壹玖捌叁

營業中

休息中

今晚帶了老婆去跑馬地的壹玖捌叁食晚餐，餐廳是朋友介紹我去的，這裏的中菜價錢屬中上價，但食材屬高。我們點了一個二人餐，每位都是$500，已經有翅有鮑魚食。香葱油海蜇花：海蜇爽口彈牙，香葱及麻油味濃郁，令原本無味道的海蜇增添不少風味。脆香牛油白飯魚拌椒鹽茶樹菇：白飯魚及茶樹菇外層薄薄的粉漿，炸得外脆內軟，加了點胡椒粉及鹽調味，簡單好味。蟹肉竹笙煲仔翅：濃郁的金華火腿味道，還有一絲絲的雞肉及蟹肉絲，其中雞肉絲條條幼細，蟹肉鮮甜，魚翅爽口，每啖都有金華火腿味道。松子蟹肉芙蓉蝦球：蝦球結實爽彈，一定是新鮮蝦肉，炒蛋白內有些蟹肉絲，有蛋白香同時又有蟹肉鮮味。鮑汁玉掌扣五頭湯鮑：鮑魚厚身，肉質腍及彈牙，咬落去有肉汁，鮑汁味濃郁，越咬越有味，簡直唔想吞落肚，鴨掌炆得又腍又入味。濃汁牛肋骨煲：牛肋骨炆得很嫩腍，濃郁的牛肉汁味道，紅蘿蔔更是吸引了湯汁精華，十分入味。鮑汁章魚雞粒炒飯：炒飯比較濕及腍，但裏面十分足料，有蝦肉、冬菇粒、雞肉等，還有鮑汁味道，入口香濃。最後食埋個甜品，合桃露味道濃郁且幼滑，而且不會太甜，十分滿足的一餐。