聽開K-Pop嘅人通常都好鍾意食韓國嘢，尖沙咀就出名多韓國餐廳任君選擇。上星期同friend去咗諾士佛台嘅啤啤Bear韓國包車，上到去已經俾佢啲裝修驚艶到，好cyber y2k嘅感覺，淨係打卡都有排打，very ig-able! 舖頭裏邊一直播住kpop，好有feel❤️‍🔥用手機落單，基本上咩都有得食，炸雞、燒烤、麵、煎蛋捲，送酒一流！ 我地一行二人叫咗辣炒小章魚五花肉、芝士吞拿魚蛋卷、招牌炸豬腳、甜米露。 一坐底上泡菜是基本吧，跟住就有新鮮熱辣辣章魚五花肉，其實唔算好辣，炒得幾入味，仲有椰菜，份量好足。 芝士吞拿魚蛋卷超級巨型，切開即刻見到芝士拉絲，應該無人會唔中意食。 最後上枱係招牌炸豬腳，配咗生菜俾係包住一齊食，仲有辣醬同介末醬。豬腳炸到超脆，肥瘦肉分佈適中。我哋一致認為呢個最好食！ 埋單人均二至三百蚊，食得飽環境又正，下次會再嚟飲酒🍻

前排天氣好凍，所以好想食啲暖野，咁啱喺銅鑼灣fashion walk附近竟然發現咗一間好隱世嘅日式餐廳，主打食日式火鍋。 舖頭店面嘅設計非常簡約，而且座位與座位之間好寬敞，好有privacy。睇返Menu有好多選擇，主打食壽喜燒同埋日式火鍋。經店員推薦之後，我哋叫咗犇盛合套餐。每人只係$398，但已經包咗刺身、沙律、海鮮、肉眼、牛小排、雞件、烏冬等等，超級豐富。 我哋揀咗原粹豆乳豚骨湯底，非常之濃郁稠杰，一上枱已經聞到陣陣豆香。刺身好大塊，有鮮味。個沙律都係偏大份，特別鍾意個醬汁，好開胃。 之後就輪到肉類上枱，分別有四種肉，包括澳洲一級肉眼、美國安格斯牛小排、美國牛五花同埋無激素春雞。個人就最鍾意牛五花，烚完放入口有溶化嘅感覺，好正！ 至於海鮮就有帆立貝、虎蝦等等，全部都好新鮮，食到我哋舔舔脷。配埋個野菜拼盤，索晒湯底個精華，冇得頂。very recommend!

大角咀利奧坊嗰一邊慢慢轉型，由舊區開始變咗好有活力嘅社區，仲多咗好多餐廳。有日探完朋友之後就去咗附近一間好有情調嘅西餐廳同埋酒吧，裏面座位唔多，全部都係高身嘅吧枱，侍應服務態度好好，熱心同我哋介紹Menu。 我哋一行兩人叫咗四樣嘢，包括西班牙辣肉腸($68), 蒜香橄油炒野菜($88), 脆炸原隻魷魚配香辣蛋黃醬($128)，主菜就叫咗烤焗美式BBQ醬豬肋骨($268)。 嘢飲方面餐廳有一大個酒櫃display咗各種形式嘅酒，目不暇給。因為我哋都唔係成日飲，所以叫侍應幫我哋推介。紅白酒各自叫咗一杯，兩杯都好易入口，而且冇澀味，好順滑。 野菜充滿牛油同埋蒜香，有四季豆翠玉瓜同埋菇類，又唔會太油。 西班牙辣肉腸配酒一流，香味多過辣，係十分稱職嘅佐酒小食。 魷魚勁好食，炸到好酥脆，但係又唔會覺得好粉，滴多兩滴香檸汁，再配埋蛋黃醬，勁有衝動嗌多一個。 最後上碟嘅係豬肋骨，大過我隻手掌！侍應話BBQ醬係佢哋自己整，好惹味。下面仲墊住薯條同埋粟米，我哋兩個人都差啲食唔晒。 總結呢間餐廳好有驚喜，啱晒情侶過嚟食慶祝飯，嘢食質素好高又有情調。

