影片
更多
2024-07-26
1411 瀏覽
過氣黑洞又要出山因為呢日要同朋友去食自助餐！真係想唔認老都唔得而家嘅胃口已經冇以前咁勁，所以食自助餐要揀得精明日本主題就最啱感覺冇咁飽呀嘛哈哈。呢日我哋去咗香港九龍東皇冠假日酒店嘅尚廚食東瀛滋味嘉年華自助晚餐。未夠六點半去到都未見有人以為好靜！點知去到七點已經全場爆滿，喺而家咁嘅市道下呢個自助餐都真係幾好生意。入得場第一時間去睇吓有咩好嘢食先！嗰條自助餐線好長都好多嘢食吓。首先有日式冷麵同埋壽司咦點解唔見咗刺身嘅！跟住就係冰鎮海鮮檔入面擺咗好多款，有海蝦、蜆、龍蝦鉗、黃金螺、紐西蘭青口、麵包蟹同埋松葉蟹腳，鍾意食海鮮嘅老婆大人睇到流晒口水。我最鍾意食嘅刺身原來喺呢度！呢日有帶子、三文魚、油甘魚、馬刀貝同埋天使粉紅蝦刺身，油甘魚同帶子刺身睇落好得喎。再行前啲凍盤專區擺咗好多前菜好似有芝士、煙三文魚同埋凍火腿，仲有現成嘅大蝦雜果沙律、香辣大樹菠蘿沙律、德國薯仔沙律同埋中華沙律，迷你雪糕嘅煙三文魚伴魚子醬水牛芝士脆筒的的式式仲幾好味添。再行前啲呢度仲有即開生蠔！全晚任食每次可以攞三隻食多幾轉回本好易啦。鍾意食菜嘅有水耕菜自助沙律，加埋其他新鮮嘅配菜想食得健康容乜易吖。如果你鍾意食湯麵咁就開心
呢日我哋去咗香港九龍東皇冠假日酒店嘅尚廚食東瀛滋味嘉年華自助晚餐。
未夠六點半去到都未見有人以為好靜！點知去到七點已經全場爆滿，喺而家咁嘅市道下呢個自助餐都真係幾好生意。入得場第一時間去睇吓有咩好嘢食先！嗰條自助餐線好長都好多嘢食吓。
首先有日式冷麵同埋壽司咦點解唔見咗刺身嘅！
跟住就係冰鎮海鮮檔入面擺咗好多款，有海蝦、蜆、龍蝦鉗、黃金螺、紐西蘭青口、麵包蟹同埋松葉蟹腳，鍾意食海鮮嘅老婆大人睇到流晒口水。
我最鍾意食嘅刺身原來喺呢度！呢日有帶子、三文魚、油甘魚、馬刀貝同埋天使粉紅蝦刺身，油甘魚同帶子刺身睇落好得喎。
再行前啲凍盤專區擺咗好多前菜好似有芝士、煙三文魚同埋凍火腿，仲有現成嘅大蝦雜果沙律、香辣大樹菠蘿沙律、德國薯仔沙律同埋中華沙律，迷你雪糕嘅煙三文魚伴魚子醬水牛芝士脆筒的的式式仲幾好味添。
再行前啲呢度仲有即開生蠔！全晚任食每次可以攞三隻食多幾轉回本好易啦。鍾意食菜嘅有水耕菜自助沙律，加埋其他新鮮嘅配菜想食得健康容乜易吖。
如果你鍾意食湯麵咁就開心喇！因為呢度嘅木魚湯底好食到不得了，仲有豬骨湯底可以揀不過我就冇試到！
跟住仲有好多熱辣辣嘅菜式可以揀！但係最吸眼球肯定係呢件清蒸比目魚。
至於食肉獸當然都會照顧得到啦！呢日就有紐西蘭燒肉眼同埋燒豬鞍。
跟住仲有十幾款嘅熱食真係目不暇給啊！
話明係日本主題首先有蒲燒鰻魚飯，跟住仲有日式醬燒帆立貝、豚肉生薑燒、燴忌廉雞肉、日式燒茄子同埋燒鯖花魚，鍾意食日本嘢嘅朋友可以大擦一餐。呢晚有中式同西式湯分別係係合掌瓜煲唐排同埋蘑菇忌廉湯。繼續仲有好多異國風情嘅嘢食！好似印度海鮮咖喱、匈牙利燴牛肉、杏片蝦肉蟹鉗、煎雞肉串、烤羊架同埋勁好食嘅香煎和牛粒。
