スーパー丼 (駱克道) (已結業) 查看

那些年，喺各路「大碌喼神」降落前嘅黃金時代， 銅鑼灣近SOGO一帶曾經有小日本之稱。縱然而家銅鑼灣已經係另一回事，今日竟然撞入一間令人幾驚喜嘅日本餐廳 - スーパー丼 Super don。見佢專食丼，感覺又乾乾淨淨，去吧！平時喺香港少食海鮮丼，因為去過太多嗰啲乜乜水産，打正旗號賣魚生飯，但食到嘅都係啲唔多新鮮，又或者係貴到爆但啲魚碎上到搵笨嘅飯。今日坐低見到隔離枱嗰碗海鮮丼個樣都幾精神，仲要加$20轉套餐，就有埋麵豉湯同埋蟹肉沙律，梗係試吓啦。先嚟嘅北海道海鮮丼無令人失望，裡面有大拖羅、油甘魚、帆立貝、蟹棒、海膽同埋三文魚籽，豐富嘅畫面先「色」奪人。食落更加發現所有刺身鮮甜美味，厚厚的，好足料，最重要係連wasabi 都好好味喎。呢個魚生飯真係無叫錯，未有機會去日本，止住渴先。同行有唔想食生冷嘢，但又想食海鮮嘅朋友，所以亦都叫咗一個醬燒廣島蠔丼。呢個熱丼都等咗一陣先上菜，但嚟到見到個燒蠔脹卜卜，等吓都抵啦。個蠔咬落好鮮甜，加埋個醬汁，拌埋啲煙煙韌韌嘅日本米，真係飯都扒多兩啖！