客家原味粉

營業中

休息中

Item: 客家原味粉
Rating: 3
Author: 奧志雷

8 食評

味道

環境

服務

衛生

抵食

478

紅磡

$51-100

客家菜粉麵/米線湯品雲吞/餃子

奧志雷

等級4

2.1K

有露天雅座，夏日炎炎當然坐裡面嘆冷氣！盡量遠離門口，不想吸住吹入的二手煙食飯呢，討厭！生意旺等出奇，點幾已爆棚滿座，好采有個單丁位給我攝埋去搭檯，到食完埋單 30 分鐘過後都依然有食客在等位中。嬸嬸稱師傅們太忙已經取消客家炸醬撈麵及紅咖哩，陰功無緣一試。

食飽飽後再買外賣美食贈好友，淨肉丸、淨豬手各 1 碗，菜肉份量跟粉麵一樣，價錢都一樣，真的這樣計嗎？美食要靜候 30 分鐘最基本，午飯黃金時段仍舊食客坐滿，堅係越食越旺，比最初到訪時暴升一倍。明白的，我都無發脾氣，用最大的耐性坐定定靜候。

熱奶茶，奶味濃而茶味清淡，質地夠滑可以的。熱檸茶走甜，濃濃的紅茶散發少許甘苦味道，浸浸檸檬後更有點點澀澀的，消滯醒神。辣椒油，香辣並重，不馬虎不求其，豐富有料到有質素。

一品湯即食麵走蔥，意外地居然係即食麵不是生麵。肉丸不得了非一般的手打豬肉丸，比火鍋店更高質更出色！先來結實再來彈滑入口，爆汁豬甜味拍手叫好。鯪魚球跟肉丸一樣有料到，散發清淡魚味，鮮而不腥，彈彈幼滑的質地使我更想咬多兩口。肉片鬆鬆腍劈劈，濁氣的醃味。豬手爽脆的豬皮及手筋，沒什麼特別感覺，似白雲豬手。粉腸滑啫啫嚥嚥韌韌，豬甜味顯著，不苦不澀。

豬膶乾乾的，膶味濃郁中規中矩。鮮冬菇水潤多汁，菇味清甜。菜芯翠綠爽嫩多汁，菜甜味出眾。湯汁清澈見底竟是濃厚甜美，肉味突出醇喉，還有蔬菜鮮甜，泛著陣陣酒香酒甜味道，熱烘烘忍不住連翻品嚐。估不到即食麵滑彈高質，爽爽的不過腍，吸盡清湯精華每滴可口，撈上刺激香辣辣椒油更是如虎添翼大啖啜！

豬手魚腩即食麵走蔥，豬手雖然手毛粗粗有點吉，啖啖肉依然非常滿足。豬皮爽脆像白雲豬手，瘦肉結實嚼勁十足，釋放出強烈豬肉甜味，高質表現。還破開豬骨，可以食到其中骨髓，貼心細心。真材實料豬肉豬骨清湯濃郁甜味，還有陣陣生菜鮮魚味道。新鮮度爆燈的鯇魚腩，入口便知龍與鳳，根本呃唔到人既。

充滿活力的鮮魚味，甜甜的魚汁，嫩嫩的魚肉，肥美的身軀灼得剛好無過火，沒有挑剔的機會。師傅煮麵功夫了得，賜我高級爽麵，如果能用高湯烚就更入味啦。

豬雜河粉走蔥，豬肉豬骨湯次次飲到一滴不漏。可遇不可求啖啖肉豬手，塊豬皮係就係有少少吉脷。隔離阿叔都唔洗成舊掉左去咁浪費既，最多咬走表面少少粗毛啫！豬雜都唔係好雜乍喎，只得粉腸豬潤兩款。河粉綿滑吸湯透徹，味道鮮甜美妙極了！味道質地均一流攞滿分，最衰太短太碎夾唔起，要用羹連湯帶粉倒入口。