走到盡頭仲有即炸新鮮熱辣嘅天婦羅、滷水拼盤同埋海南雞，如果食晒呢條自助餐線嘅嘢應該會飽到癲咗。
甜品迷係唔係係好心急呢！鹹食種類勁多甜品都唔少嘢㗎。
首先有甜蜜蜜嘅香芒布甸、橘子果凍同埋菠蘿椰子奶凍。隔離仲有八款口味嘅Häagen-Dazs雪糕任食。不過最吸引我覺得係呢個即製嘅法式班戟，記住一定要留位食埋佢呀正嘢嚟㗎。仲有原桶豆腐花同埋蛋撻，鍾意食包包嘅話呢度都有幾款揀㗎。
呢一張超長嘅甜品枱上面擺咗好多日式同經典嘅甜品。
日式甜品有抹茶紅豆蛋糕、柚子芝士蛋糕、櫻花水信玄餅等等。轉過彎仲有朱古力噴泉同埋好多新鮮嘅生果。覺得唔夠喉加少少錢就可以升級任飲！唔同價錢有唔同選擇可以無限任飲橙汁、啤酒、汽水同埋紅、白酒。
大家都會好想問飲品有冇得任飲先！放心呢個自助餐有冷熱紅茶、咖啡、果汁都係任飲嘅。
同大家睇完有咩食而家就到我開餐喇！乜都唔使講首先隊返半打生蠔就係王道，又肥又飽滿嘅生蠔食落去好綿滑，鮮味都好夠最緊要係好新鮮。
跟住梗係要嘆我最鍾意嘅刺身啦！柔潤嘅油甘魚同埋軟綿綿嘅帶子刺身係我嘅推介。
食食吓聽到響鈴聲就知道出面有好嘢攞啦！原來呢個自助餐會有甲羅燒食咁開心嘅。枱上已經擺咗個小火爐將甲羅燒撈勻之後燒佢4分鐘搞掂食得，將蟹膏放上去脆卜卜嘅多士一齊食真係好鬼滋味。
呢個時候整碗合掌瓜唐排靚湯飲吓先！呢個湯煲得幾濃吓唔會好似飲水咁唔錯喎。
飲完湯冇耐又聽到響鈴嘅呼喚呢次係芝士焗龍蝦！每人可以攞半隻食完可以再攞㗎，芝士加龍蝦都係冇得輸嘅組合嚟，最緊要龍蝦唔會焗到鞋霎霎仲鬼死咁多膏添。
老友攞咗一大碟天婦羅返嚟我梗係抽吓水啦！食咗天婦羅蝦個脆漿炸得幾香同埋唔油蝦肉好新鮮仲好彈牙添，估唔到自助餐嘅出品幾有水準喎。
呢碟熱食老婆大人攞埋我嗰份，坐喺度印印腳就可以坐享其成爽呀！呢碟面我就最鐘意海南雞同埋照燒茄子，海南雞皮爽肉嫩唔使點醬都好好食，日式照燒茄子香滑得嚟仲好鬼入味勁正。
牛魔王梗係要食返件紐西蘭燒肉眼啦！順手攞埋羊架同埋和牛粒，呢三款都係我嘅必食推介。勁粉嫩多汁嘅燒肉眼好香滑牛味都好出，不過和牛粒嘅油香仲更加正斗，平時我唔係特別鍾意食羊不過呢度嘅燒羊架我覺得要食，大前提你要鍾意嗰朕羊嘅羶味先得哈哈。
最後整多碗牛肉木魚湯烏冬呢一餐就非常完美！呢個湯底好香濃加埋烏冬同牛肉質素都唔錯，如果唔係咁飽真係想隊多碗呀。
甜品雖然唔係我最鍾意但係都會陪老婆大人食啲嘅，點知個傻婆一拎就攞咗八球雪糕返嚟！好彩朋友多一人食啲啲搞掂咗佢。
頭先講嗰個即製法式班戟真係靚到一個點啊！葵廣食一件都要幾十蚊呢可以任砌爽啊，個餅皮做得好軟熟加埋香滑嘅忌廉同新鮮生果真係好正。
最後仲有呢一碟甜品有好通透嘅水信玄餅，同埋又香又滑嘅日式布丁燒都好正㗎。
食飽飽整返碟生果幫助消化先！呢個自助晚餐星期五至日同埋公眾假期$638一位，記得去酒店嘅網上商店訂位同俾錢有八折㗎。
張貼
