陳儀興玫瑰餐廳

營業中

休息中

一間出色嘅火鍋店就算位置唔太方便都總會有好多客人慕名而啾，好嘢當然要返食，暫時嚟講食過咁多間火鍋店，呢間真心性價比高又老實。大概七點嚟到舖頭都差唔多坐滿人，上次食過無蝦有蟹鍋非常有驚喜，所以今次就試海鮮濃湯黃金甲鍋 (需提早預訂）。海鮮濃湯黃金甲材料有粟米、南瓜、大量蜆同大肉蟹等等，湯鍋滾起後店員不停提醒我哋記得飲多幾碗湯，果然無介紹錯湯底真鮮甜有蟹味，我同朋友都不約而同飲咗兩至三碗先開始食，蟹鉗大大隻非常鮮甜。第一次叫呢款手打魚麵都幾有驚喜，放落個鍋煮耐咗都唔會斷開，魚味突出口感彈牙，口感有啲似切絲嘅炸魚片。上枱時嚇咗一跳第一次見咁大粒雲吞，食落先知原來裏面有成隻蝦喺度，果然貨真價實。松露豬肉丸用豬肉剁碎加入黑松露搓成，每碟有八大粒，食落有咬口之餘帶淡淡松露香氣，口感層次豐富。本身諗住食手切肥牛，不過侍應介紹啱啱有吊龍，所以就轉咗食呢款吊龍，吊龍肉味濃郁有嚼口，難怪咁多人鍾意食。雖然係雙拼但係份量都唔少，鮮滑牛拼鮮魚片兩款都好正，魚片晶瑩透亮少少骨都無啱晒我呢啲懶人，新鮮滑牛肉質鮮嫩，無論煮餸、燒烤、打邊爐都一樣咁正。