肉丸鮮牛肉番茄湯米線走蔥，明明餐牌寫住可以選青菜湯或番茄湯，突然番茄湯要加 $8 蚊？師傅我要走蔥架！不情願地半推半就取回廚房幫我挑走，麻煩晒喎。非吃不可的手打肉丸，點解咁好食架呢？客家人肉丸非吃不可，不公開的奧義。滑嘟嘟極鬆軟腍劈劈牛肉，醃味濃厚。完整發脹米線，沒有過腍粉口，可能天生粗身，彈滑長長不散碎，我愛食嚥韌的米線。湯底真的有花時間與番茄滾過，不是粗製濫造，泛紅的湯汁充滿鮮茄甜酸味，香甜開胃飲得一滴不漏。

豬膶豬手河粉走蔥，濃濃甜美的客家高湯，清徹見底香醇順喉。豬手啖啖爽肉夠滿足，脆脆豬皮，鬆軟豬肉，咸香得宜，美妙絕倫。完整綿滑河粉拖著上湯跟辣椒油，狠狠地大啖大啖地啜，刺激興奮食慾暴走，米芝連 4 星無話可說，只是乾硬豬膶扣點分數。

番茄湯肉丸鯪魚球即食麵走蔥，乒乓波般大小鯪魚球先彈後綿滑，清新魚鮮味絕無投訴。用誠意滖過的番茄湯紅卜卜，色香味俱備特別甜美醒胃。大過乒乓波豬肉丸加兩隻番茄連幾片唐生菜，落足料 $50 蚊碗即食麵真係可以好飽，而且超級美味極幸福！白烚即食麵有點失望，其實麵質彈彈滿意，最敝充滿滾水味，用湯煮麵真的那麼困難嗎？

素菜湯米線走蔥，還預計湯底會極度淡茂茂，誰知比肉湯更濃郁厚身呢！加入大量雜菜滾出醇香菜甜味，無限豐富！紹菜、番茄、菜芯、青瓜、金菇、雲耳、紫菜、冬菇、豆卜，千變萬化應有盡有。比肉丸豬手魚腩湯更出類拔萃超班馬，完全出乎意料之外，絕對 5 星級數。就算幾冧檔幾忙都好，大舊師傅都貫徹始終，揸緊宗旨絕不會馬虎了事，不會求其煮熟就出貨給食客，誠意滿載，大家要耐心等候。

用心烚到蔬菜味道溶入靚湯中，內外熟透滾熱辣，爽嫩爆汁。菜甜味非凡使我十分陶醉，初時呷幾啖湯時已經覺得奇怪，怎麼能煮到這麼濃郁鮮味，原來紫菜才是精髓，所有鮮甜味被引發出來，還懂得用紹菜做膽，永遠超級甜美可口呢。

滾熱辣新鮮煮起，溫度極高想食快少少都非常困難，最後都要花掉 5 分鐘才能消滅，渾身發熱發亮暖笠笠。連湯帶米線捲起時蔬掛埋辣油豪氣地不停大啖啜入口，堅燙嘴燙脷不過越熱越好味。彈滑米線略為散碎不夠長，要分很多次，要啜很多啖才可完全消滅殆盡。靚湯飲到見飲底咯，怪您過份美味，失禮晒。

牛肉青瓜撈即食麵，竟然連撈麵都有蔥，花點時間慢慢續粒挑走。準備就緒開動，痕痕大大注吸入，感覺非常清爽醒胃！簡單調配辣油、麻油、豉油、陳醋，像撈起又像沙律。夏天良伴佳品，要耐心等候的美食。鮮氣清甜青瓜番茄，還有爽爽雲耳，大量鬆牛肉片滑嘟嘟，醃味濃郁。撈麵比湯麵更爽滑，掛著酸咪咪微辣醋汁，連肉啜得開心美妙，食慾飈升，迅間消滅。

魚腩鯪魚球番茄湯米線走蔥，輪到煮我碗河粉時，剛好河粉沽清已經不太高興，再見到我碗米線鋪上米粉碎米線碎，就更上火！還以為比錯我添。賣相實在太驚嚇，被炸到肢離破碎再仲件砌回的嗎？求其成堆凌亂不堪倒出黎就算。要我花點時間盡晒力執得整齊一點才拍張遺照，亂七八糟無眼睇﹗已幫襯無數次，每次我都讚不絕口好味好味，首次例外地極度難食！

