豐盛牛肉麵

營業中

休息中

放假喺屋企煲劇耍廢左全日，發現肚餓嘅時候已經到咗夜晚～於是又慣常咁打開OpenRice睇吓土記有咩好西食，發現呢間豐盛牛肉麵未食過，於是就喳喳臨換衫落去試下佢～呢間小店除咗有牛肉湯麵之外仲有其他唔同嘅台式料理，包括滷肉飯、乾拌麵，仲有好多唔同嘅台式風味小食，選擇花多眼亂！最後我都係揀咗個紅燒牛腩牛筋面，加多杯珍珠奶茶試吓先，好食嘅先下次再嚟試其他～呢碗牛腩牛筋面好大碗嘅，上面有兩三舊好大舊嘅牛腩+加兩三舊牛筋～ 首先試一試一個湯底先！第一啖飲落去覺得佢偏淡，心諗湯底嘅顏色咁濃烈，但係點解咁淡呢？之後再飲多啖就發覺個湯底係有啲菜甜味再加少少牛肉味，好好飲！飲完個咀仲會有啲漿住嘅感覺，但係絕對唔會覺得口渴，我敢寫包單一定冇落味精！你見我差唔多飲晒成碗就知！我睇返個Menu先知原來佢哋嘅湯頭係以新鮮牛大骨加入炒過嘅牛肉再加大量蔬菜慢火細熬而成，唔怪得個湯咁甜咁漿口！至於個牛腩，就相對冇個湯咁出色，食落係鬆化嘅，不過有啲瘦，所以食完會勁攝牙罅！至於個牛筋都炆得好林好入味嘅！至於個面就正正常常啦，不過就唔係好掛湯！整體來講成碗牛肉麵嘅份量真係好大碗，質素亦都唔錯嘅，個湯底就真係個人覺得做得好出色