呢排政府話要搞旺夜市，咁我哋梗係要促進經濟，夜晚飲番杯去消費😆朋友推介我哋去尖沙咀一間遠離繁囂嘅酒吧餐廳，佢有室內同室外座位，不過因為嗰日天氣唔係幾好所以我哋就坐入邊。 餐廳裝飾好有地中海特色，圓形大拱門震懾眼球，而且成間鋪都係用白色為主調，俾人感覺好舒服。 我哋叫咗三樣嘢食，包括避風塘風味炒蜆墨魚麵($148), 炭燒牛柳配黑松露蘑菇醬($238), 蒜香白酒清酒煮蜆($158)。話明係酒吧嘢飲梗係有好多選擇，侍應特別推介左佢哋餐廳嘅signature cocktail，一杯butterfly($98)，同埋一杯homemade grapefruit gin tonic($98)。 兩杯雞尾酒都好fancy，用咗好多花花草草做點綴，打卡一流。兩杯飲落去都好fresh，特別係杯gin tonic，散發出淡淡嘅西袖香，好好飲。 清酒煮蜆配咗四個包，將佢點落啲汁度食，索細啲精華，識食一定係咁食。蜆同青口都冇腥味，而且份量都多。 墨魚麵個口感彈牙，避風塘口味有少少辣，好似花椒咁樣，不過出奇地又同啲意粉好夾。 最後上碟嘅炭燒牛柳，非常之鬆軟，切嘅時候幾乎唔使用力，個黑松露醬尤其出色，一啖牛柳一啖醬再配埋一啖薯蓉，ok please take my money😍

本身已經係家後嘅超級fans，喺我心目中係全香港最好食嘅餃子❤️‍🔥知道佢最近開分店即刻衝過去試吓！去到鋪面同以前好唔同，新店行文青風格，仲賣埋咖啡，啱晒平時喺度chill一chill。嗰日仲見到有藝人嚟買外賣😍 朋友第一次嚟食，所以我叫佢咩都試吓。灼餃子我哋揀咗韭菜豬肉餃、菠菜豬肉餃。至於煎餃子我哋就揀咗小籠包豬肉餃、雲耳椰菜豬肉餃。 餃子一如既往地多汁多料爆好食，我就最鍾意煎小籠包豬肉餃，真係好似食緊一個小籠包咁樣，超級Juicy。點埋喼汁就真係可以一個人食20件。 灼餃子個湯底係精粹，嗰日係螺頭燉野生菌，超級入味，我同朋友完全將佢飲晒，無得頂。 另外仲叫咗個沙薑雞中翼、日式住家飯糰，當然唔少得最出名嘅開心果芝士蛋糕！好彩我哋去到仲有貨，強烈勸喻大家一定要早啲去😆 飯糰同出邊食嗰啲好唔同，相對上健康，同埋有好多料。至於芝士蛋糕真係用好食都唔足夠形容，一入口就好似溶咗咁樣，質地好似Movie，食極都唔停，好想買晒成底返去😭

最近喺土瓜灣行街，發現新開咗一間街坊Pizza店，俾佢門口寫嘅優惠吸引再去試吓。 舖頭環境都幾骨緻，我哋咁啱坐咗喺招牌下面卡位，招牌好sharp。舖頭採取QR code落單，咁橋當日係星期三，中批餐有8折，可以揀一個中批、一個主食、一個小食、兩杯嘢飲，折完只係$200，超抵！ 我哋揀咗呑拿魚特色千島醬厚批、白汁意大利海鮮焗長通粉、焗肉丸配香草腸。 Pizza上枱香味撲鼻，材料有菠蘿、粟米、吞拿魚同埋煙肉，好均勻咁分配喺個批面。個批底非常之鬆軟，原來係舖頭自家製，好推薦。 長通粉同埋小食都好食，特別係長通粉落咗好多料，有勁多海鮮，性價比極高。 另外我哋都單叫咗一個招牌炸雞、炸芝士年糕(6件)。芝士年糕咬落去好似流心嘅感覺，一定要趁熱辣辣嘅時候食，忍唔住一啖接一啖。個炸雞都好鬆脆，雞肉非常嫩滑，一啲都唔鞋，價錢仲平過連鎖快餐店，質素都好啲。 買單我哋兩個人都係$300唔使，食到勁飽，之後經過一定會再試其他口味嘅Pizza。

朋友喺西環住左一排，佢介紹鳴虎係佢飯堂，終於有機會試下。店舖好骨致，以木系設計，大概坐到20人。佢以拉麵為主打，我今次試咗佢哋嘅博多黑蒜油拉麵、四國香蔥油拉麵同埋芝士魚條拼魚餅，真係無介紹錯！ 博多黑蒜油拉麵係用黑蒜油調味，湯底濃郁，拉麵又彈牙，而且好掛湯再配上豬肉同蔥花，味道好豐富。叉燒厚實，肥瘦適中，索晒黑蒜味。 四國香蔥油拉麵係用豬骨同埋蔥熬製，再加上四國香蔥油調味，味道清新又夠濃郁。每款都有配一隻流心蛋，好有蛋味。每碗只係$88，性價比高。 最特別嘅就係佢哋嘅小食芝士魚條拼魚餅，一咬落去芝士噴射出來，好惹味，加上口感酥脆，鮮嫩多汁，好好食！如果帶小朋友食，一定食唔停口。 值得一提係店員好nice，服務十分周度。我地食完仲去左附近食糖水，如果大家去堅尼地城半日遊，都可以參考呢個吃貨路線。