鯪魚球強烈蔥味還有點點腥味，鮮甜味強差人意，不夠彈不夠滑，實實的不喜歡。魚腩骨多，還給件魚鮫我嘆呢！幸好魚肉還是滑滑的，不過魚鮮味偏淡。師傅是否知道湯底淡茂茂，所以加點草紙想吊吊味呢？好采我還食得出，即刻吐出黎﹗淡如水的湯汁，唯有加入大量辣椒油，感覺好得多。米粉彈滑，衰在太散太短，食得不暢快。正常情況下湯汁必定被我幾乎完全飲掉，這碗不可能吧！

沙薑雞飯，消失的雞髀，師傅何解要收埋我隻髀？我一向雞鴨鵝都淨係食髀架﹗全部都係胸全部都係胸，搭舊雞翼仔，話晒都係熟客，竟如此對待我？斬得乾淨利落無骨碎，大小得宜均稱，排得美觀得體。室溫咸雞皮薄滑滑，不肥膩無肥膏，瘦瘦的鋼條類型。

胸肉嚥韌微量肉汁，散發清淡咸香及少許雞甜味，整體滿意平凡合格。沙薑醬淡淡的乾乾的，沒怎麼的薑辣味，咸咸的而少少甜，撈飯味道有點單調，立即混上辣椒油變得生動立體晒。辣椒油沙薑醬撈飯，好送飯好胃口，不經意清滅掉所有白飯添，人家減緊磅架，太可惡！

蠔油生菜，看餐牌照片一直以為提供菜芯，原來係時菜不一定啊。淋上大量熟油，閃令令真的有點太多，閃亮反晒光！滾上鮮味蠔油，熱熱的爽甜鮮嫩，簡單灼菜都可以好好味！特別係那幾棵甜美生菜芯，無可替代。蠔油菜芯，菜甜味濃郁真的不錯，翠綠鮮嫩沒有半點渣，只是太腍太油。

鮮菇雞蛋蒸肉餅飯，苦候 30 分鐘的蒸肉餅，等到頭髮都灰晒。見師傅即叫即製新鮮即蒸，我原諒您啦！頂上鮮菇雞蛋蒸肉餅 5 粒星，食到乾乾淨淨碟底都舔埋！有趣的造型深深吸引著我。鬆軟如餐肉，多汁如蜜桃，醃味濃香醇美，優質品種！熱烘烘燙嘴最興奮，大大舊肉躺在白飯上，無可抵擋的魅力，誓要塞爆嘴仔，完全填充脹卜卜才是真正滿足！

客家滷水鴨飯，就算食鴨飯唔食湯粉麵都要等 25 分鐘。似乎剛係屋櫃拿出翻熱，中間幾舊凍凍地。消失的鴨髀？何解食雞無髀，食鴨都一樣無髀？師傅自己食晒還是留起氹女呢？滷水汁雖有點單調，依然清爽不咸不濁。鴨胸結實有肉汁不乾硬食得過，辣椒油滷水撈飯勁開胃提升食慾，不經意白飯全部清晒！我都話少飯咯，係要迫我既，勁衰呀！

豬手肉丸番茄湯河走蔥，肉丸漩渦不能自拔！番茄湯頂級，豬手達標，河粉究極。番茄湯頭特別甜美醇厚，不用再添調味，滾熱辣帶著完整滑溜河粉大注大注衝入口，幸福打冷震！豬手兩件，其一啖啖肉勁爽彈肉味濃泛著咸鮮，另一手指位毛髮粗壯鬚根一樣吃不消。刮嘴刮脷的感覺不良好，唯有去皮只食筋肉，脆脆的食等過癮。

粉腸青瓜撈米線走蔥，色彩繽紛七彩斑斕，顏色好靚，胃口全開﹗細心地將米線跟食材及醬汁撈勻，微暖輕煙飄飄，不是冷麵來的嗎？粉腸韌韌瘦瘦的，不肥美不彈滑，還帶有陣陣苦澀味道！似乎師傅們對粉腸處理不是強項。青瓜爽脆多汁，醃味散發咸香有誠意，混上鮮茄雲耳更是醒神。醬汁濃郁酸酸微辣十分惹味，米線暖暖的太濕太腍煮得過火咯！以這道菜作尾聲，雖然有點強差人意。

客家原味粉 營業中 休息中

客家原味粉

營業中

休息中