新華茶餐廳

營業中

休息中

今次早餐時段嚟食，發覺都幾多人幫襯，好多都係街坊幾個一齊嚟。餐廳有兩層，呢啲都係舊式茶記先會有呢個設計，不過今次坐係下面，無緣坐樓上。🥢沙嗲牛肉公仔麵+餐包配火腿奄列、熱奶茶最怕沙嗲牛肉被‘拿’到淋哂無口感，呢度嘅沙嗲牛就無呢個情況，食落係滑之餘仲有咬口但唔係靭，醬汁唔會過鹹，撈埋硬度適中嘅公仔麵一齊食，非常正。奄列入面係火腿粗條，數量都多，但偏油，餐包不過不失，因為凍咗😂😂熱奶茶嘅茶澀味我覺得啱啱好，啱我口味。依家舊式茶餐廳愈嚟愈少，好多新開嘅都叫冰室，感覺無得比。呢度仲保留住舊式茶記嘅人情味，食緊嘅時候會聽到伙記同食客閒談，落單又唔會叫你用QR code, 落完單伙記直接同廚房講，唔會入機再傳俾廚房，所以有時會聽到佢哋鬧交，好好笑！下次再嚟試下蛋撻西多士先！