平時去蘭桂坊多數都係飲酒，最近有個friend介紹和安里有間新開法菜，個vibe好chill，而且性價比高，所以跟佢去試吓。 門面好吸睛，出邊種咗好多綠色植物，有個好光嘅燈箱招牌。一入到去店面比較細，原來仲有一個旋轉樓梯可以上樓上用膳，上面較private。 夜晚dinner set $338 包湯、餐包、前菜、主菜同甜品。 粟米湯超濃郁，上面仲有sour cream，包烘得好脆，好啱浸湯食。 店員推薦我哋食雞胸，一開始都無expectation，點知一咬落去完全唔係平時雞胸諧霎霎嘅texture，成嚿肉都好腍，好似雞髀肉，好impressive!再配埋特製醬汁同檸檬汁，更加提鮮。 另一個主菜叫咗紅酒燉牛肋條，配薯蓉同紅蘿蔔，炆得好腍，啖啖肉。 甜品我哋加錢叫咗個coconut sorbet afogato，呢個都係超特別，第一次食到。椰子雪芭融入咗去椰子殼入邊，再臨上熱辣辣嘅咖啡，冰火交融，我同朋友都俾100分！❤️‍🔥

平時去長沙灣廣場都只係想涼下冷氣，打個白鴿轉，點知前排經過3樓發現開咗好多新餐廳，其中有一間日式居酒屋好吸睛，裝修得好有格調，好似去咗日本深夜食堂嘅feel，於是趁朋友生日決定去chill吓。 成間餐廳環境唔大，我哋被安排坐喺吧枱。一坐到去就俾咗牛蒡茶我哋飲，啱晒而家春天要去濕，好貼心。 佢有好多cocktail揀，店員推介我哋試青い，混合咗vodka, 荔枝同埋菠蘿汁，成個感覺好Fresh，外表都好打卡-able👍🏻 我哋叫咗兩款佐酒小食，分別係鱈魚片、炸池魚仔。兩款都炸得好爽口，配上特別調製嘅醬汁，一啖接一啖唔想停。 店員推介我哋食味椒鹽鮑魚，一上到枱已經聞到好大浸香味，咬落去完全唔覺得韌，而且好入味！ 主菜我哋就叫咗芝士甲羅燒蟹肉意粉，呢道菜絕對係今餐嘅亮點，蟹膏鮮甜甘香，再加埋好Creamy嘅意粉，我同個friend係咁爭食😂😂大力推介👍🏻 最後我哋仲食咗花生酥作為甜品，勁濃厚嘅花生味，而且一咬入口即溶，估唔到喺日式居酒屋可以食到呢種甜品。下次一定會encore👏🏻

前幾日同朋友去黃埔睇完戲，發現戲院附近有一間裝修得好文青嘅Cafe，周圍都係以原木為主，仲有好多茶葉做裝飾，細睇一下原來係茶木，睇完menu覺得幾吸引決定試試。 去茶木梗係第一時間嗌經典嘅金磚甜品，我哋叫咗草莓香草蜜糖磚塊歐軟。有士多啤梨、奶油、棉花糖同埋草莓，多士烘得好鬆軟，加埋蜜糖真係一啖接一啖，食到停唔到。 主食就叫咗古早杏鮑三杯雞，加咗$10配肉燥飯，同埋一個紅蔥奶油培根手作麵。佢個三杯雞係用個爐上，keep住熱度，雞件好嫩滑，仲有配料嘅大蔥好入味，一啖肉燥配一件雞，超級好送飯。至於嗰手作麵就好Creamy，bacon都算多。 我哋仲叫咗兩個小食，分別係櫻花蝦花枝餅、路邊攤小食。個小食拼盤超豐富，有香腸、鹽酥雞、花枝丸，我特別鍾意食台灣香腸，真係好似去咗台灣夜市咁，十分之惹味！ 飲品方面都有好多選擇，我哋叫咗一杯凍茉莉奶綠加紅豆、熱木柵鐵觀音奶茶加珍珠胚芽。鐵觀音奶茶嘅茶底好入味，珍珠都好煙韌，飲完個胃好舒服。 總結嚟講嘢食質素好高，而且價錢好抵。我哋叫咗咁多嘢買單都只係五百零蚊，人均250食到超飽。