尚鮮海鮮料理

營業中

休息中

有日經過佐敦，心血來潮想打邊爐，於是要搵咗間望落去質素幾高嘅火鍋店朋友shabushabu下～我哋揀咗鴛鴦湯底，一邊係三菇湯底，一邊係麻辣湯底。麻辣湯底值得一試，啲料浸落去真係索晒啲味。反而三菇湯底略嫌似清湯，唔太食得出有菇味，但入面啲菇係幾好食嘅。見到有一版menu都係牛，所以就嗌咗手切安格斯牛肉，食落去肉感幼嫩，同平時任食嗰啲真係唔同，果然要單嗌先會食到呢種質素嘅牛肉。當然唔少得叫牛柏葉，配埋豬皮，一上枱見到啲牛柏葉好大塊，應該唔會好似平時咁淥淥下融咗消失埋。果然皇天不負有心人，淥完好易搵返上嚟，仲唔會縮水縮得好誇張，算係打邊爐嘅一大樂事。我哋仲嗌咗啲丸類，分別有椰菜香菇餃配雲吞，同埋四寶丸。兩碟都真材實料，餃入面啲餡冇濫芋充數，香菇餃皮薄餡靚，鮮蝦雲吞連入面啲豬肉都係鮮嫩嘅。平時打邊爐都係食牛丸貢丸腸仔呢啲加工丸，四寶丸係免治肉丸同埋墨丸滑蝦滑，雖然係貴咗啲，但都值呢個價錢。另外麻辣湯底真係唔惹小，所以我哋嗌咗兩罐椰青水解辣，但成餐飯都食得好開心，因為係樓上鋪，都幾有私人空間。