鮨一 (厚福街)

營業中

休息中

天氣轉涼，温度驟降，打左幾日邊爐打到有啲悶，想轉下口味，今晚決定食下日本野。咁啱上網睇到呢間鮨一，決定去試下佢。一入到鋪頭個感覺好似去左日本既居酒屋咁，一排清酒樽做裝飾，店面唔算好大，但係就有個好大既壽司吧枱，三位壽司師傅企係到準備好握壽司比客人。望下餐牌，見到咁大個壽司吧枱梗係要點壽司，我哋點左個特上十貫目壽司，同一個安格斯牛肉鍋，追加個烏冬暖下個人。壽司來到睇個樣都夠哂吸引，帆立貝壽司鮮甜多肉，配上赤醋飯微微既酸味，真係惹味！牡丹蝦壽司蝦肉彈牙，一食就知夠哂新鮮。左口魚壽司用火鎗輕微燒過，令魚油爆曬出嚟，得一舊真係唔夠！鰤魚壽司好有口感，每咬一啖魚味就滲透出來來！赤身壽司同拖羅壽司當然係主角，赤身充滿光澤，濃濃魚味，而師傅好細心咁切開拖羅上既筋位，食落去完全係滿滿既魚油散開哂。最驚喜係醋飯除左係用赤醋外，上到枱啲飯仲係暖暖地，足見師傅既用心。食完壽司就食牛肉鍋，牛肉鍋以壽喜燒作湯底，上面滿滿的配料，兩個人食真係食唔哂。安格斯牛肉切片另上，可以自行調整生熟程度，肉味好濃。食完肉啲蔬菜配料都啱啱熟，再加個烏冬，成個人暖洋洋，真係滿足！