡....未到要落糖漿既，但就係處於個種又唔甜又唔淡既尷尬味道，而且椰奶味亦唔濃，係亞答子既口感幾得意，但唔會想飲第2次🐷燒豬頸肉扎肉撈檬($85+10%)第2次嚟就試下佢地既撈檬，揀左全走青所以先睇落冇咩顏色。配料依然比得重手，有好多片豬頸肉，3大塊厚切札肉，同埋酸醃菜，反而檬粉就偏少。豬頸肉整得唔錯，帶啲脆口又夠爽口，醃菜酸酸甜甜咁好開胃。至於撈檬既靈魂甜酸汁<碌冧>，落少少已經相當夠味，呢個撈檬比上次食既湯檬好食