牛奶冰室 (何文田廣場)

營業中

休息中

美食沙漠終於開多間新食嘢，食晏時間當然又會係大排長龍喇。二人座位相對上會快啲有得入座，唔想等嘅就提前打外賣專線嗌定先。瑞士雞翼撈公仔麵 $52配有牛乳炒滑蛋同蒜香牛油多士。多士邊焗到有啲黑，蒜味好濃同埋有一層厚厚嘅牛油，而滑蛋就比較熟。公仔麵味道好甜，感覺瑞士汁都落咗大量糖。雞翼有三隻，食到裡面嘅肉係冇乜味嘅。麻酸辣牛肉炸響鈴米線 $47湯底味道都好濃郁，麻辣味比酸味出，係愈食愈麻。響鈴好吸湯，牛肉份量正常。米線煮到有啲漲，口感都好腍，份量多到都食唔曬。蜜汁叉燒煎雙蛋飯 $58呢度嘅叉燒係厚切版，肉質有啲韌，比較難咬開。雙蛋煎到剛剛好，一拮開就會有蛋黃汁流出嚟，撈埋飯食即時冇咁乾。厚切豬扒勁香蔥油飯 $56豬扒真係好大一塊，完全遮蓋咗個飯。豬扒係意想不到咁好食，啲肉好腍，仲帶有少少嘅甜味。蔥嘅份量係好多，飯帶有蔥油香味，但就略嫌有啲太油。