炑八韓烤 (黃大仙中心南館)

營業中

休息中

同朋友去咗炑八韓烤試佢哋嘅二人套餐，$598，好夠飽。前菜一上嚟就已經令人心情大好，辣泡菜嘅酸辣味非常正宗，唔會太辣，但夠味，刺激味蕾。蘿蔔清爽脆口，芽菜同海帶亦都做得清新唔油膩，薯蓉入口綿滑，食到停唔到口，前菜全部都係任加的。送嘅清新沙律爐邊泡菜蛋黃金香脆，粟米芝士奶香重得嚟又唔會太膩太咸，好邪惡，食完，店員仲會主動添加。 燒肉方面，牛胸腹肉係我嘅至愛，香嫩多汁，每一啖都有啲牛嘅香氣，真係好滿足。蔥蒜牛五花帶嚟一陣陣蒜香，牛肉嘅油脂剛剛好，唔會太肥膩。豬五花用秘製醬油醃過，鹹甜適中，燒到啱啱好嘅焦香，真係一試難忘。雞腿肉用梨汁醃過，口感嫩滑帶少少甜味，真係好特別，八爪魚有嚼勁又入味，唔錯。 韓式麻藥蛋飯蛋黃滑溜溜，滿滿嘅紫菜，飯粒吸收咗醬汁嘅鹹香，食埋個飯就飽晒。 藍橙sour asahi 有汽果酒 $78燒肉又點少得了冰凍嘅啤酒，味道好refresh。皇牌士多啤梨乳酸梳打 $38酸酸甜甜，好適合唔鍾意飲酒嘅朋友。