沙田凱悅酒店咖啡廳

營業中

休息中

Item: 沙田凱悅酒店咖啡廳
Rating: 5
Author: derek_hysteric

Cafe

414 食評

味道

環境

服務

衛生

抵食

29427

沙田

$401-800

多國菜自助餐酒店餐廳咪嘥嘢食店無翅餐廳

232

資訊:
餐廳:	沙田凱悅酒店咖啡廳

為鼓勵食肆透過提供食物份量選擇和採取減少廚餘措施，與顧客共同從源頭減少廚餘，環境保護署推出了「咪嘥嘢食店」計劃，參與食肆如符合評核準則將獲「咪嘥嘢食店」認可資格和獲發「咪嘥嘢食店」的標誌及標貼，以供張貼於店舖內和宣傳，供顧客識別。此計劃全年均接受申請，申請費用全免。

詳情可瀏覽：https://www.wastereduction.gov.hk/zh-hk/waste-reduction-programme/food-wise-hong-kong-campaign

derek_hysteric

等級3

新年之後疫情數字一路高企，成兩個月冇出街食飯，因日疫情數字開始回落，就同阿爸阿媽去沙田凱悅酒店嘅Cafe放鬆一下。

之前兩老生日已經嚟過一次，佢哋都好鍾意！所以今次都繼續食呢一間！貪佢近，價錢又合理！

先講餐廳內嘅室內設計。樓底高，座位亦都唔算密！坐得都好舒服！又有自然光喺落地玻璃度透入嚟！冷氣嘅流通一流！外面仲有一個露天平台，可以出去曬吓太陽吹下自然風，都幾寫意！佢哋嘅防疫措施仲做到好足，喺攞嘢食嘅範圍分咗出口同入口，唔係好似平時咁樣可以四周圍都出出入入，然之後喺個入口嗰度佢哋特登搵咗個staff企響度幫每一個入去攞嘢食嘅客人唧hand sanitizer! 你唔可以唔用！佢會追住你叫你消毒雙手！

先講Appetizer！老實講種類選擇都係正正常常，唔算太多嘅！但係好就係好在佢每一樣嘅質素都好好，魚生海鮮都係超新鮮！佢嘅蝦係好甜食落口有咬口嘅！三文魚刺身超肥美！仲有帶子刺身都係五蚊銀咁大個！原粒上唔會同你開半！仲有馬刀貝壽司係驚喜！佢啲翡翠螺好細心咁樣幫你掹咗殼！仲連螺尾嗰啲內臟都幫你清埋！呢一個細心值得讚！真係貴精不貴多！

然後再講熱食！有好多都唔會喺出邊啲自助餐見到嘅嘢，好似有鹹菜豬肚湯啦！呢個真係勁好飲，好飲到一個點我要飲咗三碗！仲有蕃茄薯仔湯，個味勁住家！佢個玉豆炒帶子先至係一絕！有新鮮淮山，勁清新！燒鵝同叉燒都好好食！唔怪得呢間凱悅嘅中菜咁出名！仲有酸菜魚同埋同埋蒜蓉蒸龍躉！啱晒我至鍾意食魚嘅老竇！嘩！差啲唔記得講佢個鹹蛋黃炸魚皮！痴線！我都唔知點解會咁好食！利申我係冇收錢做宣傳嘅，但係佢個鹹蛋黃炸魚皮真係堅好食唔係同你講笑！

但係佢嘅西式熱食就真係遜色咗少少，選擇唔算多，都幾普通，但係佢個燒羊假真係一絕！我叫六成佢真係做到六成俾我！勁tender! 我仲要講埋佢用嗰個Mustard ！佢個Mustard好好食呀！真係好想問佢用邊個牌子！對上一次有燒肉眼扒，我同我媽唔食牛，但係根據我老竇所講係好食嘅！仲有個廚師推出嚟喺你面前切，做到好高級嗰個感覺！

佢啲 cold cut都係好食嘅！Parma Ham同埋Salami 都好有水準，連喺出邊食自助餐有八成機會會中伏嘅煙三文魚都好好食呀！最鍾意佢個沙律有柚子大蝦沙律！佢啲柚子真係成楷成楷咁樣放喺度俾你拎！真係食到好開心！

好！到講甜品嘅時間喇！佢嘅甜品選擇都算多！有Waffle雪糕Sorbet ，佢啲cake都好精緻！上次有個Mandarin Mousse同白桃Mousse都好好食！但係都唔夠今次個拿破崙好食！佢個酥皮做得好鬆化，然之後中間啲吉士可以啱啱好唔太甜！據我阿媽同埋我老竇嘅報告，佢個芒果蛋糕同埋佢個香橙蛋糕都好好食！個蘋果批就爭少少，個餅皮有啲硬！

一個咁有質素嘅自助午餐，佢而家做緊八折，我哋一家三個人去食都只不過係$1200有找！價錢勁合理！

仲有要讚下佢哋啲Staffs! 服務細心，又有禮貌，收碟速度理想！果然係高級酒店質素！搵日再去過先！

*呢個食評入邊啲相我會放一啲上次去嘅相！因為有啲嘢我想一次過同大家分享！