劉興記生煎包專門店

營業中

休息中

呢間生煎包係網上評價唔錯，今日專登走嚟試吓。餐牌全日適用，無分午餐/下午茶/晚餐。皇牌套餐S1：招牌上海排骨菜飯+生煎包一隻（$54）無咩期望下嘅炸豬扒幾好食，炸衣好薄但仍好脆，而且唔油淋淋，內裡豬扒軟嫩有肉汁；反而菜飯就乾身得滯。生煎包底層脆身，咬開小洞啜湯汁，味道可以，吸哂湯汁後一啖放入口，肉餡中仍有湯汁，整體不錯，但如果再熱烘烘啲就更好。皇牌套餐S4：鮮雞湯小雲吞12粒+生煎包兩隻（$54）湯底清清哋帶少少味；小雲吞一口一粒，皮薄，味道正常。呢個餐跟嘅生煎包比飯餐嗰隻再熱少少。上海小籠包4隻（$40）新鮮熱辣，皮算薄而且帶少少煙韌，唔會好易整穿。同樣先咬穿一個小洞吸啜湯汁，然後成粒食，湯汁及肉餡嘅味道同生煎包相似。百步香蔥油餅（$28）餅十分鬆化，雖然咬落口感偏厚身，仍然食到好鬆化嘅感覺，但略嫌蔥餡比較少，所以香蔥味唔夠。另外想讚嘅係，個蔥油餅一啲油都無，完全唔覺油膩。套餐奉送豆漿，而且仲可以無限添飲。味道接近無糖，少少豆味。